Oh bun dé, signur Jan Domëne

From Wikisource
Jump to navigation Jump to search
Oh bun dé, signur Jan Domëne  (1833)  by Micurà de Rü
Ladin Micurà de Rü
grafia moderna

Oh bun dé, signur Jan Domëne

Oh bun dé, signur Jan Domëne!

O bun dé, signur Francësch! Ves lascëise inće vos n pü' odëi na ota?

Ël n' é pa mia tant die che iö sun stè chilò.

A me pêl bëin, ch' ël sie dërt die; e chëst n' é ater che n sëgn, che iö ves vëighe gën, e che iö dejiderasse de ves odëi vigne dé chilò.

O mi bun signur Jan Domëne, sce iö n' esse tant da fà, da lavorè, e da festedié a ćiasa, voressi bëin gnì gonot da vos, mo insciö savëise bëin. A danz, a danz! - Ad avëi na gran famëia ne pòla ester atramënter. Iö à porchël bëin inće iö da fà, e da festedié assà, mo iö ne me la tole pa tant ćialda iö canch' iö pënse, ch' inultima él bëindebot tüt un.

Chël avëise bëin rajun, signur Jan Domëne! A propó! N' oresses gnì n püch a spazier con me?

O mi care signur Francësch, incö ne pòla ester.

Co pa no?

Porćì che iö ne me sënte nia dërt bëin.

Iüst per chëst desses gode l' aria frësca. N' ëise pa mai aldì dijan, che la bela aria frësca é plü ütile por nosta sanité, che tütes les medejines di doturs, e di apotecari?

Ëla serà, ëla serà, almanco ne cóstela nia. Ći tëmp él pa?

Le tëmp ne podess pa ester plü bel ël.

N' él mia massa ćialt?

Ël é bëin ćialt, mo ël tira n pü' d' aria morjela; ël é n tëmp deletó. Sö via! Vegnide, signur Jan Domëne.

Por plajëi a vos, vói mefo vegnì, derest ne pensâi pa de jì fora de ćiasa iö incö.

Iö ves rengrazie; ëis tröpa bontè por me.

Iö ves prëie de jì n püch plü plan, scenò ne pòi trà le fle.

Sco comanëis.

Da comanè n' ài nia con vos, mo iö ves prëie, sce ne le fajëis cies ingert.

Ingert scé! Tüt feji gën, ći che ves plej.

Sce ël é de chël, sce vorunse n püch palsè.