Mieu desideri

From Wikisource
Jump to navigation Jump to search
Fluors alpinas  (1883)  by Gian Fadri Caderas
Mieu desideri
[ 76 ]

Mieu desideri.

Mieu desideri ais üna valleda,
Illümineda tres la fe, l'amur
Ed üna chesa traunter fluors zoppeda,
Ün tschel pürissem d'stailas e d'azur.

Compagna, tü sulett' a me prüveda
Suletta tü, richezza, mieu tesor!
Dalöntsch dal muond sulets in la valleda,
Sarost il fö vivifichant del cour.

Dasper l'ovel, dasper la püra uonda
Nus tschanterons, smanchand il muond reel;
Sün quaist mieu cour posand ta testa blonda
Aint in tieu sguard vzaro aviert mieu tschel.

In ün transport da fe, amur e spraunza,
Passenterons noss dis containts, beos;
Fin cha la mort ans pinero la staunza
In quella nus sarons tuots duos luvos.