La mamma dorma!
| ←Ad üna morta | Fluors alpinas (1883) by La mamma dorma! |
Mieu desideri→ |
La mamma dorma!
»La mamma dorma hoz bain löng, Maria;
Ad ais las nouv ed ella sü nun sto;
La sdasder our voless ..... Que fo fadia
Da sdasder our chi dorm' usche beo.«
Usche favlaiva povra Margaritta,
D'sa mamma morta s'accostand al let;
Il sön d'la mort scambiand cul sön d'la vita.
»O dorma mamma, dorm' ün quaid sönet!«
»Nun fer fracasch, Giorgin, la mamma dorma;
Giover pü bain podains our in talvo.«
O Margaritta, innozainta orma,
Ta mamma chera, pü nu's sdasdero!
Maria, l'amda, ils infaunts our d'staunza
Trametta, crida per la povra sour
E per ils orfens sainz' agüd e spraunza;
Chi vossa chüra pigliero a cour?
Ils pizzamorts intaunt in ches' arrivan,
La morta lovan aint nel stret vasche;
Our in talvo ils povers orfens giovan;
Containts els sun con lur göets usche.
Povrets, els crajan cha lur mamma dorma
E nun s'impaissan d'esser be sulets;
Ün cler solagl splendura in lur orma;
O povers orfens, povers infauntets!
Schner 1882.