Gramat Volapüka/Mayuds e minuds
| ← Lafab tonatas latinik | Mayuds e minuds Gramat Volapüka |
Malüls → |
20. In vödem Volapükik papenons me mayud
1ido in prosad vöd balid seta.
2ido in poed vöd balid seta, e vöd balid liäna balid liänema alik u strofa alik poedota.
3ido lönanems godas e pösodas.
If famülanem u tribütanem pösoda binädon me vöds tel u mödikums, vöd balid ona ai papenon me mayud. Vödas retik 16nema te uts papenons me mayud, kels i in natapük lönik okas papenonsöv me mayud.
4ido lönanems taledavik.
5ido nem Goda e vöds valik, kels malons Oni (Omi).
6ido vöd: Volapük, if me at padiseinon pük valemik, pedatiköl fa ‚Schleyer‘.
7ido vöds valik, kels pedefomons de vöds me mayud papenöls.
8ido vöds natapükik no pevotükölo in vödem Volapükik pasaitöls, if papenonsöv i me mayud in pük lönik okas.
21. Me minuds papenons in vödem Volapükik
1ido nems delas viga, mulas, relas, zäladelas, vienüdas e nems pükas e netas no de taledavanems pedefomölas.
2ido tiäds pösodas.
3ido vöds retik valik seta, kels no mutons papenön me mayud sekü noms in § 20 penunöls.
Noet: 5. Pö koboköm obas in ‚Wienacht‘ söl: ‚Sprenger‘ ädunidükom säkädi, va no binos-la vipabik ad gebön in Vp. te minudis. Dü bespik dö prinsip ela ‚Schleyer‘ ad penön pro ton alik mali te bali, lofüdänan semik äküpetom, das prinsip at no päfölon fa Vpans it, bi gebons pro ton alik e mayudi e minudi. Söl: ‚Sprenger‘ äjonom lü telegraf e stenograf, pö kels i te minuds pagebons, e lü gaseds anik in Jveizän, kels pubons löliko in minuds. Äcedom, das geb te minudas obalugükonöv Vpi. I äcedom, das dub penam nema Goda me minud no ludämoyöv dalestümi pro Valanämädal, bi kanoy saidiko stimön Omi ön mods votik e zuo stim pro God no sekidon de geb u nogeb mayuda.
Ni söl: ‚Sleumer‘ ni ob äkanobs sludön ad finidön mayudis in Vp. In vödems me tonats latinik mayuds binons so valemiko geböfiks ed obs ekösömikobs so vemo pö geb mayudas, das finid onas vero no ofruton. Geb e mayuda e minuda binon sek volfajenäda dü tumyels. Primo i latin te päpenon me tonats sota balik, sevabo me mayuds. Utos, kelos ekodon davedi fomas tel pro tonat bal, ba kanon no plu patuvedön, ab no kanoy noön, das dabin e mayuda e minuda i labon fruti. Geb fomas bofik givon lovelogami gudikum vödema, lelogädükon lelogädabikosi e fölon flagis güta.
22. Lafab fonetik no labon mayudis, klu vöds valik proni malöls ai papenons me minuds.
| ← Lafab tonatas latinik | Mayuds e minuds Gramat Volapüka |
Malüls → |