Glamat popiko-katekik Volapüka/E. Ladyeks
E. Ladyeks
I. Ladyekafomam
78. Ladyèks (üd ‚ádjectìva‘) valik in vp. liko pafomoms?
Lägon baliko len finatonabi vöda tefik (subsata…) silabi ìk, dubü kel lesevon foviko ladyekis valik; a. s. pöf, pöfìk…
Sams: Logob beli jönik; givob domi smalik (domili) blode; labob (eli) kafi gudik, i vini nulik e bili blonik; badiki puli no löfob (löfob no); no sevob fluki foginik, ab floli yulibik; labob flenis läbik (semikis, sembalis); gletikis (elis) länis sevob; löfob köli glünik; ab no löfob köli blägik(i); givob vati hitik no cilile.
No löfob ladis kalodìk; ab löfob pulis visedik; löfob kapis sapik; givob tiedi ciles malädik; labob tabis lonedik; löfob lolis ledik; ab no löfob zibis salik; logob slipikis bötanis; löfob bukis gudik; givob moni nulik pule dutlik.
NB. If pladon in vp. ladyeki bifü subsati: ladyek mutom pavotön ma num, gen e deklinafal. Ab if ladyek stadom nemedamo po subsat oka: no nedon votön ladyeki; a. s.: sevob satini gudik; ab no sevob nemafliki vali; löfob menis lisälik e vemo kapälikis…
II. Lüen balid plulüenama
79. Liko fomon lüeni balid plulüenama (‚cómparatìvum‘) in vp.?
Lägon len silabi ik ladyeka… finasilabi plulüenama ùm, kel, puteilöl de ladyek, as ladvelib, malom ütosi, äso mödikumo, plu… (bifü kosonats, peteilöl as ladvelib, id umo, pla um); s.! vàm, vamìk, vamikùm…
2880. Liko lovepolon vödili deutik als, u latiniki quam (kvám) po lüen balid plulüenama?
Egelo te me kà; ab no me as, äs ud ven…
Sams: Velat vöda Goda (ai)binom gletikum, ka velat vödas menik; dog binom galikum, ka kat; dutlikum binom vobel, ka bièn; no gletikum, ka sol; smalikum, ka mun; vobikum, ka deutan; gudikum, ka vin; yulibikum, ka golüd; kulädikum, ka väted; läbikum, ka lanals.
Glünikum, ka meìd; sanikum, ka Petrus; sanlikums, ka medins; ladlikum, ka zesüdik; kalodikum, ka yanul (balul); lemikum, ka pötèts; cilikum, ka lisälikum; löfob umo dinis tikälikum, ka sienikis; sevob vödis nemikum, ka talikis; no löfob yeltumìs kligikum.
III. Lüen telid plulüenama
81. Liko fomon in vp. lüeni telid ä geiliküniplulüenama (‚supérlatìvum‘)?
Lägon baliko len posilabi ladyeka ìk silabi ün; a. s.: gudikün.
82. Lovepolon liko vödili deutik von (aus) po plülüèn (‚supérlatìvus‘) in vpi.?
Uf me kimafal (kösömo plunuma), ud me pläpods de u se.
Sams: Lonedikün flumas valik (ai)binom Mísisípi; löfikün de cils valik; valüdikün limepas 29alik; menikün valikas tugas; (el) motikün se lads valik; nulüdikün zibas (de zibs) valik; blägikün kölas valik(as); löfob vemo gletiküni tugas (se tugs) alik; löfob ai (ailöfob) dili sefikün; solikün(i) länas valik.
Sulüdikün länas alik; stupikün se stupels valik; tugikün menas valik; nemaflikün de spads alik; fatikün konsälas valik; lisälikün filosopas alik; kapälikün vomülas valik; löfob velatikünis vödas alik; vamiküns ladas valik; no löfob vatikünis supas valik.
83. Kanòn-li vpo. fomön i ladyekis sa omsa plulüèns e plülüèns se stämavöds, de kels in natapüks ladyeks nonik binoms geblik, a. s. de son e jison, böd, can, meìd, cem…?
Si; ibo vp. fomom ladyekis de vöds valik, bi vp. no löfom u sufom sesumis. Sikod fomon sonik (de son), jisonik (se jison), bödikum, canikün, meidik, cemikün…
IV. Topot ladyekas
84. Ladyeks ti valik ailaboms topoti segunatikün oksa kiöp?
Nomò po subsat lönöl al omis (okis); ed atos aibinos jalepo pöfölöl pato in stül telid ü tedelik! Ibo ladyek, stadöl po subsat, leno pavotomök, bi ladyek sa subsat oka fomom leofen löli tikavik bali, s.! kuliv fotlik ü (kobo) fotakuliv…
| ← A. – D. Subsats | E. Ladyeks Glamat popiko-katekik Volapüka |
F. Numavöds → |