El Castiel de Ruvèigno/06

From Wikisource
Jump to navigation Jump to search
El Castiel de Ruvèigno VI: da chi dapandiva in anteîco  (1905) 
by Raimondo Devescovi

Da chi dipandiva in anteîco, e da chi adiesso la cesa de Ruveîgno

De Sant'Ufiemia, la su cesa anteîca b
d'i viscuvi de Pola dipandiva,
e quila sa pol deî, gira oûna streîca
de l'altra ca pioûn tardi i frabichiva.

E cu ne' l'uotosento zì vignoûda
par mar la Santa e in Arno zì farmada,
pena sta nuva el vis'cuo l'uà sintoûda,
vigniva loû ben priesto in sta cuntrada.

Festa in castiel g'uò fato la su zento,
ca loû cul su cliero in pais riviva,
l'uò fato el vis'cuo viersi l'arca, e drento
el cuorpo de la Santa sa truviva.

Ma quando in Eîstria puoi i s'ciavi rubiva
vignoûdi da largo cheînt'a Parenso,
e de quil vis'cuo li fore i dastruziva
e liesti i spariva ultra San Lurenso.

Mischeîn el zì rastà de biessi e intrada
cume parici riduoti in sta magnera;
ben l'uò misso el patriarca in carizada,
li diesime dunà el g'uò de sta tiera.

El quartise de quiste loû tiriva
su l'uoio, pan e veîn ano per ano,
e loû par biessi doûto el barativa
a qualcu sciur, ca 'l stiva da suvrano.

La cesa de Ruveîgno da quil ano
pioûn Pola nu l'uò boûda ma Parenso,
c'a quisto vis'cuo nel su gran malano
g'uò fato del gran ben, g'uò dà cunpenso.