DER FIYWYT

From Wikisource
Jump to navigation Jump to search
DER FIYWYT by Józef Gara
Zbiór wierszy o wilamowskich obrzędach i obyczajach oraz Słownik języka wilamowskiego

[ 38 ]


DER FIYWYT


DER FIYWYT EJ ENTŁICH GYKUMA
YR ŁÖFT HIYT MAON DY WESPA ZUMA
DER WYNTER TAOJYT ZIR ŁAONG
Y DAOR CAJT WIÖS YNS ZIR BAONG

DY FYGLN ZAJN FUM MYTAOG CYRYK KUMA
ZY ZYNGIA ZU SIEJN, IDYN WEŁA ZY EJWERNAOMA
DY ŚWOJMŁA MAOCHA NAOJY NAOSTŁA
DESA UNDYN WENDA AN YM SIOPŁA

DER POJER MAOCHT FIETIG DY MASIN
HOR MÜ FIR DY FAMILI GIEŁD FERDIN
DER TRAKTOR ŚTEJT SIUN UFUM PŁON BYRAT
ES EJ NÖ HEFA CY ZYN GYTRAD

YM FALD GEJT DY AOT ŚNEŁ FUR HAOND
DY MASIN ZAJN YM GÜTA CÜŚTAOND
DER POJER DENKT SIUN BAOŁD CY ENDA
NÖMYTAOG MÜSA ZY ZICH CYN AORPUŁN WENDA

DY HAOM HIÖRT DY BOW MYTUM MYTAOGAOSA
DER POJER ŁAOCHT, ES EJ GÜT DOZY NY HÖT FERGAOSA
DY BOW RIFT A PAOJER UFS MYTAOGAOSA
DOS WYT JUM BYŚTYMT GÜT PAOSA

NÖMYTAOG KUMA OŁY UFS FALD AORPUŁN ZECA MYT
WIR MÜSA A HIERGÖT BYTA DO A YNS SIEJNY CAJT GYT
DER POJER BRENGT DY AORPUŁN UFS GEWEND
DY BOWA FIYDYN ZICH, DY AOT GEJT SIUN CY END






This work is licensed under the Creative Commons Attribution-ShareAlike 3.0 Unported license.