Catherine Tekakouita
| Catherine Tekakouita (1876) by [[Author:Pierre Cholonec|]] |
[ 1 ]
Tehoristorarakon J. Chapleau et Fils.
1876.
[ 5 ]
Endanakinigobanen Kaninkenano, ki niki Tekak8ita mitatcin mitaso mitana acitc ningot8atcin mitaso mitana acitc nanomitana acitc ningot8aso pipon eko ki nikitc Jezos. Matcinato8enigoban osan, ka8in aiamiasinigoban, o kin dac niina8isik8enigoban, aiamianigoban kimotc. A8akaning togoban aam ik8e meg8e eiamiasigok. Pinama Metabinotinong ki tanakigoban ; mi indaje ka sikahandazogobanen, eiamianidji o nita8ikihigo, apitci sakitogoban aiamie8in.
Ningotin dac i mikati8agobanen Metabinotinong 8emitigoji8ak gaie Matci nato8ek, ki takonigani8i aam ik8e, ot a8akanigo Matcinato8e, Kaninkenang ot iji8inigo. Ka8in a8atc o ki pakitenindansin aiamie8in, nananj gotc mi eji pon pimalisitc, o ki nisigon omiki8in. 8a ani [ 6 ]nipotc, apitci gackenindamogoban o nidjanisa ondji, nijinigoban, pejik k8i8isensan, kotak dac ik8esinsan. Anin ke to8ag8en ni nidjanisak ki nipoiân, inenindamogoban. Ki omikik gaie 8ina8a i niji8atc ; ki nipo 8in k8i8isens, ka8in ki teb sikahandazosi ; ki nodjimo dac 8in ik8esins Tekak8ita ena8indibanen, anic dac ockinjikon apitci manatatini8an, monjak akosigoban ockinjikong. I pimi nita8ikihigotc o nocenjan, ka8ikat ag8atcing ijasigoban epitc akosimagatinik ockinjikon. Keg igotc apitc ; nagatenindam kakik pindikamik ij apitc ; ka kanake kikenindansigoban anotc kekocic 8etaminoke8atc abinotcenjicak.
Ka8in ana8i kitimisigoban Tekak8ita, kekape kijik anotc inanokigoban pindi kamik. Neta kitimidjin a8iia, anotc kekon maianatatinik k8aiak o kat ani paci8inigon, kitimicki8ining ma ondjipamagaton 8iiaki patato8inan. Monjak ij ondamitatc Tekak8ita, ka8in keko ki [ 7 ]tisi endinitc ako 8endamitasimigo ik8esinsa. Ka gaie o min8enindansin kitci papa ma8atici8etc, pejik8anong kitci apitc mi eji min8enindamogobanen. Netapapa-ma8atici8edjik kikango8ak sanagatini endo8atc. Kakina maianatatinik o mikana8a i nita papa 8abange8atc, i nita papa pizindage8atc, i nita papa ikito8atc. Gaie dac 8a8ejio8in onzam o min8enindana8a ako anicinabekang, ij inenindamo8atc : ninga kijikabamigo, ninga mamakatenimigo. Cingenindamogoban Tekak8ita iim inenindamo8in, eno8ek naningotinon i kakanzomigogobanen o nocenjan ki 8a8ejiogoban, manadj-an8eta8agoban ma.
Mi apitc kitciokima enonâtc 8emitigoji8a kitci a8i ma8ine8anitc Kaninkenano ; keget ki kitci mikatig8aban, apitci cagodjihak Kaninkenanok, nis8i ot otena8i8an ki angodjikateni8an. Anitok ke to8ang8en, aitig8aban epitc sekisi8atc. Mi ij anona8agobanen o kijeininimi8an [ 8 ]kitci madjanitc, kitci a8i nanzika8anitc Moniang daje okiman. Konima ninga ca8enimigonan, inenindamog8aban.
Moniang ki pi tag8icinok meiaosegobanenak Kaningenanok, o ki pi nanda8enindana8a 8aki pekatc kitci ininik, mi sadac keget ka ingi. Ki papamitam 8emitigoji okima i ki kakizomintc, 8aki pekatc ki ij8ebatini. Mi dac i ki anokimotc okima mekate8ikonaienidjin kitci a8i kikinohamagenitc Matcinato8enang. Aiang8am, ot ina Kaninkenano : minotota8ik mekate8ikonaiek ke tota8eg8en pejik mekate8ikonaietc, tanasak nin ni totagok, ki gat ineniminim. Kan8ikegoban ma okima ka totaminitc Kaninkenano : ka8in’g8etc pina8igo nanint mekate8ikonaiek anotc o ki totago8a, keg o ki nisigo8a kiki nibina eiamiadjik, kakina sa gotc aiamie8in ondji o ki ondji nanigo8a Kaninkenano.
Eno8ek ka8in ki cag8enimosik nis8i mekate8ikonaiek kitci ija8atc Matcinato8enang [ 9 ]. Tek8icino8atc dac endanakinigobanen Kaninkenano, ka8in ki gackitosik kitci gaganoniti8atc, onzam meg8atc kitci inakamigatini, maminahiti-inakamigatinigoban.
Mi iim apitc i mâdji-ca8enindago sigobanen Tekak8ita. O ki pindikana endâtc mekate8ikonaienidji, o ki kikinohamago aiamie8in eji8ebatinik, oki sakihigo gaie epitc min8enindamogobanen ij ani kikinohama8intc, gaie 8in o sakiha epitc pajik8atisinitc 8enicicininik gotc eta ij iji mitonenindaminitc. Mi ka ondji misa8enindang 8ibatc kitci sikahanda8intc. Ningat aiamia, ninga sikahandas, songa inenindamogoban. Ka dac iim apitc ki insinini ; niso kon ma eta ki apig8aban mekate8ikonaiek, mi eji madja8atc, Nangita8atinang iji8ak. Mi ka daje kikito8atc, ikito8ak : nij kata iapik endaje mekate8ikonaiek kitci kikinohamage8atc ; pejik dac i nisi8atc kata iji asin i patakising, mi indi ket iji8itotc aiamie8in. Mi dac keget i pake8initi8atc. [ 10 ]
Apitci ki gackenindamogoban Tekak8ita apitc ka madjanitc mekate8ikonaienidji, pejik8enindamogoban aiamie8in epitc misa8enindang a8acamenj kitci ani kikenindang, gaie dac epitc nanda8enindang kitci sikahandazotc. Eckam dac ij ani nita8ikitc inenimigogoban otcina8endagana kitci tipanote8isitc. Ka8in ana8i maci kikenindansigoban epitc aiamie kitcit8a8enindag8atinik tesanak8e8i8in, keiabatc dac o cingenindan 8itikendi8in, o 8i pakitenindan Kije Maniton ondji kitci pejik8enimâtc.
Apitc dac enindjin : ki ga tipanote8is acaie kitci eka gitimagisisi8an, ikitogoban : keck panima ick8aiatc, onzam keiabatc nind agacinjic, pinama ni 8i mitonenindam. Tanasak ot ojindan iim ij ikitotc, midac i ponimigotc tcana8emadji iim apitc. 8a8ibatc gotc mipa8atc ki ojikij8anigogoban ka nita8ikihigodjin ; mamandagonini8an o ki na8anja8enima8an kitci 8itikematc, mi eta i 8indama [ 11 ]8a8agobanen inim ockina8en gaie o nikihigoni. Kakina iji min8enindamog8aban ; mi dac tebikatinik i pindiketc iaam ockina8e endanitc Tekak8itan, ot anamika8an endotamo8agobanen gotc ako neangabidjik. Ka8iti kikenindansigoban Tekak8ita, katadjimota8a8indiban ; apitci dac kitci kock8enindam, gaie kitci agatcigoban apitc n8anda8âtc inim ockina8en. Mi gotc eji sakahamogobanen, ij ojimotc ikitogoban : ka8in ningat ondji pindikesi minik ket apik8en a8ek8enitok8en.
Ki kitci nickatisin o tcina8endagana Tekak8ita epitc agatcihâtc, ka8in eno8ek ana8enindjikesig8aban ij inenindamo8atc : ondjita gotc kata ino ka iji kij8eiâng. Ka8in dac ki gackidjigani8isi Tekak8ita kitci cagotenimintc ; onzam macka8enindamogoban i cingenindamogonen iim to8a. Kakik dac papinota8a8indiban, anotc kekon maianatatinik iji acodjima8indiban, ina8indiban ako : ki kitci [ 12 ]gotamik8enindam, apitci ki saseka, ka8in ki sakihasi8ak tcana8emadjik, ki cingenimak Kaninkenanok, ki 8abanakik8e8 maeka.
Ka kanake animitagosisigoban Tekak8ita, mamacka8enindamogoban eji a8akazoma8indibanen ; ka8in napitc ningot inenindansigoban. Mi gotc pejik8an eji ani tep8etamogobanen, anotc kekocic eni iji anona8indibanen misa8atc kekon aianimatinigin. Keg nanage mina8atc o ponihigo tcana8emadji, manotc ninda8atc ka8in kata tipanote8isisi, ot inenimigo.
Mi apitc mekate8ikonaietc, Onesent ina8indiban, tek8icinogobanen endanisinigobanen Tekak8itan. Tasin kajigakin 8idji8egoban i kikinohamagenitc, gaie dac nikan nabo8egoban aiamie miki8aming. Ka8in nangim 8indama8asigoban mekate8ikonaienidjin enenindamogobanen ij inenindamogobanen : ningat aiamia. Gosagoban o micomenjan apitci cingenimanigoban ciamianidji. [ 13 ]
Mi dac gotc iim tek8akinik kekakonani8ang apitc, pindika8agoban mekate8ikonaietc Tekak8itan. Nanaitak akosigoban osit Tekak8ita ; ka8in ningotiji ijasigoban. Kitci min8enindam i 8abamâtc Jezosan enokita8anidjin ; mi apitc 8andama8atc enenindamogobanen. O nondagon ot ang8eian ij ikitotc : n’ose, ni misa8enindam kitci sikahandazoiân, ij ana8i kikenindamân kitci cingenindama8i8atc tcana8emagik. Eno8ek dac manotc, ka8in ninga gackihigosik kitci eka kitcit8a8inasi8ak Tebenindang ki pimatisi8ininan. Mamakatenindamogoban mekate8ikonaietc epitc macka8enindaminitc, o ki kikinohama8an, o ki gaganoman gaie kitci mino inatisinitc. Ka8in gotc o ki iji sikahanda8asi8an, inenindam : ninga kak8edjiha ket apitca pipong, mi dac i ki nanda 8abandama8atc eji8ebisinitc.
Ka8in a8iian ki gackitosin ningot kitci igotc Tekak8ita epitc nib8akagobanen, [ 14 ]epitc gaie pekatisigobanen. Ka8ikat nickatisisi ij ana8i anotc ainintc. Keget pinama papinota8a8indiban, pinama kota kiha8indiban gaie, ick8aiatc dac ki kitcit8a8ina, ki sakiha gaie epitc minotehegobanen gaie epitc sakihagobanen kakina anicinabe. O mamakatenimigon gaie 8in mekate8ikonaieaidjin enatisigobanen, o ki inenimigon : ninga min8enindamiha, onzam apitci o nanda8enindan i 8i aiamiâtc. Aiapitcipatc dac i kijigak mi acaie i sikahanda8âtc, Katinin ot ijinikanan.
Mi dac iim apitc keget pekitenindamogobanen anotc kekon ondaje aking, inenindam : anin ke totamân kitci tibisat8aiân ka iji 8an8indama8ak Kije Manito. Tasin dac kajigakin tanisigoban i kikinohamatinani8aninik gaie ij aiamiani8aninik. Naningotinon gaie, ijagoban endanitc ot aiamie ôsi8an ij inenindang : apitci ninga kikinohamag kitci apitci k8aiak8enindamân aiamie8in. Kakina [ 15 ] gaie pimi tibisat8agoban eni iji kikahamagotc ; midac ka ondji 8ibatc i kitcit8a8isitc aiamie8ining.
Kag8etc nibina taso kizis 8aki iji mitonenindam ; keg apitc mi enditc eji 8indamonang Mino Manito aiamie masinaiganing ij ikitotc : matci manito o 8i8aiejihan 8a mino aiang8aminitizonidjin eiamianidjin, inenindam : ninga k8ekinama8an o mitonenindjigan 8ecki sikahandazotc, ninga tota8a kitci 8ebinang o sikahandazo8in. Mi enenindamogobanen matci Manito, mi dac tec i pajik8atisitc kitci madjitatc o matci inanoki8in. Acaie kaiasikatc ot ani papinotago Kati nin inim nitam ana8i saiakihigogobanena, tcisa8akenimigogoban onzam i song aiamiâtc, nanint pak8anomigogoban, ikitog8aban : 8akitc eta aiamie, ka8in keget iim inenindansi. Potc nanint inenimag8aban i 8i iji 8aiejiha8atc patato8ining, ka8in dac ki cagotinigani8isi, mamacka8enindamogoban ka iji [ 16 ]pakitenindizogobanen. Mi dac ka ondji 8itoka8enimigotc Kije Maniton. Aiandj gotc songa pajik8atisi ij aiang8amenindizotc. Menadjitagani8angin kekape kijik, mi gotc eta ij aiamiâtc.
Apitci cingenindamagogoban tcana8emadji ij eka ningot inanokisigobanen ako iim i manadjitagani8aninik eji ondamita8agobanen kotakak anotc kikang8ak eka kekenindansigok aiamie8in. Ina8indiban : ki pijik8atis, ka8in keko kit inabatisisi, ki kitimick. Ka8in acamasi8indiban ako iim apitc menadjitagani8aninigin ij inenima8indibanen : kata inanoki 8ij-8isinitc. 8in dac taiag8atc gotc inenindam : manotc ninga 8ij-8isin kape kijik, ka8in ninga 8anadjitosin Kije Manito o kitcit8a kijikom. Ikitonigoban tcana8emadji : ana8enindamak8atakamik eji8ebisitc, taka kak8edjihata, koni ki ga cagodjihanan Anokimo8ak dac kitci nopanadjigani8intc aiamie-miki8aming. Asinin ki [ 17 ]aioha i pimosenitc o papim8asinana8an, o papapijiha8an abinotcénjicak, ot ina8an : « Mi8aam pemosetc ketci-song-aiamiâtc. » Kakanake o nisit8amadjitosinan i papim8asinadjigani8itc ij ana8i aindota8intc : Kije Manitonang maeka pimiakoki8eienindam i pimosetc.
Ningotin kajigatinik pindikamik ij apitc, mi i pindikagotc pejik mamandagonini8an, apitci gotamik8ing8eni, mokoman o takonan, ot ombinan, ot eco8inan, inenindam : ninga pajipa8a. Ka8in o ki gosasi8an Tekak8ita, taiag8atc gotc o kitci sekihan ; epitc sekisinitc, ojimon, madjipai8en.
Eko ki aiamiatc Katinin Tekak8ita, apitci ki animiha inanoki8ining nabingin tek8akigin gaie. Peponinigin eta pangi an8ebigoban ; ana8i ma8in mi gotc pejik8an enanimisitc, o nocenjan i cingenindamagotc onzam i song aiamiâtc. Monjak gackenindamihigogoban, monjak nickatisinigoban. Keg apitc mekate8ikonaeitc [ 18 ] endatc iji8an o nocenjan ij a8i kina8icki mijimigotc. Anotc ot ainan Tekak8itan i ganonâtc mekate8ikonaien, ikito : n’ose, iaam nind anis Katinin neb8aka8enimatc ka napitc ijitehesi enenimatc, 8akitc eta aiamie, eiamiekazongin to8a. Potc nongom gotc ningi nonda8a patato8ining ij mâtc ni 8itikemaganan. Ot an8eta8an dac 8in mekate8ikonaietc, o kikeniman ij eka g8aiak8atisisinik inim mindimonhienhian. Taiag8atc gotc o nanibikiman, ot agazoman. Ick8aiatc dac o kak8edjiman Katininan, ot inan : keget na patato8ining ki ki ina ki micomenj ? Apitci kock8enindam Katinin i nondang iim ij ikitonani8aninik. Ikitogoban : n’ose, ka8in 8ikat ningi inenindansi iim to8a, epitc cingenindamân ; potc nind inenindam ka8ikat ninga kikenindansin iim nongom eji kina8ickiaka8imigoiân.
Sanakat ana8i 8âki kitci ki inenindangiban Katinin, onzam apitci aiajotcmia8indiban [ 19 ] patato8ining, mi dac 8endji ki inenindang : ningotiji ningat ija, ningotiji ningat a8i tanaki eiamiadjik endanaki8atc, 8aki kitci manadjihak Kije Manito. Mi monjak eji pagosenimagobanen ij aiamiâtc. Apitci ana8i keget animatogoban kitci pakitenindang ka daje nita8ikihintc ; apitci ma ot aiang8aminamini o micomenjan apitci cangenimagobanen eiamianidji. Aiandj gotc inenindam Katinin : ninga tep8eienindamihitis ; Kije Maniton o pakitinama8an. Mi dac oom ka ingi.
8aki ka mino ina8endi8atc 8emitigoji8an i mikati8agobanen matci-nato8ek, nanint pepa anokinigobanena 8ajackang meg8acka8ag8aban mekate8ikonaiek o ki kikinohama8a8an aiamie8in. O ki pinaama8a Kije Manito o mitonenindjiganining, o ki min8enindana8a aiamie8in. Mi dac ka ondji pakitenindamo8atc otena8 matci-nato8enang, mi dac Kahna8akeng i tanaki8atc ij aiamia8atc. O ki [ 20 ]kikina8abama8an nibina tcana8ema8adji, kakina gaie eji oio8itcki8enhima8agobanen. Kahna8akeng ma8atici8eg8aban, ki aiamiek gaie ikim. Ka8in a8iiak inenindansi, ninga ki8e, koki ningat ija endanaki8agobanen. Ka8in g8etc kin8enj, eckam mica otena8 Kahna8akeng.
Apitci nita-ca8enindjikeg8aban iim apitc Kahna8akenanok epitc pajik8atisi8agobanen aiamie8in. Minag8aban ako eji tani8atc matci nato8enang 8endjipanidji ; kikinohama8ag8aban gaie ako einda8atc eji onicicininik Iezos ot ijit8a8in. Ka iji ca8enimâtc Kije Manito i ki 8asehama8âtc tibikatisi8ining tanasak i pimatisi8agobanen, naningotinon mi gotc ako 8endji madja8agobanen i nanda8abama8atc matci nato8enang ; meckot Kahna8akeng i pitc iji8ina8agobanen, epitc nanda8enindamo8agobanen kitci kikenimanitc Kije Maniton.
Pejik okima inotama8agoban Kaninkenanon [ 21 ] ki pi madjagoban, mina8atc dac ick8aiatc koki ki iji, ki pimi nanda-8abamagoban, ki pimi kakikimagoban Kije Maniton kitci manadjihanitc. Niso mitana dac pinagoban Kahna8akeng patcaiamianidji. Mi 8ak ikim ke 8idji8akik, ki inenindamoban ana8i-Katinin Tekak8ita, ka dac ki gackitosi, onzam ondjihi8enigoban o micomenjan cangeninda- ma8agobanen i pimi aiamia8agobanen Keiabatc dac ningotin ki piponici Tekak8ita. Ka iji pagosenimâtc Kije Maniton kitci iji 8itoka8enimigotc, o ki papamitagon dac Kije Maniton ka iji pagosenimâtc.
Katinin Tekak8ita 8itikikogoban Kahna8akeng epinigobanen : n8andagetc enenindaminitc 8itikik8an, mi i 8indama8âtc o nabeman, ot inan : ka na ki ta gackitosi kitci nanatc ni cimenj ondaje kitci pinatc ? — Ninga gackito, ot igon o nabeman, ki ga kitci 8itokagonan epitc songa aiamiâtc. Mi dac eji madjagobanen [ 22 ], o 8idji8igo nanint matci nato8e ka pi aiamianidji. Nanda8ata8eg8aban pekic Iskanetating anotc 8iiaki a8esinsi8aian, apiminik8aian gaie. Eni tag8icino8atc dac matci nato8enang, 8inimon endanitc dac pindike, kitci min8enindamon apitc 8aiabamigotc. Iskanetating nind ija pinama, ot inan, 8a8ibatc mina8atc ondaje ninga pimi ija ; papion gotc, ki gat ani 8idji8 ki8eiân. — Aï, mig8etc, ikito Katinin, acaie kata ino enenindamân. Mi gotc eji mâdjipatotc mekate8ikonaien endanitc ij a8i 8indama8âtc, ot inan : 8a8ibatc ninga madja kitci a8i tanakiiân endanaki8atc eiamiadjik, n’ose, ki pagosenimin kitci ojiton masinaigan, Kahna8akeng daje mekate8ikonaiek, ki ta inak kitci ca8enimi8atc, kitci kikinohama8i8atc. — Aiang8amisin, nind anis, ot igon, pakitinama8 Kije Manito kitci ca8enimik, kitci ani mino gana8enimik 8aki kitci otitaman endanaki8atc eiamiadjik. Gaie dac kakina ot iji kikinohama8an ket ani totaminitc. [ 23 ]
Keget acaie 8ibatc tag8icinon 8inimon Katinin, o pi 8idji8anini pejik 8itcki8enhian. 8aiabaninik dac, mi i pi madja8atc, pi madji8idjigani8i Katinin Kahna8akeng i pi ija8atc. Kekenindamo8atc indaje endanakidjik ij eka apisinik Katininan, ikito8ak : ojimo8itok sa koni. Mi gotc eji anokimo8atc kitci a8i 8indana8imintc o micomenjan. Pecotc daje anokigoban kije inini, apitci kitci nickatisigoban ka nondagetc ij inintc : ki ojimo kit ojimik8em. Mi gotc 8ibatc ij onackinatotc o packizigan, niso minak o pinaanan monz8asinin, mi dac i nosone8atc. 8a8ibatc ot atimine8an inim pemi 8idji8anidji ; ondjita nickatisi, ineninidam : ondjita ninga packiz8a.
Mamakatenindag8at ka iji8ebak, o ki kakiping8enigon Kije Maniton, ka8in o 8abamasi8an Tekak8itan, 8abamigogoban dac 8in ot ojimik8eman. Pagosenimagoban Kije Maniton kitci gana8enimigotc kitci eka nisita8inagosik o micomenjan [ 24 ]. 8enibikodjic ki gaganonitik, inenindam : kina8ickinani8anotok isa ij ikitonani8ang : ki ojimon, koni nongom acaie apitok. Mi dac 8endji ki8etc iki8enzi. Acaie 8in Katinin o kitci mamoia8aman Kije Maniton ka iji mino gana8enimigotc. Teg8icing dac Kahna8akeng, nictana acitc nis8i taso piponesigoban.
8inimon endanitc mi ij apigobanen Katinin ; mi gaie indaje ij apigobanen pejik ik8e apitci s8ang-aiamiagobanen, Anastazi ijinikazogoban. Mi aam kekinohama8agobanen ik8e8a mesa8enindaminigobanena aiamie8in. O mamakateniman Katinin epitc kakita8enindaminitc Anastazin i kakikik8enitc, a8acamenj ki min8enindam i 8abamâtc eji mino inatisinitc Kahna8akenanon. Onzam ima 8in matci-nato8enang mi eta maianatatinik enakamigatinigobanen, inenindamogoban : o ca8enima Kije Manito ondaje endanakinidji, ni ca8enimik [ 25 ]gaie nin 8aki pekatc i ki tag8icinan ondaje. Nin gat akokanitis dac ij apitc. Tasin kajigatinikin 8ibatc kekijeba8agatinikin a8i aiamiagoban aiamie miki8aming. Mi ako panima i sakahamogobanen ka ick8a anamensikenitc kakina mekate8ikonaie. Mi gaie 8enagocinigin min8agac ako aiamiagoban, naningotinon gaie kajigatinikin nonde ponitogoban ij inanokitc, Jezosan nanda8enimagoban endaje aiamiani8aninik, tanasak monjak gotc aiamiagoban, kakik maeka mika8enimagoban Kije Maniton, monjak tanasak 8idji8igogoban.
Kakik ainanokigoban pindikamik anotc kekocic, gaie ij ondamitâtc aiamie inanokig8aban tanasak Anastazin, mi gotc eta eji gaganoniti8agobanen epitc kakike mina8anik8enindaminitc s8ang aiamianidji. Pajik8atisik ij inenindamo8atc : ninga min8enindamiha Kije Manito, ka totamo8agobanen ka kitcit8a8isigobanenak epitc sakiha8agobanen [ 26 ]Kije Maniton. Mi gaie eji 8a8indamati8agobanen epitc manatak patato8in, epitc cingenindang Tebeniminang, gaie ij inenindag8ak kitci 8i 8anisidjikatek kekon ka iji patatinani8angin. Tasin maiani-kijigatinikin kopese8igoban, pinama ako kotakihitizogoban, nanekatcihitizogoban, 8in gotc tibina8e pasanjehotizogoban. Apitc dac k8apese8idjin i pimi 8indama8âtc Jezosan ot anokitaganini patato8inensan 8aiakickagogobanen, ma8igoban, ikitogoban : makatc ka totamân, i ki an8eta8ak ka kijenimitc, ningi nickiha ka iag8acimitc, ni kitci gitimagis, anin ke totamân kitci kakizomak ?
Mi dac i misa8enindang inenindam : kekona ki kikenimak Jezos kitcit8a Osti8ining. O 8indama8an dac k8apesendamagodjin enenindang. 8in dac o kikahaman apitcipanitc kitci kikenimanitc kitci pindikagonitc Jezosan. Apitci dac ki kitci aiang8amenindizo Katinin, inenindam : K8enatc apinas ninga 8a8ejitama8a [ 27 ] nindehing Tebenindang ni pimatisi8in. Apitc dac tebisenik mi dac keget i komini8itc. Ka8in a8iiak o ta ki tipatotansin epitc mina8anik8enindang ij apitagotc Jezosan. Nibina eiamiadjik a8acamenj o ki ondji misa8enindana8a komini8i8in i 8abama8atc Katininan epitc sakihanitc Jezosan Osti8ining. Apitc ka ocki komini8itc Katinin, mi dac gotc eta enenindang : ka8in ninga 8i nickihasi ce8enimitc, gena8enimitc, epita8itc. Kape nibin mi monjak enenindamogobanen ij ondamitatc.
Ka ick8a kitcit8a kijigak ka nipa aiamiani8ang, a8i anokig8aban mama8i 8inimon gaie o misensan o madji8inigon. Mi gotc pejik8an eji pimi pamenindamogobanen aiamie8in. 8ibatc gotc ako kikijeb 8anickagoban, kin8enj ako aiamiagoban. Mi gaie 8enagocinigin tcik sipins meg8e cingopika tcipaiatikokaikateni i 8asak8aigani8initc mitikon, kekape kijik ako mi endaje aiamiagobanen. Apitc [ 28 ]tebisenigin ij apitca kijigatinik apitc ako enamensikenitc otenang mekate8ikonaienidji, i p8ana8itotc kitci 8idji8epan mi dac 8endji pagosenimagobanen Anjeni8an pepagana8enimigodjin, inagoban : ni mino nind Anjenim, gaganotama8icin, ki ga tanis kin kitcit8a enamensike8ining, nin dac ni kitci gitimagis, ket nange ni gackito kitci a8i tanisiân, ondaje ma nind ap. Gaie naianage-kijigatinigin gaganomagoban 8atc-aianikinomadji, aiamie-nikamog8aban gaie ako, mizi kekon iji mamoia8aniag8aban Kije Maniton.
Epitc 8i nanekatcihitizogobanen Katinin, ningotin eta 8isinigoban kajigatinigin ; picicik 8iias midjigoban, ping8ikatamogoban ako ij inenindamogobanen : ka8in onzam menopog8ak ninga midjisin.
O min8enindana8a anicinabek8ek nopiming ij eka g8etc ningot inanokisik8a, mi eta monjak i magoce8atc. Ka8in dac 8in iim tisigoban Katinin, ka8in [ 29 ]min8adjitosigoban, cikatenindainogoban inenindamogoban : andapitcitok ke ki8e8angen ! ningat a8i anamika8a Jezos Osti8ining epitc, ninga 8idji8e ij anamensikani8ang, gaie i kakik8enani8ang. Mi gotc eta pejik men8enindamogobanen Jezosan ot ijit8a8inini. Acaie dac ani tag8icin Kahna8akeng cingopik tekonind8a, inenindam : mi acaie, ka8in 8ikat ningat a8i anokisi, acaie ka8in 8ikat ninga pake8inasi8a Jezos Tebenimiiamintc kitcit8a Osti8ining kaiazotc nina8int ondji.
Apitci akosigoban o mitonenindjiganing i nonda8âtc kekik8enigobanen mekate8ikonaienidjin, ka iapitc kotakiha8indibanen Jezos epitc ecitak8a8an8indibanen tcipaiatikong i 8i ag8aciminang anamakamik daje ickoteng gaie i cenamonang 8ak8ing. Kitci ma8igoban Katinin i kikenindang kakina ka pi tinigobanen Jezosan, inenindam : ninga kikina8eienima Jezos, ta masinate gaie ni [ 30 ]ia8ing minikik ke pimatisiân minikik ka aindota8intc i ki a8akadjigani8itc nin ondji. Mi sa ka totang Katinin, tanasak ki acitak8ahotizo Jezosan o tcipaiatikomining, i 8i kikina8eienimâtc. Mi ka ondji pajik8atisigoban a8acamenj kitci ani nanekatcihitizotc, o ki 8a8indamagon ma Anastazin eji animihitizo8agobanen ketcit8a8isigobanenak aiamie8ining ina kak, gaie epitc animisinani8ang anamakamikong, mi endaje kakike mok8akizo8atc ka an8eta8adjik Kije Maniton, eka aian8enindizosigok meg8atc aking pematisi8atc.
Apitci mamacka8enindamogoban animisi8ining inakak. Ningotin i kijigatinik mitigon ka8a8agoban, kaiasikâtc ka8isenigoban, mi eji tisonitizotc, ki teb 8animika8i kekat ka nipotc. Apitc dac meka8itc, ikitogoban : nonda8ag8aban pecotc endanisigobanenak, ij ikitotc : « mig8etc, Tebenimin, ki ca8enim i gana8enimin, kit inenim : keiabatc kata [ 31 ]pimatisi, kata nanekatcihitizo i ki patatitc.
Mina8atc kotak aiamie-miki8am ojitcikategoban otenang, nakickotatig8aban pejik Tanez ijinikazonigoban, tabiskotc anamikotati8ak, mi dac ekitotc Katinin : anditok inakak kitci api8ag8en ik8e8ak ? Mi ondi inakak, ikito Tanez. Ana8i, ikito mina8atc Katinin, « k8aiak8enindag8at nond ot iji min8enindan Kije Manito asin gaie napakisagon kitci miki8amika8intc, a8acamenj o min8enindan ij otehinani8ang kitci 8a8ejitama8intc kitci otapinasitc. Nin dac onzam ni gitimagis, kitci nibina ningi mi8inaja8a nindehing. K8atisiân ke pindikeiân aiamie miki8aming, ninda mi8inajaogo, k8atisiân indaje ket otapinasiân. »
Apitci mamakasita8agoban Tanez ekitonitc ot ang8eian, eji tabasenindamitehenitc. Acaie o mika8enindan eji animihigogobanen o mitonenindjigan ij inenindang : ka maci ni tibisat8asin ka iji [ 32 ]8an8indama8akiban Kije Manito meg8atc nopiming endanisiân, kekat iki nipoiânbân epitc pakateiânbân, i ki pimatisi8enimitc Kije Manito. Mitok k8aiak8enindag8atc nongom ot anonan Katininan, inenindam : o kat acihan, o ka 8itoka8an ke totamân apitci kitci song aiamiaiân. Tabiskotc dac 8a8indamatig8aban eijimamitonenindamo8agobanen. Mi dac apitci eji otang8ehindi8atc, monjak papa8idjindig8aban ako nopiming ij ondamita8âtc, aiamie ijit8a8in eta iji gaganonitig8aban. Gaie dac eno8ek naningotinon pangi i mijihigo8agobanen mejihi8emagakin, kakanzondig8aban eckam aiandj kitci macka8isi8atc kitci sakiha8âtc Kije Maniton. Mi dac keget ka to8âtc ; apitci ki kitci songa aiamiek.
Mi sa ka inenimâtc Kije Manito Katininan, mi ka iji macka8enindamihagobanen kitci eka 8ikat kekon cagotenimigosinik, misa8atc apitci kekon aianimatinikin endidjin. Keget isa animatinigoban [ 33 ] endogobanen. Ojikij8anigogoban o misensan kitci tipanote8isitc ; ikito8an : k8aiak8enindag8at kitci ca8enindagositc ni cimenj kitci 8itapimâtc ka na8anja8enimak, apitci ma song aiamie. Kakina gaie kina8int ki ga min8enindamin, nibina ki ga 8itokagonan. Kikenimagoban ana8i enenindaminitc o cimenjan epitc sanakisinitc kitci cagotenimimintc, epitc apitci macka8enindaminitc epitc songa aiamianitc, gaie i ki kijenindaminigobanen kitci eka 8ikat kikenindansinik 8itikendi8in. Eno8ek dac ka8in ana8enindjikesi ij inenindang : apitci ninga macka8is kitci ganonak, kitci kakanzomak ; koni kata ino enenindamân kimotc dac o ki gaganonan, ot inan : « ni cimenj, pizinda8icin enenindamân : keget isa apitci ki ca8enimigonan Kije Manito ondaje otenang i ki asinang, eiamiadjik endanaki8atc i pajik8atisi8atc aiamie8ining inakak ; ki ca8enindagos dac ondaje ij apin, ni min8enindam [ 34 ]gaie nin ij aiang8amenindizoian, ki sakihigok gaie kakina. Keiahatc dac pejik nind iji misa8enindam, mi dac keget acaie apitci kitci min8enindamân ij ineniminan kitci eka gitimagisisi8an kitci tipanote8isin. Mitonenindan dac, apitci mino inatisi ka na8anja8enimak ; kakina ma kikang8ak inenindagosik kitci tipan ote8isi8âtc kitci eka cagodjihigosik8a matci maniton. Onicicin dac gaie kin kitci kikina8eienimat8a. Ka8in onzam apitci songenindizoken kitci inenindaman : ninga gackito kitci cagodjihak matci manito ; monjak ki nopinanigonan ij ineniminang : ondjita ninga gackiha kitci 8aiejimak. Tep8eta8icin, Katinin, tabiskotc ki nim ninga kitci min8enindamin, acaie ma kekat kata kika, ninga gitimagisimin eka papamita8isi8an. Gaie kin, ki ga gitimagis nicike8isin, ningot anotc tiiâng 8aam ki nim. Ca8enindizon dac, ca8enimicinam gaie nina8int, tep8eta8icin eneniminân. » [ 35 ]
Ka8in o min8abandama8asi8an Katinin eji ganonigotc o misensan, ka8in ana8i ningot ikitosigoban. Mi eta ekitotc : mig8etc, ni misens, ce8enindamigano jian, apitci kitci animat nongom 8andama8ian, ninga mitonenindam isa eji 8indama8ian. Mi gotc 8ibatc mekate8ikonaien endanitc ij a8i 8indama8âtc enditc. — Onicicin isa ana8i enenimik ki misens, ot igon mekate8ikonaien, aiang8amisin isa, pakitinama8 Kije Manito. Kin8enj ki animitagosi mekate8ikonaietc i kakanzomâtc kitci papamitaminitc, keg inenindam : acaie ningi gackimatok, ka dac keget o ki gackimasin, taiag8atc ot ajite ganonigon, ot igon : o n'ose, kama8in ni gackitosin enenimigoiân, ketinange ni tibenindis kakina kiki memiji niia8 ningi tibenindamona Jezos ; 8in acaie nind apitci tibenimik, ka8in ninda makamasi mina8atc kotak kitci tibenindamonak. Ka8in ni gotansin pakate8in, ka8in ninga p8ana8ihasi [ 36 ]matci pak8ejiganic gaie matci 8abo8aianic kitci anokitageiân. K8aiak8enindag8atc ningat iji ca8enimik Kije Manito. Keget, ikito mekate8ikonaietc, a8acamenj dac ki ga mitonenindam.
Pitcinak dac pandiketc endatc ot animimigon o misensan kitci tipan ote8isitc. 8ibatc dac o kikenimigon kitci eka cagotinikatesininik o mitonenindjigan. Ot apenimonan dac Anastazin ij inenindang : ka8in ninga gackitosi nicike, mitok konike gackitoiân i 8itoka8itc Anastazi, inenindam. Ceck8at dac inenindam, ceck8at gaie i 8itokotati8atc Anastazi i 8i gackima8atc, ka8in nananj ki papamitansi Katinin. Kitci mamakatenindam Anastazi, inenindam : makatatc aian8eta8itc nongom, monjak ana8i ningi tep8etag. O nanibikiman dac, otinan : ninga 8indama8a kekinohamonang k’osinan. 8in ani nikani Katinin ij a8i 8indama8atc mekate8ikonaien ka iji nanibikimintc, ot inan : ca8enimicin, n’ose, [ 37 ]8itoka8icin kitci tibisat8aiân, Jezos ka iji 8an8indama8ak, kiki memiji mia8 i ki tibenindamonak. Ki pagosenimin kitci gaganonat8a Anastazi gaie ni misens kitci ponito8atc eji notc animimi8âtc.
Onicicin, nind anis, enenindaman, ikito mekate8ikonaietc, pekic dac kitci animat. Mi 8endji ineniminan keiabatc niso kon minikik ke mamitonenindaman iim ondji. Pakitinama8 Kije Manito kitci aiamiân, pagosenim kitci kikenindamonik ket ineniminok8en. Apitc dac ki kijenindaman, ki ga 8itoka8enimin, 8aki pekatc kitci inenindaman. Mig8etc, n’ose, ikito Katinin, ningat andj-mitonenindis, mi dac i sakahang. 8ibatc gotc koki a8i pindike. Acaie, n’ose, ikito, pina8igo eko kijenindamân ; ceck8at dac kitci mitonenindizoiân ; ondjita sa gotc Jezos Tebeniminang ningi na8anja8enima 8in eta kitci kakike-8itapimak. Mi dac ij inenindang mekate8ikonaietc : 8in koni Mino Manito ot inenindamihatoken. [ 38 ]Ot inan dac : ka8in ningot inenindanken, nind anis, acaie ningat inanoki ka ijijpagosenimin. Ka8in acaie ki ga kakanzomigosi kitci tipanote8isin. Mi apitc acaie i min8enindang Katinin, ka8in ningot inenindansi.
Pitcinak gotc ka sakahang Katinin, mi acaie i pindikegobanen Anastazi. N’ose, ot inan, ka8in papamitansi Katinin ij ana8i kakikimintc, inenindam : nin gotc eji min8enindamân, mi ke totamân. Ot ajitemigon dac mekate8ikonaien, ot igon : ni kikenindan, ki mamakatenimin dac kin ana8i acaie pina8igo eko aiamian, kit inenima dac : ka8in onicicinsinini enenindang Katinin ; ki 8anenindan na dac epitc kitcit8a8isi8atc eka kikenindansigok 8itikendi8in, Anjening sa inenindagosik. 8ibatc gotc o kikenindan Anastazi i 8anicing : keget, n’ose, ikito, ka8in ni nib8akasi, nind an8enindis dac ka totamân ; ninga kakizoma dac Katinin, meckot ninga 8itoka8enima enenindang. [ 39 ]
Kitci min8enindam dac Katinin ij eka ki gackihigosik matci maniton kitci cagodjihigotc. Mi dac a8acamenj i pajik8atisitc. Akosigoban ana8i, eno8ek dac keiabatc animihitizo anotc ij inanokitc gaie i kiigocimotc. Tek8akinik dac, apitc 8a madjanitc gena8enimigodji i 8i a8i anokinitc, ot ineniman dac mekate8ikonaietc kitci madjanitc gaie 8in. Koni ta mino pimatisi, ot ineniman. Mi dac i 8indama8âtc enenindang. Ot igon dac : k8aiak8enindag8at, n'ose, ta tebisimagat ni ia8 nopiming kitci apiân, o ka mikan ket iji nanda8enindamomagak ; meckot dac kata 8ij-8isini ni tcitcagoc, apitci ta manesi. Pikinong dac ta ino ondaje apiân, ta mina8anigosimagat ni mitonenindjigan Jezos tcik ositang. Misa8atc apitci 8ij-8isinimagak ni ia8, mi a8acamenj eji nanda8enindamân kitci aiacamâtc Kije Manito nitcitcagocan ot onicicihi8e8in, mi ket ondji pimatisiân.
Ka8in dac ki madjisi Katinin, kape [ 40 ]pipon otenang ki api, picicik anisabo ot ondatisin, akosigoban ana8i. Mi gotc pejik8an eno8ek eji nanekatcihitizotc ; epitc kotakihitizotc, a8atc gotc kinahamatizo kanake pangi menopog8atinik kitci midjitc ; mi eta men8enindang kitci animitotc 8i ia8 kitci kihigocimotc. Naningotinon gaie papasanjehotizo, gaie monjak pi8abik kaiajanik o kitcipizon endo8agobanen sa gotc ketcit8a8isigobanenak. Inenindamogoban : ni 8itoka8a Tebenimiiamintc i 8i 8anisitotc patato8in, mi iim eji mitonenindamogobanen. Iim apitc maneg8aban Kahna8akeng s8ang aiamiadjik ; ka8in acaie iji manadjinini8akisisig8aban eji manadjinini8a-kisi8agobanen i p8a maci sikahandazo8atc.
Acaie mina8atc tipatotag8atogoban mikati8in. O pi nand8e8ema8an Matci nato8ek Kabna8akenanon, inenindamok : ninga pi 8itokagonanik Kaninkenanonang. Ka dac ki papamitansik [ 41 ]Kahna8akenanokij ana8i igo8agobanen : a8asigotc eiamiaieg monjak aiamiak, ka8in ki gat ondamihisinonimin. Ka8in dac ki madjisik Kahna8akenanok. Apitci dac ki nickatisik matci nato8ek, ikito8ak : ki manenimigonanik ka naganinangok, ninda8atc dac pasanje8atak. Mi dac i ki papa aiakama8a8atc ; nibina o ki takona8a Kahna8akenano pepa anokinidji, mi dac i madjina8agobanen Matci nato8enang ij a8akana8âtc ij ine nima8âtc ; o ka pakitenindana8a ot aia mie8ini8a. Ka8in dac o ki gackihigosi8an, apitci mamacka8enindamok meg8e animisi8ining, ikito8ak i kotakihind8a : ca8enindizota, songa apenimota Jezos ot ijit8a8in kitci ondji nipong. Ka8in apakinitizosita anamakamikong.
Pejik, Etienn ijinikazogoban, gaganomagoban o 8itikemaganan mama8i i nanekatciha8ind8abanen : aiang8amisin, ot inan, pakitinama8 Jezos Tebeniminang ; 8ibatc kata kapitose eji animisian, meckot [ 42 ] ki ga kitci mina8as 8ak8ing. Apitc dac caie kekat kitci nipotc, o gaganotama8a nesigodji kitci an8enindizonitc gaie kitci aiamianitc. Mamakatenima8indiban epitc macka8enindamogobanen songa ij apenimogobanen, i tipaigegobanen aiamie8in. O ki papamitagon Kije Maniton ; kitci nibina Kahna8akeng ki ijag8aban kitci aimia8atc. 8ina8a dac a8acamenj ki pajik8atisig8aban nanekatcihitizo8ining. Ik8e8ak kakita8enindamobanek kitci mika8enindamo8atc ket ondji nanekatcihitizo8atc. Nanint apitci i kisinanik, konikang nipag8aban, nanint peponinikin ki8etinong 8endanimatinikin tcik akam sakaiganing daji aiamiag8aban. Pepejik eta aiog8aban okonasi8an papapakani8an. Nanint gaie anamisk8am kokig8aban. Pejik nisotibik minikik ki kak8ekigoban, kekat ka nipotc ka iapitc akositc.
Monjak aiang8amenimagoban Katinin ka totaminitc, ot ineniman dac mi a8acamenj [ 43 ] ke min8enindang Kije Manito, i kijikabamâtc kakina eindotaminitc eiamianidji. Acaie dac nisita8enindam epitc kotakihitizotc gaie 8in, Jezosan ondji ; o kikina8abama ka 8abamagobanena ij ana8i kazonigobanen. Ningotin kajigatinik Moniang ijagoban, aindaso kijik ki a8i tanisi. O mamakatenima 8abamâtc mekate8ikonaiek8ek enindjik ; o ki nand8enindan kitci kikenimâtc eji pimatisinitc. Ki 8indama8a dac, ina : kikang8ak ikim, apitci song aiamiek, 8ânatisibanek, kakina dac o ki pakitenindana8a, Kije Maniton o ki tibenindamona8an, o ki 8a8indama8a8an kitci eka 8ikat kikenindansik8a 8itikendi8in. Mi dac ka ondji aiamita8âtc eiamie-gana8abitc, mi ka ijihâtc ka iji 8abamat8a. 8ibatc inenindam : ninga kikina8eienimak. Teg8icing dac Kahna8akeng, o 8indama8an mekate8ikonaien, ot inan : nind inenindam kitci aiamita8ian, n’ose, aiamie-miki8aming kitci apitci ick8a8eiân i ki tibenindamonak [ 44 ] Jezos ni ia8, kakina gaie ni pimatisi8in. Ka8in gotc tec papamitansi mekate8ikonaietc, pinama o kak8edjikikeniman, keg dac apitc inenindam : 8in sa k8aiak Kije Manito ot iji pinahama8an o mitonenindjiganining. O ca8eniman dac, ot aiamita8an Mani ketcit8a8inintc pepong. Apitc dac cekamonintc kitcit8a Osti8inan, mi apitc 8aia8indama8âtc Kije Maniton kitci eka 8ikat kikenindansik 8itikendi8in. O pagoseniman kitcit8a Manin, ikitogoban : pagosenim ki k8isis kitci iji ca8enimitc, nongom eji kijenindizoiân i 8i kikina8eieniminan ket ako pimatisi8ânen. Kin8enj aiamiagoban ; 8i ia8 eta ot apitci tanenindan aking, o tcitcagocan dac tanasak 8ak8ing api8an. Mi kakik eta enabigobanen, tanasak o mindatan epitc mina8anig8atinik indi 8ak8ing i tanisitc ondaje aking.
Mi dac nanage ij akositc, ka dac 8ikat apitci ki ondji mino pimatisisi ; monjak [ 45 ]cicikako8e, gaie monjak pangi kijizo. Apitci sakihagoban Kije Maniton, mi monjak eji mitonenindamogobanen i nokitehenitc epitc kije8atisinitc, kakina anicinabe i pimi caca8enimanitc. Mi eta apitci eji min8enindamogobanen apitc genonadjin Kije Maniton, tanasak gaganoniti8atc mi epitenindamogobanen epitc kitci nibina minagobanen Kije Manito o mitonenindjiganining. Mi gotc eta eji otang8eindi8agobanen Tanezan gaie Anastazin, kakina tabiskotc iji song aiamiag8aban. Mi gotc eta monjak eji tipatotamo8agobanen ka iji ca8eniminang Jezos epitc sakihinang kitcit8a Osti8ining, gaie ka iapitc animisitc kina8int ondji i ki nipotc gaie tcipaiatikong. Tasin kajigatinigin migotc pejik8an endotang, kakin8enj aiamiagoban aiamiemiki8aming. Keg apitc, meg8atc ij aiamiâtc tanasak ki nipo. Ka kanake mamadjisigoban, mi eta gotc eji kikenindagosigobanen ejisenigobanen o mitonenindjigan [ 46 ], ma8igoban, monjak takonagoban tcipaiatikonsan, mi iim ondji eckam monjak i mika8enimâtc ka iapitc kotakihimintc Jezosan Tebeniminangon anicinabek ondji. Nanengim ana8i komini8igoban, iim dac apitc ningotin i cakamonintc kitcit8a Osti8inan, mi ij andj kijenindang ij inenindang : ninga song mamoia8ama Jezos kitcit8a Osti8ining, ninga kikina8eienima tcipaiatikong ij acitak8aigani8itc. Mi dac apitc a8acamenj i kotakihitizotc ij o8iia8itc. I piponinik cacakinisit nopiming ako a8i manisegoban. O 8a8indamagon Anastazin epitc mamacka8enindaminigobanen ketcit8a8isinigobanena aiamie8in ka ondji nanimindji, ikitonigoban : mi dac keget nibina ka ianimisidjik mi dac gaie a8acamenj mena8asidjik nongom 8ak8ing ikim ka iji pimatisidjik, ikito8an. 8in dac Katinin ka kekon ikitosi ; mi dac tebikatinik apitc kakina ka nipanitc, 8in dac gotc kijabikite mokoman aiakonamatizo [ 47 ] o siting gaie o kating ij menindang : ni kikina8eienimak aiamie8in ka ondji nanindjik. Mina8atc dac mi eji madjâtc i nanâtc minensakanjin, o ki nipaganikotatizonan ka totamo8agobanen nanint ketcit8a8isigobanenak, nisotibik dac mi indaje i cingicinogobanen, k8aiak8enindag8atc apitci ki kitci animisigoban. Apitci gaie ana8i aiang8amigoban kitci eka a8iian kikenimigosik enanokitc inenindam : 8in gotc eka nicike o kikenindan Kije Manito. O kikenimigon dac ot ang8eian Tanezan. Ang8e, ot igon, kit oionzamis eji animihitizon, onzam ki totatis, ki patat kin gotc i kikahamatizon, ka8in dac ki 8indama8asi k8apesendamok. Ondjita kitci kock8enindam Katinin ij inintc : ki patat, epitc apitci gotamogobanen kitci patatitc. 8ibatc gotc o 8indama8an mekate8ikonaien, ot inan : ca8enimicin, n’ose, ni kitci giti magis, nipataindint, ki ki katamon ka totamân. Keget, ot igon, ka8in onicicinsinon [ 48 ] ka totaman, 8ibatc dac ickoteng apakic minensakanjik ka nipaganikotatizoianik, gaie dac ka8in 8ikat mina8atc totanken. 8ibatc o ki tep8eta8an, ket nange 8ikat an8eta8agoban Kije Maniton enokita8anidjin.
Nijo kizis dac apitci ki akosi, ki 8isakenindam. 8aki gotc pekatc animisigoban, mi gotc pejik8an eji mino inenindamogobanen, kape kijik, kape tibik gaie cingicin, ka8in gackitosigoban kitci mamadjitc. Pakitinama8agoban Kije Maniton endogobanen, acitenindamogoban ot animisi8in ot animisi8inining Tebeniminangon. Ondjita songa nanda8enindamogoban ka iji 8a8indamonang Jezos, apitci macka8isigoban gaie i pejiko sakihagobanen. Ma8igoban pekic ij aiamiâtc, mi 8endji ma8igobanen anicinabe ondji i ki nickihanitc Kije Maniton. Misa8enindamogoban ij inenindang : kekona kakina tibisat8aiân ot inenindamo8in Kije Manito. Apitci gaie sakibagoban [ 49 ]kitcit8a tesanak8e Manin nakanenindagosinidjin meg8e 8ak8ing endanakidjik. Tasin kajigatinikin aindasin aianamika8agoban, aindasin ick8akindamogoban nabo8e8in Mani kitci mamin8adjimintc Tebenimiiang, ca8enimicinam. Eckam aiang8amenindamogoban kakina kijikon apitc ako tebisekin i kitcit8a8inintc Mani.
Acaie eckam ij ani macka8i-akositc, misa8enindam kitci pindikagotc Kije Maniton. Cingopik dac tekonind8a apitc, o ki câkamonan mekate8ikonaietc kitci aiamie-na8aponitc. Ka nijokonagatinik dac Aianjenikijigak iim kitcit8a ningo manadjitaganing, ot ineniman kitci aiamie nominâtc. Ot ikon dac : panima 8abang, ka8in nongom ninga niposi. Keget dac panima 8aiabaninik aiamienomina, ka8in acaie g8etc gackitosigoban kitci animitagositc, o mitonenindjiganing gotc eta aiamiagoban, icpiming 8ak8ing inak8indeni8an ockinjikon [ 50 ]. Monjak ana8i mika8i, o pimi pakitenindan aking, apitci gaie songikamogoban ij akositc. Eni ki8eiasaminik ki animitagosi, aindasin gotc o ki 8inan Jezosan gaie Manin. Mi apitc acaie eni pon nesetc, nictana acitc ne8 endaso piponagak eko ki nikigobanen.
Kakina mamakasina8ag8aban epitc k8enatci8ing8etc, pikinong ijing8egoban meg8atc i pimatisitc onzam iki kotakihitizogobanen. Nij 8emitigoji8ak, 8ajackang ondjipag8aban, patc aiamiadjik Kahna8akeng, mi ij a8i pindike8agobanen ij atenik 8i ia8 Katininiban. O mamakasina8a8an epitc k8enatci8initc, inenindamok : nipe. Ka saka hamo8atc dac i tipadjimo8atc, ikito8ak : ningi 8abamanan kikang i nipâtc, ka8in koni ningotiji a8iiak iji nagosisitok, mi dac i 8indama8ind8a, ina8ak : mi iaam kitcit8a kikang, nongom g8etc ki nipo. Kitci mamakatenindamok, mi gotc koki 8ibatc ij a8i pindike8atc i cingicininitc, o nipak8ita8a8an [ 51 ], o 8abama8an gaie o pagosenima8an kitci gaganotamago8atc. 8ina8a gaie anokimo8ak kitci mitigo8acikazonitc apitci k8enatc mitigo8ac kitci atenik 8iia8ini, inenindamok : ninga kikenindamonanan epitc kitcit8a8enimangitc.
8a8ibatc ka nipotc Katininiban, Kije Manito ki inenindam : o ka kikenima8an anicinabek, o ka sakiha8an. O ki caca8enima pegosenimanidjin kitci 8itokagonitc. 8ibatc kakina ki kikenindag8at, Moniang, Opitik8eiang gaie ondjipag8aban patc aiamiadjik i ki ning8ahakatenigobanen 8iia8, anotc aiakosidjik. 8ibatc dac kikehagoban Kije Manito pegosenimanidjin kitcit8a kikangobanen.
Pejik mekate8ikonaiegoban de la Colombière ijinikazogoban, Opitik8eiang apigoban, o ki masinatan ka togobanen ij inenindamogobanen kakina kitci kikenindag8ak kitci sakihintc Katinin. 8in animitagosi o masinaiganing, ikito : nano kizis minikik apitci nind akosinaban, ni [ 52 ]kijiz8apinenaban gaie monjak ni caboka8isinaban, ceck8at anotc, mizi mackiki ij ana8i minahi8atc nandokonini8ak ; ka8in ningi gackihigosik kitci kikehi8atc, apitci ningi ana8enindjikemigok. Mi apitc ka nondageiâng i mamakatenindag8ak einok8en ij atenik 8iia8 i ki ning8ahakazotc Katinin Tekak8ita. Mi dac ka inenindamân : ningat a8i pagosenima i ki 8indamagoiân epitc kitci8a8isigobanen ; mi dac acaie i 8an8indama8ak, kicpin 8itoka8itc, Kahna8akeng kitci a8i tag8icinan kitci a8i anamikamân 8iia8 ij atenik ning8ahakaning. Mi dac i nanda-8abamak ket anonak kitci iji8ijitc Kahna8akeng. Apitc dac acaie anokimoiân kitci madji8inigoiân, mi gotc eji ponisiiân i caboka8isiânbân, mi ij apitci ponisiiân. Mi dac 8endji ki masinahamân ka tiiân, ningi inenindam: kakina kitci kikenindag8ak epitc sakihâtc Kije Manito inim kitcit8a kikang8an, ka8in ot an8eta8asi8an geganotama8anidjin epai8eienimigodjin. Ningi inenindam [ 53 ]gaie : mi iim ket iji mamoia8amak Katinin Tekak8ita i ki ca8enimitc.
Moniang, 14 septembre 1696.
Nin J. de la Colombière,
Opitik8eiang daje mekate8ikonaie8iiân.
Mina8atc kotak, okima dac 8eckinikidji papami8inagoban Katanak8ing 8ekima8igobanen, Du Luth ijinikazogoban, o ki masinahan gaie 8in ka togobanen. Ioom ikito o masinaiganing, 8in animitagosi, ikito : nictana acitc niso pipon minikik nind akosinaban ni kat. Pitcinak dac niso kizis8agat eko ki kikeiân. Mi ioom ka ingi : ningi apenimona Katininiban kitci-song-aiamiapan, Kahna8akeng ki daje nipo ; ningi 8a8indama8a kitci a8i 8abamak, kitci a8i anamika8ak ij atenik 8i ia8 ning8ahakaning kitci ca8enimitc tci gaganotama8itc kitci kikehitc Kije Manito, ningi anokitn gaie cangaso kon minikik kitci gaganotamagoiân ij atenik 8i ia8 ning8ahakaning tci daje aiamia8atc ke gaganotama8idjik. Tebisek [ 54 ] dac i cangaso kijigak, mi acaie i 8anitoiân ij akosiiânbân ni kat, ka kanake pangi nind akosisinaban.
Mi 8endji atoiân nind inonzo8in,
du Luth, Capitaine de Marine.
Katanak8ing, 15 août 1696.
Mi minikik mesinatek Katinin Tekak8ita ot inatisi8in. Mi eta gotc ondjita ketci inenindag8akin ka pi ainditc. Apitci ta kitci manet kakina nanakatc tipatotag8atinik ; nibina ka8in masinatesinon, gaie ka iji mamanda iji8ebak ij atenik 8i ia8 ning8ahakaning. Ca8enindagosik dac gaie 8ina8a niina anicinabek ; ot indana8an gaie 8ina8a ketcit8a8isinidjin 8atc-ijinagosima8adjin. Mi i kikenindamo8atc, ka8in o nakika8enimasi8an Kije Manito, mi keiabatc epitc sakihâte kicpin aiang8amenindizonitc, kicpin pimi tibisat8anitc eji kikahamonang. Kekona dac kikina8eienima8atc kakina niina anicinabek epitc mino inenindamogobanen Katinin Tekak8ita gaie epitc gotamogobanen kitci an8eta8atc Kije Maniton, mi ket ondji 8itc-mina8asima8atc kakikekamik 8ak8ing. Kekona ki ingi.