Biblia/Vetule Testamento/Samuel/2 Samuel 5

←Capitulo 4

Le Biblia in Interlingua Samuel

Capitulo 6→

2 Samuel

5

David deveni rege del integre Israel

¹Tote le tribos de Israel veniva a David e le diceva: “Ecce, nos es tu proprie carne e sanguine. ²In le tempores passate, quando Saul esseva nostre rege, tu esseva le ver conductor de Israel. Le Senior te diceva: “Tu pascera mi populo Israel; tu essera le conductor de Israel”. ³Quando tote le seniores de Israel veniva incontrar le rege a Hebron, Rege David faceva un pacto con illes coram le Senior. Illes consecrava David qua rege super Israel. ⁴Quando ille incipeva regnar, su etate esseva de trenta annos e su regno durava quaranta annos. ⁵In Hebron ille regnava super Juda septe annos e sex menses, e in Jerusalem ille regnava trenta-tres annos super le integre Israel e Juda.

⁶Deinde le rege e su homines avantiava verso Jerusalem contra le jebuseos qui viveva in ille region. Le jebuseos diceva a David: “Nunquam tu potera invader iste placia. Mesmo le cecos e le claudicantes te repellera e dicera: ‘Tu non potera invader iste placia.’”. ⁷David, tamen, capturava le fortalessa de Sion (illo es, le urbe de David). ⁸David diceva in ille die: “Quicunque attacca le jebuseos debe attinger ‘le claudicantes’ e ‘le cecos’ que es le inimicos de David per le tunnel del aqua”. Isto es le ration como le proverbio dice: “Le cecos e le claudicantes non entrara in le palatio”.

⁹Assi David faceva ille fortalessa su habitation e lo appellava le urbe de David. Ille pois extendeva le urbe, incipiente ab le terrassas de supporto ad intro. ¹⁰Le poter de David cresceva semper plus, quia le Senior, Deo del universo, esseva con ille.

¹¹Rege Hiram de Tyro mandava messageros a David, insimul a trabes de cedros, carpenteros, e masones. Illes edificava un palatio pro David. ¹²David comprendeva assi que Deo le habeva confirmate qua rege super Israel e ille habeba benedicite su regno pro Israel, su populo. ¹³Depost haber se transferite ab Hebron a Jerusalem, David se maritava con plure concubinas e uxores, e illes habeva altere filios e filias. ¹⁴Istos es le nomines del infantes que ille generava in Jerusalem: Shammua, Shobab, Nathan, Solomon, ¹⁵Ibhar, Elishua, Nepheg, Japhia, ¹⁶Elishama, Eliada, and Eliphelet.

David vince le philisteos

¹⁷Quando le philisteos audiva que David habeva essite consecrate rege super Israel, tote illes ascendeva pro querer David. Quando David audiva re isto, ille descendeva in le fortalessa. ¹⁸Le philisteos, ergo, veniva e se dispergeva in le vallea de Rephaim. ¹⁹Alora David consultava le Senior e le diceva: “Deberea io marchar contra le philisteos? Esque tu los delivrara a me?”. Le Senior respondeva a David assi: “Marcha contra illes, quia certo io te delivrara le philisteos”. ²⁰Assi David marchava contra Baal Perazim e les batteva ibi. Inde ille diceva: “Le Senior lo faceva! Ille irrumpeva contra mi inimicos e les divideva sicut un indundation”. Propter isto ille appellava celle placia Baal Perazim. ²¹Le philisteos relinqueva ibi lor idolos, e David e su homines los confiscava.

²²De post non multe tempore, tamen, le philisteos retornava e se dispergeva in le vallea de Rephaim. ²³Alora David consultava itero le Senior pro saper lo que ille haberea debite facer. Iste vice le Senior le diceva: “Non marcha directemente contra illes, ma gira retro a illes e attacca les ab le arbores de poplo. ²⁴Quando tu audi un sono como de pedes marchante in le summitate del poplos, sta allerte! Illo essera le signal que le Senior se move ante te pro percuter le armea del philisteos”. ²⁵Ita, David faceva lo que le senior le habeva commandate, e percuteva le philisteos ab Gibaon usque a Gezer.