Biblia/Vetule Testamento/Psalmos/Psalmos 92

Psalmos

92. Il es bon render gratias al Senior

Le psalmista lauda Deo proque ille causa le disfacta del malfactores e vindica su fideles.

¹Un psalmo. Un cantico a emplear pro le die del Sabbato. Il es bon render gratias al Senior e cantar laudes a tu nomine, oh Deo altissime. ²Il es bon annunciar mane tu misericordia e tu fidelitate durante le nocte, ³con le accompaniamento de un un instrumento a dece chordas e de un lyra, con le accompaniamento del tono mediative del harpa. ⁴Quia tu, oh Senior, me delectava con tu obras. Io cantara con gaudio propter tote lo que tu ha facite. 9⁵Quanto magnific es tu obras, oh Senior! E quanto profunde es tu pensamentos! ⁶Solmente un persona insipiente poterea miscognoscer isto. ⁷Quando le peccatores germina sicut herba e le malfactores floresce, il es pro le proposito de esser annihilate pro semper. ⁸Tu tamen, oh Senior, regna exaltate pro semper. ⁹Quia ecce tu inimicos, Senior, ecce tu inimicos: illes certo perira. Omne malfactores essera dispergite. ¹⁰Tu tamen, me rendeva simile a un bove salvage. Tu me consecrava^[1] con le oleo le plus fin. ¹¹Mi oculos videva le ruina de mi inimicos qui voleva facer me cader in imboscadas. Mi aures audiva le disfacta de mi oppositores maligne. ¹²Le justos, tamen, floresce sicut palmas; illes cresce in alto como le cedros del Libano. ¹³Illes esseva transplantate in le vestibulo del domo del Senior. Illes cresce in le cortes de nostre Deo. ¹⁴Illes fructifica mesmo durante lor vetulessa; illes remane ubere e vital e ha multe folios. ¹⁵Assi illes proclama que le Senior, mi Protector, es juste e in ille il ha nulle iniquitate.

Notas

1. O “ungueva”.