Biblia/Vetule Testamento/Psalmos/Psalmos 24

←Psalmos 23

Le Biblia in Interlingua Psalmos

Psalmos 25→

Psalmos

24. Al Senior pertine le terra e tote lo que illo contine

Le psalmista affirma le regalitate universal del creator soveran, e rememora a su populo que solmente personas moralmente pur es qualificate a render culto a ille. Pois le psalmista celebra le splendor de Deo sicut un rege guerrero victoriose.

¹Un psalmo de David. Al Senior pertine le terra e tote lo que illo contine, le mundo e toto lo que lo habita. ²Pois que ille poneva le fundamentos del terra in le mares e lo edificava ab le profunditates del oceanos^[1].

³Qui pote ascender al monte del Senior? Qui pote star in su loco sancte? ⁴Solmente illes, cuje manos e cordes es pur; illes qui non adora^[2] idolos e qui compli fidelmente lor promissas^[3]. ⁵Solmente tal personas recipera le benediction del Senior e essera declarate juste per Deo, lor salvator. ⁶Le generation de illes qui quere su favor es characterisate de tal puressa e te adora in tu presentia ipse, oh Deo de Jacobo. [Interludio].

⁷Aperi vos, portas antique! Aperi vos, ostios eterne! Face entrar le Rege gloriose^[4]! ⁸Qui es iste Rege gloriose? Ille es le Senior, forte e potente, le Senior, invincibile in guerras. ⁹Aperi vos, portas antique! Aperi vos, ostios eterne! Face entrar le Rege gloriose! 24:10 Qui es iste Rege gloriose? Le Senior del armeas celeste: ille es le Rege gloriose.

Notas

1. O “super le fluvios”, “in le currentes del oceano”.
2. O “eleva lor anima a”.
3. O “qui non dice mentitas”.
4. O “majestose”.