Biblia/Vetule Testamento/Psalmos/Psalmos 17

←Psalmos 16

Le Biblia in Interlingua Psalmos

Psalmos 18→

Psalmos

17. Oh Senior, considera mi juste causa

Le Psalmista pete a Deo de intervenir in su favor quia su vita es menaciate de periculose inimicos. Ille face un appello al justitia divin quia ille es certe de su innocentia e ille se expecta de incontrar Deo e reciper te ille un assecuration.

¹Precaria de David. Oh Senior, considera mi juste causa. Presta attention a mi deprecation. Audi le precaria que sincermente^[1] io te offere. ²Face un juste decision in mi favor. Decide lo que es juste. ³Tu ha perscrutate mi motivationes interioɽ^[2], tu me ha examinate^[3] durante le nocte. Tu me ha attentivemente evalutate, ma tu non trovava in me ulle transgression. Mi determination esseva de non dicer alco de peccaminose. ⁴Io sequeva tu commandamentos e isto me preservava de sequer gente violente e prave. ⁵Mi pedes se tene firmemente sur tu semitas. Io non devia de illos.

⁶Io te invoca quia tu me exaudi, oh Deo. Inclina a me tu aures e exaudi mi parolas. ⁷Monstra me tu misericordia in manieras admirabile. Per tu grande potentia tu salva illes qui quere protection de lor inimicos. ⁸Custodia me, como tu custodia le pupillas de tu proprie oculos. Protege me sub le umbra de tu alas. ⁹Protege me del homines malefic que me attacca, del inimicos homicida que me circumfere. ¹⁰Illes ha nulle scrupulos^[4]; illes parla con arrogantia. ¹¹Illes me ha traciate e circumferite; illes intende facer me cader in terra. ¹²Ille es sicut un leon que vole diveller su preda a pecias, sicut un leonetto que se quatta in locos celate. ¹³Surge, oh Senior! Pone te coram lor facie e face les cader sur su genus! Emplea tu gladio pro salvar me ab iste homines prave. ¹⁴Oh Senior, emplea tu potentia pro salvar me de iste assassinos, del homicidas de iste mundo. Illes gaude de lor prosperitate; tu les satia con le ricchessas que illes desira. Illes ha multe infantes e relinquera lor benes a lor descendentes. ¹⁵Io te videra quia io es un homine juste. Quando io me eveliara, io te videra facie a facie e io essera satisfacite.

Notas

1. Litt. “sin labios de deception”
2. O “mi corde”
3. O “tu me visitava”
4. O “Lor cordes es callose”