Biblia/Vetule Testamento/Psalmos/Psalmos 141

Psalmos

141. Senior, io te clama

Le psalmista pete a Deo de proteger le ab le peccato e ab le machinationes de peccatores.

¹Un psalmo de David. Senior, io te clama. Hasta te venir in mi adjuta. Presta attention a mi voce quando io te clama. ²Accepta mi oration sicut incenso que ascende a tu presentia e le elevation de mi manos como un sacrificio vesperal. ³Oh Senior, pone un custode a mi ore e vigila quando mi labios se aperi pro parlar. ⁴Non permitte a mi corde de exprimer mal parolas e ordir machinationes impie insimul a gente qui opera iniquitates. Io non mangiara lor delicatessas. ⁵Que le justes me percute misericordiosemente e me corrige. Que le oleo perfumate del peccatores nunquam ungue mi capite^[1] e que mi orationes constante sia un testimonio contra lor malitia^[2]. ⁶Le peccatores essera jectate in un precipitio per lor rectores^[3]: si solmente illes habeva ascoltate mi suave parolas! ⁷Sicut le aratro frange le terra, le ossos del peccatores essera dispergite al imbuccatura del inferno^[4]. ⁸Quia mi oculos es fixate super te, Senior. Apud te io me refugiava: non exponer me al periculo. ⁹Protege me ab le insidias que illes disponeva pro sasir me e ab le trappas que malfactores celava ab mi oculos. ¹⁰Que le peccatores cade insimul in lor mesme retes, ma face me escappar de illos.

Notas

1. O “le reproches del justes essera como preciose oleo calmante sur mi capite”.
2. Le lamentation del psalmista super le actiones mal del peccatores (vide v. 4) es un testimonio contra illes in le corte de Deo.
3. O “judices”. Le structura original de iste phrase es multo difficile a comprender e illo ha suscitate interpretationes differente.
4. O “Sheol”, le mundo del mortos.