Biblia/Vetule Testamento/Proverbios/Proverbios 17

Le Proverbios

Capitulo 17

¹Il es melior un crusta sic de pan ubi il ha pace quam un domo plen de festinos e plen de conflictos.

²Un servitor sapiente dominara super le filio dishoneste^[1] de su patron e condividera le hereditage del altere fratres^[2].

³Le crucibulo servi pro refinar le argento, e le furnace es pro le auro, in le mesme maniera le Senior pone a proba le corde human.

⁴Qui age malignemente presta attention al commatrages^[3]; mentitores gaude in audir maledicentias.

⁵Qui disprecia le pauperes contemne lor Factor; quicunque se allegra del ruina de altere personas non remanera impunite.

⁶Le granfilios es le corona de gloria del seniores e le gloria del filios es lor genitores.

⁷Parolas eloquente non conveni al folles, e mentitas non conveni al gentilhomines^[4].

⁸Le offerta a scopo de corruption es simile a un incantamento pro un corruptor: ille es certe de succeder.^[5]

⁹Qui cela un offensa, quere amicitate, ma qui semper lo mentiona, ruina le relation^[6].

¹⁰Un correction face un plus grande impression super un persona clarividente que cento colpos de flagello sur le dorso de un persona stulte.

¹¹Personas maligne semper quere rebellion, talmente que un messagero^[7] crudel essera mandate contra ille.

¹²Il es melio pro un persona incontrar un ursa matre derobate de su ursinos, que incontrar un folle in su stultitia.

¹³Si vos repaga le bon con le mal, le mal nunquam recedera de vostre domo.

¹⁴Initiar un altercation es como aperir un esclusa, assi desere un contention ante que illo se exacerba.

¹⁵Qui justifica le culpabile^[8] e qui condemna le innocente^[9] - ambes es un abomination pro le Senior.

¹⁶Ad quid servi haber moneta in mano pro emer sapientia, si le capite^[10] es vacue?

¹⁷Un amico ama in omne circumstantia, ille nasceva pro esser te un freare in tempores de angustia.

¹⁸Il es stultitia render se garante del debitas de un altere persona e pagar le caution pro uno que on non cognosce ben.

¹⁹Quicunque ama altercar ama le peccato; quicunque edifica alte muros quere infractiones.

²⁰Qui ha un corde perverse non prosperara e qui decipe con su lingua incontrara^[11] solmente penas.

²¹Qui genera un filio stulte, genera amaritude, e le patre de un imbecille ha nulle gaudio.

²²Un animo gaudiose es un bon pharmaco, ma un spirito triste desicca le osteos.

²³Un persona maligne recipe secretemente le precio del corruption pro perverter le via del justitia.

²⁴Le sapientia reluce super le facie del prudentes, ma le oculos del stultos erra usque le confinios del terra.

²⁵Un filio stulte causa le ira de su patre e le dolor del matre que le parturiva.

²⁶Il es terribile punir personas juste, e verberar personas honorabile^[12].

²⁷Le persona vermente sage modera su parolas, e qui sape remaner calme demonstra discernimento.

²⁸Mesmo un persona stulte que remane silente es reputate sage, e qui retene su lingua es reputate intelligente.

Notas

1. O “un herede que se comporta vergoniosemente”.
2. O “insimul a su parentes” (de su patron).
3. O “mal consilios”.
4. O “principes”.
5. O “ille succede in quecunque ille face”.
6. O “separa intime amicos”.
7. Ille pote esser le executor del judicamento, un angelo de Deo, o un mal situation ipse.
8. O “le impio”.
9. O “le justo”.
10. O “corde”.
11. O “cade in le mal”.
12. O “principes recte”.