Biblia/Vetule Testamento/Nehemia/Nehemia 8

←Nehemia 7

Le Biblia in Interlingua Nehemia

Nehemia 9→

Nehemia

8

Le populo audi attentivemente le lectura public del Lege

¹Quando arrivava le septime mense e le Israelitas esseva establite in lor citates, tote le populo se congregava in le placia que esseva ante le Porta del Aquas. Illes peteva a Esdra, le scriba, de apportar le libro del Lege de Moses que le Senior habeva prescribite a Israel. ²Assi, Ezra, le sacerdote, apportava le Lege coram le multitude, que includeva homines, feminas e tote le infantes que poteva comprender lo que illes audiva. Isto eveniva le prime die del septime mense. ³Assi ille lo legeva in le placia que esseva ante le Porta del Aqua, de mane usque a medie die, prospicente homines, feminas e tote le infantes que poteva comprender. Tote le populo audiva attentivemente le lectura del libro del Lege.

⁴Ezra le scriba stava super un un rostro de ligno que habeva essite facite ad hoc. A su dextera stava Mattithiah, Shema, Anaiah, Uriah, Hilkiah, e Maaseiah. A su leve stava Pedaiah, Mishael, Malkijah, Hashum, Hashbaddanah, Zechariah, e Meshullam. ⁵Ezra aperiva le libro coram omne le populo. Quando illes le videva aperir le libro, omne le populo se levava stante.

⁶Inde Esdra benediceva le Senior, le magne Deo, e omne le populo respondeva: “Amen! Amen!” elevante lor manos. Inde illes se inclinava e adorava Deo pron per terra.

⁷Le Levitas —Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, e Pelaiah— inde erudiva le populo in le Lege durante que omnes remaneva in lor placia. ⁸Illes legeva ex le Libro del Lege de Deo e explicava clarmente le signification de lo que esseva legite, adjuvante le populo a comprender cata un passage.

⁹Inde Nehemia le governator, Ezra le sacerdote e scriba, e le Levitas que instrueva tote le populo, les diceva: “Iste die es sanctificate al Senior nostre Deo! Non luge o plora in un die como isto!”. De facto, le populo plorava durante que illes audiva le parolas del Lege”.

¹⁰Nehemia prosequeva dicer: “Vade e celebra con ric nutrimentos e dulce bibitas, participante alimentos con illes que non preparava alco, quia iste die es sancte ante le Senior. Non sia triste, quia le gaudio del Senior es vostre fortitude!”. ¹¹Anque le Levitas quietava le populo, dicente les: “Tace e non dole, quia isto es un die sancte!”. ¹²Assi omne le populo prendeva congedo pro mangiar e biber un repasto festive, proque illes habeva audite le parolas de Deo e los habeva comprendite.

Le Festa del Tabernaculos

¹³Le secunde die del mense, le capites del familias de tote le populo, insimul al sacerdotes e al Levitas, se incontrava con Ezra le scriba pro approfundar le parolas del Lege. ¹⁴Durante que illes studiava le Lege, illes discoperiva que le Senior, per le medio de Moses, habeva commandate que le Israelitas debeva habitar in tabernaculos durante le festa del septime mense. ¹⁵Ille habeva dicite que illes debeva facer un proclamation per tote lor citates e in Jerusalem, dicente al populo de vader per le montes e colliger brancas de olivo, myrto, palma, e de altere arbores foliacee. Illes debeva emplear iste brancas pro facer se tabernaculos in le quales viver durante le festa, como prescribite del Lege. ¹⁶Assi le populo sortiva e taliava brancas e los empleava pro facer se tabernaculos erigite super le terrassas de lor domos, in lor cortes, in le corte del Templo de Deo, o in le placias intra le Porta del Aquas e le Porta de Ephraim. ¹⁷Ergo, tote illes que habeva retornate del captivitate viveva in iste tabernaculos durante le festa, e omnes esseva plen de grande gaudio! Le Israelitas non habeva plus celebrate isto desde le dies de Josua, filio de Nun.

¹⁸Ezra legeva ex le Libro del Lege de Deo in cata un del septe dies del festa. Inde, le octave die, illes conveniva pro un solemne assemblea, sicut il esseva prescribite del Lege.