Biblia/Vetule Testamento/Nehemia/Nehemia 4

←Nehemia 3

Le Biblia in Interlingua Nehemia

Nehemia 5→

Nehemia

4

Ancora opposition al reconstruction

¹(3:33)^[1] Ora, quando Sanballat audiva que nos reconstrueva le muro, ille irasceva e esseva multo disconcertate. Ille derideva le Judeos, ²e, in presentia de su amicos e le officieros del armea samaritan, ille diceva: “Que pensa facer iste imbecille judeos? Esque illes crede de poter reconstruer le muralias de Jerusalem per lor proprie fortias solmente in un die e forsan celebrar lor interprisa con un sacrificio? Esque illes vermente pensa de poter facer alco con petras prendite ex un cumulo de ruinas carbonisate?”. ³Alora Tobia, le Ammonita, qui esseva apud illes diceva: “Si mesmo un vulpe monta supra lo que illes edifica, illo facerea collaber lor muro de lapides!”.

⁴Alora io precava assi: “Audi, oh Deo nostre, como nos deveniva objectos de irrision! Que lor contempto recade sur lor capites, e que illes mesme va patir captivitate in un terra estranie! ⁵Non ignora lor culpa. Non dele lor peccato de tu vista, quia illes te offendeva coram le edificatores^[2]”.

⁶Finalmente le muro esseva completate circum le citate usque le medietate de su altitude, quia le populo habeva operate de tote corde^[3].

⁷(4:1) Ma quando Sanballat, Tobia, le Arabes, le Ammonitas e le Ashdotitas audiva que le restauration del muros de Jerusalem progredeva con successo e que le brechas esseva reparate, illes deveniva furibonde. ⁸Assi omnes de accordo tosto faceva planos de supervenir e pugnar contra Jerusalem pro causar inter nos un turbation. ⁹Assi nos precava nostre Deo e organisava un servicio de guardas, vigilante die e nocte contra illes. ¹⁰Alora le populo de Juda comenciava planger: “Le laboratores deveniva fatigate e il ha troppe fragmentos de lapides a remover. Nunquam nos potera edificar le muros per nos solmente”. ¹¹Intertanto, nostre adversarios anque se vangloriava assi: “Ante que illes mesmo comprende lo que adveni, nos va descender rapidemente super illes, les occidera e facera cessar lor obra!”. ¹²Il eveniva assi que le Judeos que habitava juxta illes, adveniva e preveniva nos repetitemente in re tote le planos que habeva essite conjurate contra nos.

¹³Alora io placiava guardas armate detra le partes le plus basse del muro in locos exponite, e ordinava le populo a vigilar secundo familias, armate de gladios, lanceas e arcos. ¹⁴De post haber inspectate le situation, io convocava le nobiles, le officieros^[4] e le resto del population e les diceva: “Non time le inimico! Memora que nemo pote resister al Senior, qui es magne e gloriose, e pugna pro vostre fratres, vostre filios, vostre filias, vostre uxores e vostre familia!”.

¹⁵Alora il eveniva que, quando nostre inimicos audiva que lor planos esseva a nos cognite, Deo frustrava lor intentiones, e nos retornava a laborar al muro, cata un a su obra. ¹⁶Ma desde ille momento, solmente le medietate del homines laborava, dum le altere medietate vigilava con lanceas, scutos, arcos e cottas de malia. Le officieros se poneva post tote le populo de Juda ¹⁷que reconstrueva le muro. Le laborantes exequeva lor obras con un mano supportante lor onere e con le altere mano illes teneva un gladio. ¹⁸Tote le edificatores portava a su lumbos un cincturon con un gladio. Un trompettero^[5] remaneva juxta me preste a sonar le alarma si necessari.

¹⁹Io diceva al nobiles, al officieros e al resto del populo: “Le obra a facer es grande e extense, e nos es separate procul le un del alteres longe le muro. ²⁰Quandocunque vos audi le sono del corno accurre ad nos. Si nos debera combatter, nostre Deo va pugnar pro nos”.

²¹Assi nos prosequeva a laborar, con le medietate de nos que teneva lanceas, ab le aurora usque al crepusculo. ²²In ille tempore io diceva al populo: “Que cata homine con su collaborator pernocta in Jerusalem e que illes pro nos sia guardas de nocte e laborantes de jorno”. ²³Durante iste tempore, nemo inter nos - non io, ni mi parentes, ni mi servitores, ni le guardas qui esseva con me - deponeva nostre vestimentos. Cata uno teneva le gladio in su dextera, mesmo quando nos vadeva a abiberar nos.

Notas

1. A comenciar de 4:1 usque a 4:23 nostre numeration del versos (que seque le tradition anglese, ET) differe del texto hebraic (BHS), con 4:1 ET = 3:33 HT, 4:2 ET = 3:34 HT, 4:3 ET = 3:35 HT, 4:4 ET = 3:36 HT, 4:5 ET = 3:37 HT, 4:6 ET = 3:38 HT, 4:7 ET = 4:1 HT, etc., through 4:23 ET = 4:17 HT. Assi, in le Biblia hebraic, le capitolo 3 de Nehemia ha 38 versos, durante que cap. 4 ha solmente 17 versos.
2. O “offendeva gravemente le edificatores”.
3. O “con enthusiasmo”.
4. O “magistratos”.
5. O “un sonator de shofar”.