Biblia/Vetule Testamento/Nahum/Nahum 1

Nahum

I

Introduction

¹Le oraculo contra Niniveh; le libro del vision prophetic de Nahum le Elkoshita.

Deo se vindica de su inimicos

²Le Senior es un Deo zelose e vindicative; le Senior es vindicative e multo irate. Le Senior se vindica de su inimicos; ille conserva su ira contra su inimicos. ³Le Senior es patiente e de grande fortia; ille nunquam disculpa^[1] le culpabile.

Le Guerrero divin destrue su inimicos ma protege su populo

Ille marcha con le tempesta e le turbine; nubes obscur de tempesta se leva como pulvere sub su pedes. ⁴Ille emitte un crito de battalia contra le mar e lo face desiccar; ille face siccar tote le fluvios. Bashan e Carmel marcesce; le flor del Libano marcesce. ⁵In su presentia le montes tremula; le collinas convelle; le terra se subleva^[2], le mundo e su habitantes es devastate. ⁶Nemo pote sustener su indignation! Nemo pote resister a su furia! Su ira es effundite como le foco de un vulcano, roccas es frangite durante que ille se approcha.

⁷Le Senior es bon - vero ille es un fortalessa^[3] in tempores de tribulation, ille protege qui cerca refugio in ille. ⁸Ma ille, como un diluvio que toto submerge, causara le complete fin de Niniveh; ille pulsara su adversarios in le tenebras.

Denunciation e destruction de Niniveh

⁹Quecunque tu excogita^[4] contra le Senior, ille lo frustrara completemente! Le tribulation non surgera un secunde vice. ¹⁰Certo illes essera completemente consumite como involvite arbustos de spinas, como le bibita del bibitores, como stupulas multo sic. ¹¹Ex te, Niniveh, sortiva uno que intriga le mal contra le Senior, un perverse stratego militar^[5].

Oraculo de liberation a Juda

¹²Isto es lo que le Senior dice: “Mesmo si illes es potente e anque multes, mesmo si lor armea es numerose, totevia illes essera destruite e stillara via! Benque io affligeva vos, io non affligera vos in ultra. ¹³E ora io rumpera le barra del jugo de Assyria de tu collo. Io divellera le pedicas que es serrate a te.

Oraculo de judicamento contra le rege de Niniveh

¹⁴Le Senior emitteva un decreto contra te: “Tu dinastia pervenira al fin. Io destruera le idolos e le imagines in le templos de tu deos. Io dissacrara tu tumba, proque tu es maledicte”.

Proclamation del liberation de Juda

¹⁵Ecce^[6], un messagero^[7] curre sur le montes! Un messagero proclama le liberation: “Celebra tu festas sacre, oh Juda! Compli tu votos sacre pro laudar Deo! Proque nunquam plus le perverse Assiros te invadera, illes esseva completemente destruite^[8]”.

Notas

1. O “lassa impunite”.
2. O “es devastate”.
3. O “refugio”.
4. O “ordi”.
5. O “un consiliero de malitia”.
6. Comenciante de 1:15, le numeration del versos usque a 2:13 in nostre Biblia de referentia, differe del numeration del texto hebraic  (BHS), con 1:15 ET = 2:1 HT, 2:1 ET = 2:2 HT, etc., usque a 2:13 ET =2:14 HT. A comenciar de 3:1, le numeration de nostre version e le Biblia hebraic corresponde de novo.
7. O “le pedes de un heraldo”.
8. O “Ecce super le montes, le pedes del messagero que apporta bon novas, de qui annuncia le pace. O Judah, celebra tu festas, compli tu votos, proque nunquam plus le impie passara per te, ille essera completemente exterminate”.