Biblia/Vetule Testamento/Levitico/Levitico 2

←Levitico 1

La Bibia in Interlingua Levìtico

Levitico 3→

Levitico

2

Le oblationes

¹Quando un persona offere al Senior un sacrificio de oblation^[1], su offerta debera consister de farina fin de frumento^[2]. Super illo on debera effunder oleo de oliva e poner incenso^[3]. ²Deinde, ille lo debera portar al sacerdotes aaronita^[4]. Uno de illes prendera ex iste farina un manata plen miscite con un pauc de oleo e con tote le incenso, e lo comburera super le altar como un memorial consumite completemente del foco: illo es un offerta de odor suavissime in honor del Senior. ³Lo que remane del offerta pertine a Aaron e a su descendentes: illo es un portion sanctissime quia illo proveni del offertas consumite del foco in honor del Senior.

Oblationes processate

⁴Quando le offerta es cocite al furno, illo debera esser in le forma de panettos facite de farina fin de frumento sin levatura, miscite con oleo de oliva, o de biscuits facite sin levatura e linite con oleo de oliva. ⁵Si le oblation es un offerta de grano cocite sur un planca, illo debe esser de farina fin de frumento miscite con oleo e sin levatura. ⁶Qui lo prepara debe micar lo in peciettas e super illo effunder oleo de oliva - illo es simile al oblation. ⁷Si tu offerta es un oblation cocite in un patella, illo debe esser de farina fin de frumento frigite a fundo in oleo de oliva.

⁸Le oblation preparate assi essera presentate al Senior. Le offerente lo presentara al sacerdote, que lo posara al latere del altar. ⁹Le sacerdote prendera un portion del offerta e lo comburera super le altar como un memorial consumite completemente del foco: illo es un offerta de odor suavissime in honor del Senior. ¹⁰Lo que remane del offerta pertine a Aaron e a su descendentes: illo es un portion sanctissime quia illo proveni del offertas consumite del foco in honor del Senior.

Regulas supplementari del oblationes

¹¹Tote le oblationes que vos presentara al Senior non debera esser preparate con levatura. Vos non debe comburer ulle sorta de levatura o de melle como offerta consumite del foco in honor del Senior. ¹²Vos los potera presentar al Senior como offerta de primitias, ma illos non debe esser ponite super le altar como odor suave pro le Senior. ¹³In ultra, vos debe condir cata uno de vostre oblationes con sal; vos non debe lassar que le sal care in vostre oblationes, quia illo es le symbolo del alliantia che tu Deo faceva con te. Presenta sal con tote tu oblationes.

¹⁴Quando tu presenta al Senior un offerta del primitias del recolta, face lo de spicas tenere tostate al foco e, quando le grano essera tostate, fulla lo; deinde presenta lo como offerta de primitias. ¹⁵Super illo tu debe effunder oleo de oliva e poner incenso, justo como se face con le oblationes. ¹⁶Pois le sacerdote debera comburer un portion del grano fullate e miscite con oleo insimul al incenso como offerta de memorial, consumite completemente del foco in honor del Senior.

Notas

1. O “offerta vegetal”. Cfr. “sacrificio de oblation” in: https://wikisource.org/wiki/Biblia/Glossario/s#S
2. סֹלֶת, solet, farina fin de frumento.
3. Isto non es un qualcunque “incenso” (קְטֹרֶת, qtoret, ma specificatemente “resina de olibano” (לְבֹנָה, lvonah).
4. Litt. “filios de Aaron”, o “descendentes de Aaron”.