Biblia/Vetule Testamento/Job/Job 13

←Job 12

Le Biblia in Interlingua Job

Job 14→

Job

13

Job plaita su lite coram Deo

¹Ecce, mi oculos videva tote isto, mi aures lo audiva e lo comprendeva. ²Lo que vos cognosce, io lo cognosce alsi. Io non es inferior a vos! ³Io, tamen, desira parlar al Omnipotente Deo directemente; io desira disputar con Deo! ⁴Vos, tamen, es fabricatores de mentitas; vos omnes es medicos inepte. ⁵Si solmente vos tacerea del toto, vos esserea reputate homine sapiente! ⁶Audi, ergo, mi argumentos e sia attente al contentiones que mi bucca va pronunciar!

⁷Esserea vos preste a pronunciar mendacios pro Deo? Parlerea vos deceptivemente pro ille? ⁸Volerea vos modificar tendentiosemente vostre testimonio in su favor? Volerea vos devenir le advocatos de Deo? ⁹Que evenirea si Deo discoperi lo que vos face? Pensa vos de poter deciper Deo como on decipe un homine? ¹⁰No, ille certemente reprocharea vos si vos in abscondito modificarea vostre testimonio in su favor. ¹¹Nonne turbarea vos su majestate? Nonne submergerea vos le terror de ille? ¹²Tote vostre platitudes^[1] vale tanto quanto cinere; vostre defensas es defensas de argilla^[2]. ¹³Nunc tace e lassa que io dice lo que io ha in mente, non importa qual poterea esser le consequentias. ¹⁴Si, io va prender mi vita in mi manos e va dicer lo que vermente io pensa. ¹⁵Certemente Deo poterea occider me, ma io ha nulle altere sperantia: Io va arguer mi caso coram ille. ¹⁶Sed lo que me salvara es isto: io non es un homine impie. Si io lo esserea, io non poterea star coram ille. ¹⁷Audi ben lo que io va dicer. Que vostre aures face ben attention a mi explication.¹⁸Ecce, io preparava mi lite. Io sape que io essera trovate innocente^[3]. ¹⁹Qui pote contestar^[4] lo? Si alicuno lo pote facer, io va tacer e pois morira.

²⁰Sparnia me solmente duo cosas, oh Deo, e tunc ab tu facie io non me occultara. ²¹Leva ab me tu pesante mano e cessa de terrificar me con tu espaventose presentia. ²²Deinde advoca me, e io te respondera; o permitte que io te parla, e tu me respondera. ²³Dice me: Quante iniquitates e peccatos io committeva? Monstra me qual es mi trasgressiones e peccatos. ²⁴Quare tu occulta tu facie ab me tu me considera tu inimico? ²⁵Vole tu tormentar un folio sufflate per le vento, e persequer un stupula siccate? ²⁶Tu scribe contra me amar accusationes e releva tote le peccatos que io committeva durante mi adolescentia. ²⁷Tu pone mi pedes in ligamines e tu observa tote mi conducta^[5], tu pone marcas in le planta de mi pedes. ²⁸Io me consuma como ligno que putreface, como un vestimento divorate per le tineas.

Notas

1. O “sententias” e “proverbios”, “belle discursos que vos apprendeva a memoria”, “cliché”, “locos commun”.
2. Que non resiste a attaccos.
3. O “juste”, “io essera vindicate”.
4. O “contender”.
5. O “mi sentieros”.