Biblia/Vetule Testamento/Job/Job 11
Job
[edit]11
[edit]Prime discurso de Sophar a Job
[edit]1Alora Sophar le Naamathita respondeva a Job e le diceva: 2“Poterea remaner sin responsa un tal multitude de parolas? Poterea un persona esser declarate juste[1] solmente pro su habile eloquentia? 3Deberea io remaner silente durante que tu continua a murmurar? Quando tu irride Deo, non deberea alicuno reprochar te? 4Tu pretende: “Mi parolas[2] es pur e io es munde ante Deo”. 5Ma si Deo te parlarea, si solmente Deo aperirea su bucca[3] contra te; 6si ille te revelarea le secretos del sapientia - proque le ver sapientia non es un question simple[4]- tu comprenderea que sin dubita Deo te puniva multo minus de lo que tu merita!
7Pote tu forsan comprender le vestigios[5] de Deo? An tu pote attinger al perfection del Omnipotente? 8Illo es plus excelse que le celo: quid pote tu facer? Illo es plus profunde que le inferno[6]: quid pote tu cognoscer? 9Su mensura es plus longe del terra e plus late que le mar. 10Si Deo veni, te confina e convoca un corte pro judicar te, qui poterea contradicer le?
11Deo cognosce ben le mendacios del homines. Quando ille vide le iniquitate, esque ille non lo considera? 12Ma un homine vacue devenira sage quando le pullo de un asino salvage[7] va nascer homine[8]!
13Del altere latere, si tu va diriger tu corde rectemente e extende tu manos verso Deo, 14si tu disembarassa te del iniquitate que es in tu manos, e non permitte que le injustitia demora sub tu tenda, 15alora tu potera altiar tu facie sin maculas, e tu essera forte[9] e sin timor. 16Alora tu potera oblidar omne tu miseria e recordar lo solmente como aqua que preteriva. 17Tu vita essera plus fulgide que le mediedie, e su obscuritate essera como le matino. 18Tu habera fiducia, proque il ha sperantia: tu potera dormir in securitate. 19Tu potera reposar sin alicuno que te terrifica, e plures cercara tu favor. 20Le oculos del impios, tamen, fallera e non potera fugir: lor sol sperantia va esser exhalar le anima”.