Biblia/Vetule Testamento/Jeremia/Jeremia 7

←Jeremia 6

Le Biblia in Interlingua Jeremia

Jeremia 8→

Jeremia

7

Contra sperantias false

¹Le Senior diceva a Jeremia: ²¹“Sta al porta del templo del Senior e proclama iste message: ‘Audi le parola del Senior, oh vos omnes de Juda, qui entra per iste portas pro adorar le Senior. ³Isto dice le Senior del universo, le Deo de Israel: Emenda vostre maniera de viver^[1] e io permittera vos de continuar a viver in iste terra^[2]. ⁴Cessa de confider in le parolas mendace que dice: Isto es le templo del Senior, le templo del Senior, le templo del Senior!” como si iste facto solmente esserea pro vos un garantia de securitate. ⁵Vos debe cambiar radicalmente vostre conducta e facer lo que es juste. Vos debe tractar vostre proximo justemente. ⁶Cessa de opprimer le estranieros que vive in vostre pais, le infantes que perdeva lor patre, e le feminas que perdeva lor marito^[3]. Cessa de effunder sangue innocente in iste pais. Cessa de tributar honor a altere deos.Tote illo causara solmente vostre ruina. ⁷Si vos cessa facer iste cosas, io permittera vos de continuar a viver in iste pais, le pais que io donava in detention a vostre ancestres pro semper.

⁸Considera vostre vita! Vos confide in false sperantias que non salvera vos. ⁹Vos fura, vos occide, vos committe adulterios, vos jura mendacemente, vos offere incenso a Baal e seque deos estranie del quales antea vos ignorava mesmo le existentia. ¹⁰Nonobstante tote illo, vos veni e sta coram me in iste templo, super le qual es invocate mi nomine, e vos dice: ‘Isto es nostre securitate!’. Vos crede que vostre securitate es tanto grande que vos pensa de poter continuar sin problemas a committer tote iste peccatos odiose. ¹¹Esque vos pensa que iste templo, super le qual mi nomine es invocate, pote esser a vostre oculos un spelunca de robatores? Certo io videva lo que vos faceva, dice le Senior.

¹²Vade al loco in Shilo ubi io in principio poneva le Tabernaculo que porta mi nomine, e vide lo que io faceva propter le malitia de mi populo, le Israelitas. ¹³Vos alsi faceva tote iste cosas, dice le Senior, e io repetitemente parlava vos re illos, ma vos non audiva! Io vocava vos al repententia, ma vos non respondeva. ¹⁴Assi io destruera iste templo, super le qual es invocate mi nomine e que vos crede esser vostre protection. Io destruera iste loco, que io dava a vos e a vostre ancestres, sicut io faceva con Siloh. ⁵Io removera vos de mi presentia, justo como io faceva con vostre fratres, tote le descendentes de Ephraim^[4].

Le persistente idolatria de Juda

¹⁶Inde le Senior diceva: “Tu, ergo, Jeremia, non preca plus pro iste populo! Non clama a me o petitiona in lor favor! Non plaita a que io les salva, proque io non te exaudira. ¹⁷Esque tu vide lo que illes face in le citates de Juda e in le stratas de Jerusalem? ¹⁸Reguarda como le filios collige lignos, le patres accende le foco e le feminas impasta le farina e face tortas pro offerer los al dea que illes appella le Regina del Celo^[5]. Illes face alsi libationes pro deos estranie. Illes pare facer tote isto solmente pro offender^[6] me. ¹⁹De facto, le offensa non es a me que illes lo face, ma a se ipse, a lor proprie vergonia”. ²⁰“Assi,” dice le Senior Deo, “Io effundera mi furor e mia indignation super iste loco. Su gente, animales, arbores, e messes, essera consumate per le foco inextinguibile de mi ira”.

²¹Assi dice al populo de Juda le Senior del universo, Deo de Israel: “Prende vostre holocaustos e vostre altere sacrificios, e mangia los vos mesme! ²²Va considerar isto: Quando io parlava a vostre ancestres de post que io les portava foras de Egypto, io non dava les simplemente commandos in re holocaustos e sacrificios. ²³Io diceva les alsi clarmente: ‘Obedi me. Si vos me obedi io essera vostre Deo e vos essera mi populo. Comporta vos exactemente como io dice e toto vadera ben pro vos’. ²⁴Illes, tamen, non audiva ni prestava attention a mi parolas. Ille sequeva solmente le inclinationes obstinate del pravitate de lor cordes. Illes se comportava de mal in pejo in vice de meliorar se^[7]. ²⁵Ab le tempore que vostre ancestres partiva del terra de Egypto usque a iste die, io nunquam cessava de mandar mi servitores le prophetas pro parlar vos, ²⁶ma vos non me audiva ni me prestava attention. Vos deveniva obstinate e peccator, mesmo pejo que vostre ancestres”.

²⁷Pois le Senior me diceva: “Dice les tote iste parolas, ma non expectar que illes te audi. Voca les, ma non expectar te que illes te responde. ²⁸Assi dice les: “Iste es un nation que non obediva al Senior, lor Deo, e non acceptava su reproches. Le fidelitate^[8] dispareva ab inter illes. Iste gente non mesmo professa plus le veritate. ²⁹Assi, comencia portar le lucto, oh vos populo de iste nation. Tonde tu capillos de homine consacrate e jecta lo via. Intona un cantica de lucto sur le culmines del montes, proque le Senior decideva de rejectar e abandonar iste generation que provocava su ira!”.

³⁰Le Senior dice: “Io les rejectava quia le populo de Juda faceva lo que io considera un mal^[9]. Illes erigeva lor idolos disgustose in le templo super le qual es invocate mi nomine e lo pollueva. ³¹Illes edificava alsi locos de culto in un placia appellate Tophet in le Vallea de Ben Hinnom ubi illes sacrifica lor filios e filias con le foco. Isto es qualcosa que io nunquam les commandava de facer! ³²Assi guarda,” dice le Senior, “le tempore veni in le qual ille deposito de immunditia non essera plus appellate Tophet o la Vallea de Ben-Hinnom, ma le Valle del Macello. Illes interrara le cadaveres in Tophet usque il non habera mesmo plus spatio pro illos. ³³Deinde, le corpores morte de ille gente essera abandonate sur le terreno e devenira le alimento de vultures e de animales salvage, e il non habera mesmo plus supervivente pro repeller les. ³⁴Io facera disparer omne canto gaudiose e riso per le stratas de Jerusalem. Le voces gaudiose de sposos e sposas non essera plus audite in le citates de Juda. Le terra jacera in complete desolation.

Notas

1. Let. “vostre vias e vostre operas”.
2. O “loco”, ma isto poterea esser mal comprendite, proque illo se refere non al templo, ma al terra de Israel.
3. O “orphanos e viduas”.
4. O “le populo de Israel”.
5. Probabilemente Ishtar, Anat, o Ashtoret. Illa esseva le dea del amor e del fertilitate.
6. O “provocar”.
7. O “illes retrocedeva e non procedeva”.
8. O “veritate”.
9. O “lo que es un mal a mi oculos”.