Biblia/Vetule Testamento/Jeremia/Jeremia 39

←Jeremia 38

Le Biblia in Interlingua Jeremia

Jeremia 40→

Jeremia

39

Le cadita de Jerusalem

¹Rege Nebuchadnezzar de Babylonia arrivava con su armea integre e assediava Jerusalem. Le assedio comenciava in le decime mense del novesime anno que Zedekia regnava super Juda. ²Illo durava usque le novesime die del quarte mense del dece-prime anno de Zedekia. In celle die illes penetrava trans le muralias del citate. ³Alora omne officieros del armea babylonian entrava triumphalmente per le Porta Medie: Nergal-sharezer de Samgar, Nebo-sarsekim, le capite del officieros, Nergal-sharezer, le consiliero del rege, e tote le altere officieros del rege de Babylon.

⁴Quando rege Zedekia de Juda e tote su milites les videva, illes essayava fugir. Illes quitava le citate durante le nocte. Illes passava per un sentiero trans le jardin del rege e per le porta inter le duo muralias. Illes se dirigeva verso le vallea del Jordan^[1]. ⁵Le armea babylonian tamen, les persequeva e succedeva preceder rege Zedekia e attender le in le plana de Jericho e le capturava. Illes le portava a rege Nebuchadnezzar de Babylonia a Ribla, in le territorio de Hamath, e ibi le rege de Babylon pronunciava su judicio super Zedekia. ⁶Ibi, in Ribla ille faceva occider le filios de Zedekia, durante que Zedekia esseva fortiate reguardar. Le rege de Babylonia faceva anque occider omne nobiles de Juda. ⁷Deinde ille faceva cavar le oculos de Zedekia, le faceva incatenar e deportar a Babylonia.

⁸Intertanto, le babylonianes incendiava Jerusalem, includite le palatio regal e le domos del gente, e illes dismantellava le muralias del citate. ⁹Deinde Nebuzaradan, le capitano del guarda regal, rendeva prisoneros le resto del populo que habeva remanite in le citate. Ille les deportava a Babylon insimul al gente que se habeva livrate a ille. ¹⁰Nebuzaradan, tamen, in celle tempore, permitteva a alicunes inter le plus paupere del populo de remaner in le pais de Juda pro coler le vinias e le agros.

Jeremia remane in Juda

¹¹Rege Nebuchadnezzar habeva dicite a Nebuzaradan, le capitano del guardas, de querer e trovar Jeremia. ¹²Ille diceva: “Trova Jeremia e vigila super ille. Non facer le alcun mal, sed face a ille^[2] quecunque ille vole”. ¹³Assi Nebuzaradan, le capitano del guardas regal, Nebushazban, le capite del officieros, Nergal-sharezer, le consiliero del rege, e le altere officieros del rege de Babylonia, ¹⁴mandava messageros pro facer sortir Jeremia del prision ubi ille se trovava. Illes le poneva sub le cura de Gedalia, filio de Ahikam e granfilio de Shaphan, le quales le faceva retornar a su domo. Assi Jeremia remaneva in Juda inter su proprie gente.

¹⁵Le Senior habeva date le sequente message a Jeremia durante que ancora ille esseva in prision: ¹⁶“Dice a Ebed Melech, le ethiope: Isto es lo que le Senior del universo, le Deo de Israel, dice: Io facera a iste citate tote lo que io menaciava facer. Io mandara disastros, non prosperitate. Tu videra su destruction, ¹⁷ma io liberara te in ille die - dice le Senior - e non te livrara in le manos del homines qui tanto tu time. ¹⁸Io te liberara e non te facera cader sub le colpo de gladios. Tu remuneration essera tu vita ipse, quia in me tu habeva fiducia - assi dice le Senior”.

Notas

1. O “via del Arabia”.
2. O “da a ille”.