Biblia/Vetule Testamento/Isaia/Isaia 61

←Isaia 60

Le Biblia in Interlingua Isaia

Isaia 62→

Isaia

61

Le Senior rejuvenescera su populo

¹Le Spirito del Senior Deo^[1] es super me, quia le Senior me commissionava^[2] pro annunciar bon novas al mansuetes^[3], pro curar le plagas del contrite de corde, pro decretar le liberation del captivos e le apertura del carcere al reclusos. ²Ille me appunctava pro annunciar le tempore^[4] in le qual le Senior va manifestar les su favor, va consolar omne lugentes e, conjunctemente, su vengiantia contra lor inimicos. ³A omne lugentes in Sion, ille dara le corona^[5] del jubilo pro le cineres del affliction, le oleo del allegressa pro le lucto, le roba del festa pro un spirito de amaritude^[6]. Illes essera appellate quercos de justitia, arbores plantate pro manifestar le gloria del Senior. ⁴Illes reedificara le antique ruinas, reparante citates destruite pridem. Illes reviviscera los, quanquam illos remaneva deserte per multe generationes. ⁵Estranieros essera vostre servitores. Illes pascera vostre greges, arara vostre agros e curara vostre vinias. ⁶Vos essera appellate Sacerdotes del Senior, Ministros de nostre Deo. Vos nutrira vos del tresores del nationes e vantara vos de lor ricchessas^[7]. ⁷In vice de honta e dishonor, vos gaudera de un duple portion de honor. Vos possedera un duple portion de prosperitate in vostre terra, e vostre essera un gaudio sempiterne. ⁸Quia io, le Senior, ama le justitia. Io odia le rapina e le iniquitate. Fidelmente io recompensara mi populo pro lor suffrentias e establira con illes un pacto permanente. ⁹Lor descendentes recipera recognoscimento e honor inter le nationes. Omnes comprendera que illes es le populo que le Senior ha benedicite.

¹⁰Me sasi un grande gaudio in le Senior! Mi anima exulta in mi Deo! Quia ille me vestiva con le roba del salvation e me drappava con le vestimento del justitia. Io es simile a un sponso in su vestimentos de nuptias o a un sponsa ornate con su joieles. ¹¹Le Senior Deo va monstrar su justitia al gentes del mundo. Omnes le laudara! Su justitia essera como un jardin in primavera con plantas que germina ubique.

Notas

1. O “soveran Senior”.
2. O “ungueva”, “seligeva”, “consecrava”.
3. O “al pauperes”.
4. Litt. “anno”.
5. O “turban”.
6. O “desperation”, “discoragiamento”.
7. O “glorias”.