Biblia/Vetule Testamento/Isaia/Isaia 24

←Isaia 23

Le Biblia in Interlingua Isaia

Isaia 25→

Isaia

24

Le Judicamento de Deo super le terra integre

¹Ecce, le Senior es preste a devastar le terra e a lassar lo in ruinas; ille va guastar su superfacie e disperger su habitantes. ²Omnes va patir - le sacerdote sicut le populo, le domino sicut le servo, le seniora elegante sicut su attendentes, le venditor sicut le emptor, le prestatario sicut le prestator, le creditor sicut le debitor. ³Le terra essera completemente devastate e del toto depredate, proque il esseva le Senior ipse a decretar iste judicio.

⁴Le terra se desicca^[1] e marcesce, le mundo se crispa e marcesce, le gente prominente del societate langue. ⁵Le terra es infectate propter su habitantes, quia illes transgrediva le leges, violava le preceptos e infringeva le alliantia eterne^[2]. ⁶Propter isto le malediction menaciate del alliantia devora le terra; su habitantes paga pro lor culpas. Isto es le ration proque dispare^[3] le habitantes del terra, e solmente poc superviventes esseva relinquite. ⁷Le musto luge^[4], le vite marcesce, omnes cuje corde se allegrava, nunc geme. ⁸Le gai sono del tamburinos cessava, le festivitate de qui exultava se interrumpeva; le felice sono del harpa se terminava. ⁹Illes non plus canta e bibe vino, le bira nunc ha un mal sapor pro illes que lo bibeva. ¹⁰Le citate in ruinas es fracassate; omne domo es serrate e nemo plus pote intrar in illos. ¹¹Illes ulula per le vias propter lo que eveniva al vino; omne exultation deveniva dolo; omne gaudio dispareva del terra. ¹²Le citate esseva relinquite in le desolation, su portas esseva abattite e destruite. ¹³Isto es lo que va evenir in omne parte del terra, inter le nationes. Il essera como quando on soccute un olivo e solmente poc olivas remane al termino del recolta.

¹⁴Le superviventes^[5] leva lor voces e crita gaudiosemente; illes lauda le majestate del Senior in le occidente. ¹⁵Propter isto glorifica le Senior! Longe le costas del mar magnifica le nomine del Senior Deo de Israel. ¹⁶Desde le confinios del terra nos audi laudes: “Gloria al Justo!”. Ma io diceva: “Io es ruinate! ruinate! Guai a me! Le deceptores decipe, le deceptores decipe del toto!”.

¹⁷Le terror, le fossa e le trappa es preste a surprender vos, habitantes del terra. ¹⁸Qui fugi del voce del terror cadera in le fossa; qui sorti del fossa essera capite del trappa. Quia le cataractas del celo es aperte e le fundationes del terra es succutite. ¹⁹Le terra se fractura, le terra se lacera, le terra se soccute violentemente. ²⁰Le terra va titubar^[6] como un homine avinate; illo va fluctuar como un tenta pulsate per le vento de un tempesta. Su iniquitate^[7] es simile a un peso que lo face submerger e illo cadera sin unquam plus resurger.

Le Senior va devenir rege

²¹In ille tempore le Senior va punir^[8] le fortias del celo e le reges del terra. ²²Illes essera imprisionate in un fossa, serrate in un carcere e, depost multe tempore de imprisionamento illes essera punite^[9]. ²³Le luna erubescera, le brillantia del sol essera obscurate, quando le Senior del universo venira a regnar sur le monte Sion in Jerusalem, al presentia de su assemblea, in majestose splendor.

Notas

1. O “luge”.
2. O “permanente”.
3. O “se dissolveva”.
4. O “se siccava”.
5. Lit. “illes”.
6. O “vacillar”.
7. O “peccato”.
8. Litt. “Le judicamento lo visitara”.
9. Litt. “Visitate per le judicamento”.