Biblia/Vetule Testamento/Isaia/Isaia 19

←Isaia 18

Le Biblia in Interlingua Isaia

Isaia 20→

Isaia

19

Le Senior judicara Egypto

¹Message concernente Egypto: “Ecce, le Senior cavalca un nebula que se move rapidemente e se approxima a Egypto. Le idolos de Egypto tremula ante le; le Egyptianos perde lor corage. ²Io provocara un guerra civil in Egypto^[1]. Fratres pugnara contra fratres, un homine contra su vicinos, citate contra citate, dinastia contra dinastia^[2]. ³Le Egyptianos essera in preda al panico^[3] e io confundera lor strategia. Illes petera consilio a lor idolos e al spiritos del mortos, a lor necromantes e a lor divinos. ⁴Io mittera le Egyptianos in le manos de un despota crudel, e un rege forte les dominara”. Isto dice le Senior, Deo del universo.

⁵Le aqua del mar essera essugate e le fluvio essera desiccate e cambiate in un deserto. ⁶Le canales essera putride; le aquas^[4] de Egypto manera semper plus basse e pois siccara; le cannas e le juncos marcescera ⁷insimul al plantas al estuario^[5] del fluvio. Tote le campos cultivate juxta le ripas del fluvio devenira pulvere que le vento sufflara via. ⁸Le piscatores se dolera e lugera; tote illes que jectava lor hamos in le fluvio e illes qui expandeva lor retes super le facie del aqua essera consternate. ⁹Illes qui operava con le lino, illes qui pectinava e texeva le canevas essera embarassate; illes qui damascava pallidira. ¹⁰Illes qui produceva vestimentos cognoscera la depression^[6]; le laboratores empleate de die in die essera disperate.

¹¹Le officieros de Tanis^[7] es homines inepte; le sage consilieros del Pharaon da consilios stupide. Como pote vos dicer al Pharaon: “Io es filio de sapientes, un descendente del reges del antiquitate?”. ¹²Ubi es nunc tu sapientes? Que illes te dice, si illes lo sape, que illes te annuncia lo que ha decretate super Egypto le Senior del universo! ¹³Le officieros de Tanis es homines inepte; le officieros de Memphis esseva decipite. Illes, le governatores del provincias^[8], ha disviate Egypto. ⁴Le Senior les ha confundite e illes non sape plus discerner^[9]; illes discammina Egypto in toto lo que illo face, assi que illes es como un bibitor ebrie que labe in su proprie vomito. ¹⁵Egypto non sapera plus facer alco de bon; non lo sapera plus facer su capite e su cauda, su palmas e su juncos.

Un sperantia pro Egypto

¹⁶In ille dies, le Egyptianos essera debile como feminas. Illes trepidara e se espaventara proque le Senior del universo brandira su pugno contra illes. ¹⁷Le pais de Juda humiliara Egypto. Tote illes qui audi in re Juda se espaventara a causa de lo que le Senior del universo cogita facer contra les.

¹⁸In ille dies, cinque citates in le pais de Egypto parlera le lingua de Canaan e facera un juramento de fidelitate al Senior del universo. Uno de illos essera appellate Citate del Sol^[10]. ¹⁹In ille dies il habera un altar pro le Senior in le medio del pais de Egypto, e alsi un columna sacre dedicate al Senior a su frontiera. ²⁰Illo devenira un signo e un testimonio que le Senior del universo es presente in le pais de Egypto. Quando le Egyptianos clamera adjuta al Senior a causa del oppressores, ille mandera a illes un salvator e defensor. ²¹le Senior se revelara^[11] al Egyptianos, e illes recognoscera in ille tempore le autoritate del Senior. Illes le presentara sacrificios e offertas; illes facera votos al Senior e los complira. ²²Le Senior percutera Egypto, ille les causara plagas, ma los cicatrisara. Illes se convertira al Senior e ille audira lor precarias e les sanara.

²³In ille dies il habera un via ab Egypto al Assyria. Le Assyros visitara Egypto, e le Egyptianos visitara le Assyros. Le Egyptianos e le Assiros adorara insimul le Senior. ²⁴In ille dies Israel essera le tertie membro del gruppo, insimul a Egypto e Assyria como un benediction in le corde del terra. ²⁵Le Senior del universo pronunciara un benediction, dicente: “Sia benedicite mi populo, Egypto, e le obra de mi manos, Assyria, e mi hereditage, Israel.

Notas

1. O “Io provocara Egypto contra Egypto”.
2. O “regno contra regno”.
3. O “le spirito del Egypto essera devastate in lor medio”.
4. O “torrentes”.
5. O “bucca”.
6. O “essera demoralisate”.
7. O “princes de Zoan”.
8. O “le petra de angulo de su tribos”.
9. O “les ha date un spirito de cecitate”
10. Heliopolis.
11. O “se facera cognoscer”.