Biblia/Vetule Testamento/Hosea/Hosea 1

←Daniel 12

Le Biblia in Interlingua Hosea

Hosea 2→

Hosea

I

Superscription

¹Isto es le parola del Senior que esseva revelate a Hosea, filio de Beeri, durante le tempore que Uzziah, Jotham, Ahaz, e Hezekiah esseva reges de Juda, e durante le tempore que Jeroboam, filio de Josh, esseva rege de Israel.

Symbolos de peccato e de judicamento: la prostituta e su filios

²Quando le Senior parlava le prime vice per le medio de Hosea, ille le diceva: “Va e prende un prostituta como sposa, le qual parera filios illegitime concipite per prostitution, proque le nation committe continuemente prostitution spiritual avertente se del Senior”. ³Assi Hosea se maritava con Gomer, filia de Diblaim. Illa concipeva e parturiva pro ille un filio. ⁴Pois le Senior diceva a Hosea: “Nomina le Jezreel, proque jam tosto io punira^[1] le dynastia de Jehu a causa del effusion de sanguine in le vallea de Jezreel^[2] e io extinguera le regno de Israel. ⁵In ille tempore io destruera le potentia militar^[3] de Israel in le vallea de Jizreel”. ⁶Illa concipeva de novo e parturiva un filia e Deo diceva a Hosea: “Nomina la Lô-Ruhama^[4] proque io non habera plus misericordia del nation de Israel. Proque certemente io non pardonara su culpa. ⁷Ma io habera misericordia del nation de Juda e io liberara les per le Senior, lor Deo. Io les salvara non per le arco del guerrero, ni per le spada, ni per un victoria militar, ni per cavallos o per carros de guerra.

⁸Postquam illa habeva dislactate Lô-Ruhama, Gomer concipeva de novo e parturiva un altere filio. ⁹Alora Deo diceva a Hosea: “Nomina le Lô-Ammi^[5] quia vos non es mi populo e io non es vostre Deo”.

Le restauration de Israel

¹⁰Tamen^[6], in le futuro, le numero del populo de Israel essera como le sablo del mar, le qual non se pote ni mensurar ni numerar. Il evenira que, benque il esseva dicite a illes: ‘Vos non es mi populo’, il essera dicite a illes: ‘Vos es filios del Deo vivente’! ¹¹Postea le populo de Juda e le populo de Israel se assemblara insimul. Illes seligera pro illes un capite. Illes florescera in le pais. Certemente le die de Jizreel essera grande!

Notas

1. O “io me vengiara”.
2. Let. “jam tosto io vengiara le sanguine de Jizre'el super le domo de Jehu”.
3. Let. “io frangera le arco de Israel”.
4. “ Non-Commiserate”.
5. Non-mi-Populo.
6. A comenciar de 1:10, le numero del versos usque a 2:23 in nostre Biblia de referentia, differe dal numero del versos del texto hebraic (BHS), con 1:10 ET = 2:1 HT, 1:11 ET = 2:2 HT, 2:1 ET = 2:3 HT, etc., usque a 2:23 ET = 2:25 HT. A comenciar de 3:1 le numero del versos retorna esser le mesme del Biblia Hebraic.