Biblia/Vetule Testamento/Genesis/Genesis 3

Genesis

3

Le peccato e su consequentias

¹Le serpente esseva le plus astute del animales salvage que le Senior Deo habeva facite. Ille diceva al femina: “Esque il es realmente ver que Deo ha dicite que vos non es permittite nutrir vos del fructos del arbores del jardin?”. ²Le femina diceva al serpente: “Nos pote mangiar del fructos del arbores del jardin; ³ma solmente concernente le fructos del arbore que es in le medio del jardin, Deo prescribeva nos de non mangiar de illos e de non tanger los, alteremente nos va morir”. ⁴Le serpente diceva al femina: “No! Vos non va morir: ⁵le facto es que Deo sape que si vos mangia de illos vostre oculos se aperirea e vos esserea sicut Deo, cognoscente le bon e le mal”.

⁶Quando le femina videva que ille arbore produceva un fructo comestibile^[1], attrahente al oculos, e appetibile pro acquirer sapientia, illa prendeva de illos e los mangiava. Illa dava de illos etiam a su marito, que la accompaniava, e ille alsi mangiava de illos. ⁷Assi le oculos de ambes se aperiva. Quando illes comprendeva esser nude, illes sueva insimul folios de fico e se faceva un copertura.

⁸Alora le homine e su uxor audiva le voce del Senior Deo que deambulava ille die per le jardin durante le brisa vesperal, e illes se occultava ab le facie del Senior Deo inter le arbores del jardin. ⁹Ma le Senior Deo vocava le homine e le diceva: “Ubi es tu?”. ¹⁰Le homine replicava: “Io audiva tu voce in le jardin e io me espaventava quia io esseva nude, assi io me occultava”. ¹¹E le Senior Deo diceva: “Qui te diceva que tu esseva nude? Esque tu mangiava del arbore que io prescribeva non mangiar de illo?”. ¹²Le homine diceva: “Il esseva le femina que tu me provideva a dar me del fructos del arbore, e io lo mangiava”. ¹³Assi le Senior Deo diceva al femina: “Que es isto que tu faceva?”, e le femina replicava: “Le serpente me seduceva^[2]: ecce proque io mangiava de tal fructos”.

¹⁴Le Senior Deo diceva al serpente: “Quia tu faceva isto, maledicte^[3] tu es inter omne bestial e tote le creaturas vivente del agros! Super tu ventre tu repera, e pulvere tu va mangiar per tote le dies de tu vita. ¹⁵Io ponera inimicitia inter te e le femina, e inter tu semine^[4] e su semine; illo^[5] te contundera le capite e tu contundera su calce^[6]”.

¹⁶Al femina ille diceva: “Io multiplicara tu dolores de parto; con dolor tu parera filios. Tu desirara exercer controlo super tu marito, ma ille te dominara”.

¹⁷Ma a Adamo ille diceva: “Quia tu obediva al voce de tu uxor e mangiava del arbore que io te prescribeva non mangiar de illo, le terreno essera maledicite propter te! Con travalio tu mangiara ex illo tote le dies de tu vita. ¹⁸Pro te illo producera spinas e cardos, ma tu mangiara le grano^[7] del terra. ¹⁹Con le sudor de tu facie tu mangiara tu pan donec tu retorna al terra del qual tu esseva prendite, quia tu es pulvere e in pulvere tu te revertera”.

²⁰Le homine^[8] appellava su uxor Eva, quia illa haberea essite le matre de tote le viventes. ²¹Le Senior Deo faceva pro Adam e su uxor tunicas de pelle, e les vestiva de illos. ²²E le Senior Deo diceva: “Ecce, ora que le homine deveniva como uno de nos, cognoscente le bon e le mal, non le debe esser permittite de extender su mano e prender etiam del arbore del vita e mangiar de illo e viver in eterno”. ²³Assi le Senior le expelleva del jardin in Eden, ut cultivar le terreno del qual ille esseva prendite. ²⁴Depost haber expellite le homine, le Senior Deo placiava in le latere oriental del jardin in Eden sentinellas angelic^[9] que empleava le flamma de un gladio torneante pro custodiar le via del arbore del vita.

Notas

1. O “bon a mangiar”.
2. O “decipeva”.
3. O “execrate”.
4. O “descendentia”. Hebr. זַרְעֲךָ֖ ab זֶרַע [zara'] = semine, fructos, filios.
5. A dicer “su descendentia”. In hebraico le pronomine hic es ה֚וּא (ille, masculin singular)
6. Hebr. עָקֵב [aqeb], calce, tendon, talon.
7. O “herba”.
8. O “Adam”.
9. O “cherubim”.