Biblia/Vetule Testamento/Exodo/Exodo 32

Exodo

32

Le vitello auree

¹Quando le populo videva quanto Moses morava descender del monte, illes se congregava circa Aaron e le diceva: “Entra tosto in action e face pro nos alcun deos qui nos precede! Nos non sape quid accideva al homine qui conduceva nos hic del terra de Egypto”.

²Alora Aaron les diceva: “Prende le anellos de auro ab le aures de vostre uxores, filios e filias, e porta los ad me”. ³Tote le populo prendeva le anello de auro de lor aures e los portava a Aaron. ⁴Deinde Aaron prendeva le auro, lo faceva funder e lo modulava in le forma de un vitello. Quando le populo lo videva, illes exclamava: “Oh Israel, istes es le deos^[1] que faceva vos sortir del terra de Egypto!”. ⁵Quando Aaron videva quanto le populo esseva excitate, ille edificava un altar coram le vitello. Pois ille annunciava: “Deman il habera un solemnitate in honor del Senior!”.

⁶Le die sequente, le populo se levava mane pro offerer holocaustos e offertas de pace. Depost isto, illes faceva un grande festa: illes mangiava e bibeva, e indulgeva in grande bacchanalia.

⁷Le Senior diceva a Moses: “Descende tosto ab le monte! Tu populo, que tu faceva sortir del terra de Egypto corrumpeva lor mores”^[2]”. ⁸Quanto cito illes recedeva del maniera de viver que io les commandava. Illes faceva funder auro e se faceva un vitello, e illes se prosterneva coram illo e offereva a illo sacrificios. Illes dice: ‘Istos es vostre deos, oh Israel, qui te faceva sortir del terra de Egypto’”. ⁹Pois le Senior diceva: “Io ha vidite quanto iste populo es obstinate e rebelle.¹⁰Ora dimitte me, ut mi furor se accende contra illes e io les destrue. De te solmente, tamen, io facera sortir un grande nation”.

¹¹Ma Moses essayava pacificar le Senior, su Deo. Ille diceva: “Oh, senior! Quare es tu tanto irate contra tu proprie populo, que tu faceva sortir ab le terra de Egypto con tal grande fortia e tal mano robuste? ¹²Quare lassar que le Egyptianos dice: ‘Lor Deo les salvava con le sol intention de massacrar les plus tarde in le montanias e deler les del facie del terra?’ Recede de tu ardente ira. Non face que le terribile disastro del qual tu les menaciava, cade super tu populo! ¹³Rememora Abraham, Isaac, e Israel, tu servitores! Tu te ingagiava con illes, dicente: “Io rendera vostre descendentes tanto numerose quanto le stellas del celo. E io dara a illes iste terra que io promitteva a vostre descendentes, e illes lo possedera pro semper’”. ¹⁴Assi le Senior cambiava idea re le terribile disastro que ille habeva menaciate facer cader super su populo.

¹⁵Deinde Moses retornava e descendeva del monte. Ille portava in su manos le duo tabulettas de petra super le quales esseva inscribite le terminos del pacto. Illos esseva inscribite de ambe lateres. ¹⁶Iste tabulettas esseva le obra de Deo; le parolas super illo habeva essite gravate per Deo ipse.

¹⁷Quando Josue audiva le tumulto del populo que vociferava, ille diceva a Moses: “On audi in le campamento un ruito simile a un battalia de guerra!”. ¹⁸Ma Moses replicava: “No, illo non es le clamor de vincentes, ni le clamor de gente in fuga. Io audi le clamor de un celebration”. ¹⁹Quando illes se approximava al campamento, Moses videva le vitello e le dansas e ille valde irasceva. Ille jectava a terra le tabulettas de petra, fracassante los al pede del monte. ²⁰Ille sasiva le vitello que illes habeva facite e lo combureva. Deinde, ille lo reduceva in pulvere, jectava le pulvere in le aqua, e fortiava le populo a biber lo. ²¹Finalmente, ille demandava a Aaron: “Quid iste populo te faceva ut inducer te a committer super illes un tal terribile peccato?”.

²²Aaron replicava: “Non sia indignate, mi senior! Tu ipse sape ben quanto iste populo es pron al mal. ²³Illes me diceva: ‘Face pro nos alcun deos que precede nos. Nos non sape quid accideva al homine qui conduceva nos hic del terra de Egypto’. ²⁴Assi io les diceva: ‘Quicunque possede joieles de auro, leva los ab vos. Quando illes me los portava, io simplemente los jectava in le igne - e iste vitello sortiva!”.

²⁵Moses videva que Aaron habeva lassate le populo a disfrenar se completemente e que lor inimicos propter isto les haberea irridite. ²⁶Assi ille se poneva al entrata del campamento e critava: “Qui es pro le Senior, se junge a me!”. E tote le Levitas se congregava circa ille.

²⁷Moses les diceva: “Isto es lo que ha dicite le Senior, le Deo de Israel: ‘Cata uno de vos prende vostre gladios e percurre le campamento ab un latere al altere. Occide omnes - mesmo vostre fratres, amicos e vicinos”. ²⁸Le Levita assi obediva al commandos de Moses e in ille die moriva tres milles personas. ²⁹Deinde Moses diceva al Levitas: “Hodie vos ha consecrate vos ipse pro le Senior, quia vos le obediva mesmo si illo significava occider vostre filios e fratres. Hodie vos ganiava un benediction”.

Moses intercede pro Israel

³⁰Le die sequente Moses diceva al populo: “Vos committeva un terribile peccato, ma io ascendera de novo al Senior super le monte. Forsan io potera obtener le pardono pro vostre peccato. ³¹Assi Moses retornava ad le Senior e diceva: “Oh, que peccato terribile iste gente ha committite. Illes de faceva deos de auro. ³²Ora, tamen, perdona lor peccato - ma si no, dele mi nomine del libro que tu scribeva!”.

³³Ma le Senior replicava a Moses: “No, io va deler de mi libro le nomine de qui peccava contra me! ³⁴Ora vade, conduce iste populo al placia re le qual io te parlava: mi angelo te precedera. E quando io venira e vocara le populo a dar conto de su comportamento, io certemente les considerara responsabile pro lor peccatos.

³⁵Ergo le Senior percuteva le populo con un grande plaga quia illes habeva adorate le vitello que Aaron habeva facite.

Notas

1. Le parola hic e plus antea poterea esser singular, e esser traducite: “Isto es vostre deo, oh Israel”. Tamen, le empleo de “istos” indica que plus que un deo esseva intendite con le imagine. Lor affirmation e le statua, quamquam illes non emplea le sancte nomine de Deo, es un violation del prime duo commandamentos.
2. O “peccava”.