Biblia/Vetule Testamento/Deuteronomio/Deuteronomio 34

←Deuteronomio 33

La Bibia in Interlingua Deuteronomio

Josua 1→

Deuteronomio

34

Le morte de Moses

¹Ergo, ab le planas de Moab Moses ascendeva al Monte Nebo usque al picco de Pisga, que es contra Jericho. Ibi le senior le ostendeva tote le terra de Galaad usque a Dan; ²tote le terra de Nephtali; le terra de Ephraim e Manasseh; tote le terra de Juda usque al Mar Mediterranee; ³e le Negev; le vallea del Jordan con Jericho - le citate del palmas - usque Segor. ⁴Alora le Senior diceva a Moses: “Isto es le terra que io jurava dar a Abraham, Isaac, e Jacobo, quando io diceva: ‘Io lo dara a tue descendentes’. Io te permitteva de vider lo con tu proprie oculos, ma tu non entrera in ille terra”.

⁵Assi Moses, le servitor del Senior, moriva ibi in le terra de Moab, justo como le Senior habeva dicite. ⁶Le Senior le inhumava in un vallea in le terra de Moab contra Beth-peor, ma usque le die presente nemo sape exactemente ubi es su sepulcro. ⁷Moses habeva cento-vinte annos quando ille moriva. Su viso esseva ancora clar, ni su robustessa deficeva. ⁸Le populo de Israel lugeva pro Moses sur le planas de Moab per trenta dies, usque le periodo customari de lucto terminava.

⁹Ora Josue, filio de Nun, esseva plen del spirito de sapientia, quia Moses habeva imponite su manos super ille. Assi le populo de Israel le obediva, e faceva justo lo que le Senior habeva commandate a Moses.

¹⁰Nulle altere propheta surgeva in Israel sicut Moses, qui cognosceva le Senior facie a facie. 3¹¹Ille habeva facite tote le signos e portentos que le Senior le habeva mandate facer in le terra de Egypto coram Pharaon, su servitores e tote le pais. ¹²Con grande poter^[1] ille habeva facite impressionante actos ante le oculos de omne Israel.

Notas

1. O “un forte mano”