Biblia/Vetule Testamento/Deuteronomio/Deuteronomio 2

←Deuteronomio 1

La Bibia in Interlingua Deuteronomio

Deuteronomio 3→

Deuteronomio

2

Le marcha ab Kadesh Barnea a Moab

¹Alora nos verteva le marcha e adressava nos verso le deserto per le via del Mar Rubie, justo como le Senior me habeva dicite facer, circuiriente le monte Seir per longe tempore.

²A iste puncto le Senior me diceva: ³“Vos circuiva bastante iste monte, nunc dirige vos verso nord. ⁴Da al populo iste instructiones: ‘Nunc vos transira le territorio de vostre fratres, le descendentes de Esau, que habita in Seir^[1]. Illes timera vos, dunque face multe attention. ⁵Non va esser hostil^[2] contra illes, quia de lor pais io dara vos non mesmo un palma de terra. Le monte de Seir io lo dava in possession^[3] a Esau. ⁶De illes vos potera emer con pecunia le mangiar que vos necessita e le aqua pro biber. ⁷Per tote le cammino, io, le Senior tu Deo, te benediceva in toto lo que tu interprendeva^[4]. Io veliava super vos durante que tu transiva iste grande deserto. Per tote iste quaranta annos io, le Senior tu Deo, accompaniava vos^[5] e vos non careva de nihil’”.

⁸Alora nos transiva le territorio de Seir, occupate per nostre fratres, le descendentes de Esau, per le via del Araba, de Ailath e de Asiongaber, que duce in le deserto de Moab. ⁹Deinde le Senior me diceva: “Non molesta Moab provocante les a facer guerra, quia io non te dara alco de lor pais como tu territorio. Isto es proque io dava Ar^[6] in possession al descendentes de Lot. ¹⁰Antiquemente Ar esseva habitate per un racia de gigantes, le Emitas, gente forte, numerose e potente como le Anakitas. ¹¹Alcunes les considerava Raphaita tanto quanto le Anakitas, tamen le Moabitas les appellava Emitas. ¹²Antea le Horitas viveva in Seir, ma le descendentes de Esau les expelleva de lor territorio, les destrueva e se installava in lor placia. Anque le Israelitas faceva le mesmo con le pais que le Senior les donava in possession.

¹³Le Senior les diceva ancora: “E nunc pone vos in marcha^[7] e transi le torrente^[8] Zared!”, e nos faceva assi. ¹⁴Ora, le tempore que nos ambulava ab Kadesh Barnea usque al transito del torrente Zared, esseva de trenta e octo annos, donec le morte de tote le homines de ille generation apte al guerra, justo como le Senior habeva jurate a illes de facer. ¹⁵Vero, il esseva le adverse mano ipse del Senior que les eliminava ab intra le campo donec lor disparition.

Instructiones concernente Ammon

¹⁶Postquam la morte faceva disparer ab intra le communitate^[9] tote le homines de guerra, ¹⁷le Senior me diceva: ¹⁸“Hodie tu transira le frontiera de Moab, illo es, le urbe de Ar. ¹⁹Quando, tamen, tu te approximara al Ammonitas, face attention a non molestar ni provocar les, quia io non te dara alco del terra del Ammonitas, que io jam lo dava in possession al descendentes de Lot. ²⁰Illo es alsi reputate esser le terra del Rephaitas. De facto, le Rephaitas originalmente viveva ibi. Le Ammonitas les appella Zomzommitas^[10]. ²¹Le Rephaita esseva gente forte, numerose e de alte statura como le Anakitas, ma le Senior les habeva facite disparer ab ante le Ammonitas, que les evinceva e se installava in lor placia.²²Isto es exactemente lo queille faceva pro le descendentes de Esau que viveva in Seir quando ille destrueva le Horitas coram illes, si que illes poteva evincer les e stabilir se in ille area usque al presente. ²³Equalmente, le Caphtoritas habeva eliminate le Hevita que habitava in colonias del region de Gaza e habeva se installate in lor territorio.

²⁴Le Senior continuava dicer: “Nunc pone vos in marcha, leva le campamento e transi le torrente Amon! Ecce, io jam poneva in vostre manos Sihon le Amorita, rege de Hesbon, insimul a su pais! Procede! Prende lo! Face le guerra contra ille! ²⁵Iste die ipse io incipera a plenar tote le populos del mundo^[11] con apprehension e terror solmente in audir tu nomine. Illes tremulara e essera succutite in anticipation de tu approche”.

Conquista del regno de Sihon

²⁶Ergo, io mandava nuncios ab Cademoth a Sihon, rege de Hesbon con un proposta de pace: ²⁷“Permitte me transir per tu pais; io adherera strictemente al cammino. Io non declinara ni a dextera ni a sinistra. ²⁸Io te pagara con moneta le mangiar que io necessita e le aqua pro biber. Solmente concede me transito, ²⁹justo como faceva pro me le descendentes de Esau qui vive a Seir e le Moabitas qui vive in Ar, donec io transi in le terra que le Senior, nostre Deo, dona nos. ³⁰Ma Sihon, rege de Hesbon non voleva conceder me transito per su territorio. Le senior, tu Deo, indurava su spirito e le rendeva obstinate a que ille le poneva in tu manos in le die presente. ³¹Le Senior me diceva: “Ecce, io incipeva donar te Sihon e su territorio. Incipe prender possession de su pais. ³²Quando Sihon e tote su truppas sortiva pro incontrar nos in battalia a Jahaz, ³³le Senior nostre Deo le faceva cader in nostre manos. Nos le percuteva iille, su filios e tote su populo. ³⁴Nos occupava tute su citates e poneva cata uno de illos sub le judicamento de Deo^[12], includite le feminas e le infantes. Nos non lassava alcun supervivente. ³⁵Nos servava solmente le bestial e depredava le citates. ³⁶Ab Aroer, que es super le ripa del torrente Amon (illo es le citate in le wadi), e per tote le via de Gilead, nulle citate poteva poner nos resistentia - le Senior nostre Deo dava tote illos a nos. ³⁷Tamen, tu non approchava le pais del Ammonitas, le Wadi Jabbok, le citates del pais collinose, o qualcunque altere placia que le Senior nostre Deo prohibeva nos.

Notas

1. O “Edom” (cfr. Genesis 36:1:8).
2. O “non attacca”.
3. O “como hereditage”.
4. O “in omne opera de tu mano”.
5. O “esseva con vos”.
6. Un citate moabita apud le fluvio Arnon.
7. O “surge”.
8. O “wadi”.
9. O “le populo”.
10. O “Zamita”, cfr. Genesis 14:5.
11. O “le populos que habita sub le celo”.
12. O “non le poneva sub le banno”, “nos sterminava omnes”.