Biblia/Vetule Testamento/Daniel/Daniel 1

Daniel

I

Al servicio de Nabuchodonosor

¹In le tertie anno del regno de Rege Jehoiakim de Juda, le Rege Nabuchodonosor de Babylonia veniva poner le assedio ante Jerusalem. ²Le Senior livrava Rege Jehoiakim de Juda in su poter^[1] e un parte del objectos sacre del templo de Deo^[2]. Ille los portava in le pais de Babylonia^[3] e inricchiva con ille objectos le thesauro de su deo.

³Le rege commandava Ashpenaz, que esseva le superintendente^[4] del officieros de corte, de seliger alcun israelitas de origine regal e nobile - ⁴juvene homines sin defectos physic, belle de aspecto, erudite in tote le brancas del sapientia, intelligente e judiciose, apte a servir al palatio regal e pro inseniar les le scriptura e le lingua del Babyloneses. ⁵Assi le rege assignava a illes un ration quotidian de alimentos ex su delicatessas regal e ex le vino que ille ipse bibeva. Illes debeva esser educate durante tres annos, e pois introducite al servicio del rege.

⁶Il eveniva que inter iste juvene homines il habeva alicunes de Juda: Daniel, Hanania, Mishael e Azaria. ⁷Ma le superintendente del officieros del corte cambiava lor nomines. Ille dava a Daniel le nomine Beltheshazzar, a Hanania Shadrak, a Mishael Meshach, e a Azaria le nomine Abednego.

⁸Daniel, tamen, se proponeva in su corde de non polluer^[5] se mesme mangiante le delicatessas regal o bibente le vino regal. Ergo ille rogava al superintendente del officieros regal le permission de non polluer^[6] se mesme. ⁹Alora Deo faceva que le superintendente del officieros regal reguardava Daniel con sympathia^[7]. ¹⁰Ma ille respondeva a Daniel: “Io time mi senior le rege. Ille ipse decideva lo que vos deberea mangiar e biber. Que evenirea si ille vide que tu pare malnutrite in comparation del altere juvenes de tu etate? Si illo evenirea, tu mitterea mi vita in periculo coram le rege!”. ¹¹Alora Daniel parlava al custode que le superintendente del officieros del corte habeva establite super Daniel, Hanania, Mishael e Azaria: ¹²“Io te preca de poner nos al proba durante dece dies in provider nos vegetabiles pro mangiar e aqua pro biber. ¹³<nowiki>Pois compara nostre aspecto con illos del juvenes que mangia al tabula del rege su delicatessas, e face con nos secundo que tu vide”. ¹⁴Assi le custode conveniva de facer lo que le esseva proponite e poneva les al proba durante dece dies.

¹⁵Al termino del dece dies, lor apparentia esseva melior e lor corpores esseva in sanitate melior que le juvenes que habeva mangiate le delicatessas regal. ¹⁶Assi le custode levava le delicatessas e le vino ab lor dieta e in vice dava a illes un dieta de vegetabiles. ¹⁷Deo concedeva al quatro juvenes sapientia e cognoscentia e les instrueva in omne sorta de literatura e de sapientia - e, in plus, Daniel sapeva interpretar^[8] omne typo de visiones e de sonios.

¹⁸Quando arrivava le tempore de presentar les, secundo le ordine del rege, le superintendente del officieros regal portava les al presentia de Nabuchodonosor. ¹⁹Quando le rege parlava a illes, ille non trovava alicuno melior, in le integre gruppo, que Daniel, Hanania, Mishael e Azaria. Assi, illes entrava al servicio del rege. ²⁰In omne question de sapientia e intelligentia que le rege les demandava, ille les trovava dece vices melior que qualcunque mago o astrologos que il habeva in su integre imperio. ²¹Daniel remaneva al corte usque al prime anno del rege Cyro.

Notas

1. O “manos”.
2. O “casa de Deo”.
3. O “in le terra de Shinar”, un altere nomine pro Babylonia.
4. Se pote traducer alsi “eunucho”, ma non semper iste termino ha le traditional su significato technic.
5. De non remaner ritualmente impur.
6. De non cader in le stato de impuritate ritual.
7. Lit. “le dava gratia e misericordia”.
8. O “habeva intelligentia”.