Biblia/Vetule Testamento/Chronicas/2Chronicas 1

←1 Chronicas 29

Le Biblia in Interlingua Chronicas

2 Chronicas 2→

1 Chronicas

1

Apparition del Senior a Gibeon^[1]

¹Salomon, filio de David, consolidava ergo su autoritate regal proque le Senior era con ille e le magnificava grandemente.

²Salomon se adressava a tote Israel, includite le commandantes responsabile de mille e de cento soldatos, le judices e tote le chefes del familias israelita. ³Salomon e le integre assemblea, se dirigeva verso le centro de culto^[2] que il habeva in Gibeon, proque le tenta^[3] ubi illes incontrava Deo, le Tabernaculo, esseva locate ibi. Illo esseva le tenta que Moses, le serviente del Senior, habeva facite in le deserto. ⁴L’arca de Deo, tamen, habeva essite portate ab Kiriath Jearim al placia que ille habeva preparate pro illo a Jerusalem, in un altere tenta. ⁵Ma le altar de bronzo facite per Bezalel, filio de Uri, filio de Hur, esseva coram le Tabernaculo del Senior. Salomon e tote le assemblea vadeva ibi pro consultar^[4] le Senior. ⁶Salomon ascendeva al altar de bronzo que se trovava coram le Tabernaculo, e ibi ille offereva mille holocaustos.

⁷Ille nocte ipse Deo se revelava^[5] a Salomon e le diceva: “Dice me lo que io deberea dar te”. ⁸Salomon replicava a Deo: “Grande esseva tu misericordia^[6] verso mi patre David e tu me faceva rege in su placia^[7]. ⁹Nunc, ergo, Senior Deo, sia complite le promissa que tu faceva a mi patre David, proque tu ha facite me rege de un populo tanto numerose quanto le pulvere del terra. ¹⁰Da me sapientia e intelligentia a que io pote conducer con efficacia iste populo. Alteremente qui esserea unquam habile de governar^[8] iste tu populo, que es tanto grande?”.

¹¹Deo diceva a Salomon: “Quia isto esseva tu desiro e tu non me ha petite richessas, tresores, gloria, ni le morte de tu inimicos e non mesmo un vita longe, ma tu me peteva sapientia e scientia^[9] pro governar mi populo, del qual io te faceva rege, ¹²sapientia e scientia io te los concede. Ma io te da alsi richessas, tresores e gloria, que surpassa illo de quicunque altere rege del passato o del futuro”.

¹³Postea, Salomon ab le Tenta del Incontro in le centro de culto de Gibeon, retornava a Jerusalem ubi ille regnava super Israel.

Le richessa de Salomon^[10]

¹⁴Salomon accumulava^[11] mille quatro centos carros de guerra e dece duo milles cavallos. Ille los quartierava in citates a illos destinate e in Jerusalem. ¹⁵Le rege faceva que a Jerusalem le argento e le auro esseva tanto abundante como le petras; le ligno de cedro ille lo faceva tanto abundante quanto lo es le sycomoros que il ha in Sephela, ¹⁶Salomon acquireva su cavallos del Egypto e de Coa; le negotiatores del rege lo acquireva de Coa. ¹⁷Illes pagava sex cento pecias de argento pro cata un carro de Egypto, e cento cinquanta pecias de argento pro cata cavallo. Illes alsi los comprava pro revender los al reges del Hittitas e del Arameos.

Notas

1. 1 Reges 3:4-15.
2. O “Alte Loco”.
3. O “tabernaculo”.
4. O “precar”.
5. O “appareva”.
6. O “fidelitate”, “amor”.
7. Pro ille.
8. O “facer decisiones judiciari”, “judicar”.
9. O “discernimento”.
10. 1 Reges 10:26-29.
11. O “colligeva”.