Biblia/Nove Testamento/Thessalonicenses/1Thessalonicenses 3

←1 Thessalonicenses 2

Le Biblia in Interlingua Epistola al Thessalonicenses

1 Thessalonicenses 4→

Prime epistola al Thessalonicenses

Capitulo 3

¹Assi, quando nos non poteva plus attender e voleva haber novas ab vos, nos decideva remaner sol in Athene e ²nos inviava Timotheo, nostre fratre e collaborator pro Deo in le evangelio de Christo, pro confirmar e incoragiar vos in vostre fide, ³de sorta que nemo esseva succutite per iste afflictiones. Vos sape, tamen, que a isto nos esseva destinate^[1]. ⁴Pois que de facto, quando nos ancora esseva inter vos, nos diceva vos in avantia que nos haberea suffrite afflictiones, e assi il eveniva, como vos sape ben. ⁵Assi, quando io non poteva plus attender, io mandava pro saper super vostre fide, de timor que le tentator in alicun maniera tentava vos e nostre labor haberea essite probate inutile.

⁶Ora, tamen, Timotheo retornava ab vos e portava nos le bon nova de vostre fide e de vostre amor, e que vos semper pensa a nos con affecto e desira vider nos sicut nos desidera vider vos! ⁷Assi, in tote nostre suffrentias e afflictiones, nos esseva consolate concernente vos, fratres e sorores, a causa de vostre fide. ⁸Pois que nos nunc vive de novo, si vos remane firme in le Senior. ⁹Proque como poterea nos bastantemente regratiar Deo pro vos, pro tote le gaudio que nos senti a causa de vos, coram nostre Deo? ¹⁰Nos preca intensemente nocte e jorno a poter vider vos in persona^[2] e complir lo que manca a vostre fide.

¹¹Que Deo ipse, nostre Patre e nostre Senior Jesus Christo prepara le via pro venir a vos ¹²e que ille causa vos multiplicar e abundar vostre amor le unes pro le alteres, justo como nos ha pro vos, ¹³pro confirmar vostre cordes in sanctitate a fin de esser irreprochabile coram nostre Deo e Patre, quando le Senior nostre Jesus retornara^[3] con tote su sanctos.

Notas

1. O “vocate”.
2. Litt. “vider vostre facie”.
3. Litt. “venira”.