Biblia/Nove Testamento/Philippenses/Philippenses 4

←Philippenses 3

Biblia in Interlingua Epistola al Philippenses

Colossenses 1→

Epistola al Philippenses

Capitulo 4

Actiones christian

Ergo, mi fratres e sorores, car amicos que io desira ardentemente vider^[1]; vos, qui son mi gaudio e corona: permane in le Senior assi, mi car amicos! ²Io exhorta Evodia e Syntyche concordar^[2] in le Senior. ³Si, io alsi pete te, mi ver companion^[3] adjuva illas. Illas luctava insimul in le ministerio del Evangelio, insimul a me, a Clemente e a mi altere collaboratores, cuje nomines es in le libro del vita. ⁴Gaude semper in le Senior! De novo io dice: Gaude! ⁵Que omnes vide vostre amabilitate! Le Senior es proxime a retornar. ⁶Non sia in anxietate pro ulle cosa! Al contrario, in omne situationes^[4], per preces e petitiones, e con actiones de gratias, vostre requestas sia facite cognoscer a Deo^[5]! ⁷E le pace de Deo, que supera omne comprehension guardara vostre corde e mente in Christo Jesus.

⁸Finalmente, fratres e sorores, toto lo que es ver, toto lo que es digne de respecto^[6], toto lo que es juste, toto lo que es pur, toto lo que es amabile, toto lo que es commendabile, si qualcosa es excellente^[7] o digne de laude, sia illo objecto de vostre consideration! ⁹Lo que vos apprendeva, recipeva, audiva, e videva in me, face lo, e le Deo del pace essera con vos!

Appreciation pro le supporto recipite

¹⁰Io ha multe gaudio in le Senior proque nunc, finalmente, vos de novo exprimeva vostre preoccupation pro me. Certo vos pensava a me antea, ma vos habeva nulle opportunitate de facer qualcosa. ¹¹Io non lo dice proque io me trova in necessitate, pois que io apprendeva contentar me in omne circumstantia. ¹²Io sape viver humilemente e alsi viver in le abundantia. In omne^[8] circumstantia io apprendeva le secreto de esser contente, sia quando io es satiate o ha fame, sia quando io ha multo o nihil. ¹³Io pote facer toto per ille qui me fortifica. ¹⁴Nonobstante, vos faceva ben a participar a mi affliction.

¹⁵E como vos philippenses sape, al comenciamento de mi ministerio evangelic^[9], quando io quitava le Macedonia, necun ecclesia habeva participate a mi supporto^[10] excepte vos solmente, ¹⁶pois que mesmo in Thessalonica, in plus que un occasion, vos mandava alique pro mi necessitate. ¹⁷Io non dice isto proque io require donos. Al contrario, io cerca lo que pote esser creditate a vostre conto^[11]. ¹⁸Io recipeva toto in abundantia e io ha assatis. Io ha tote le necessari proque io recipeva de Epaphrodito lo que vos me mandava - un offerta fragrante, un sacrificio acceptabile, que da multe placer a Deo. ¹⁹E mi Deo supplera a omne vostre necessitates secundo su gloriose ricchessas in Christo Jesus. ²⁰Que le gloria sia date a Deo nostre Patre in le seculos del seculos. Amen.

Salutationes final

²¹Saluta omne le sanctos in Christo Jesus. ²²Le fratres qui es con me hic vos saluta. ²³Tote le sanctos saluta vos, specialmente illes qui pertine al familia de Cesare. ²⁴Le gratia del Senior Jesus Christo sia con vostre spirito.

Notas

1. O “car e desiderate amicos”.
2. O “de haber un mesme sentimento”.
3. Litt. “sub le mesme jugo”.
4. O “in omne cosa”.
5. O “notificate”!
6. O “honorabile”.
7. O “ha alcun virtute”.
8. O “in cata un e omne”.
9. O “quando io comenciava predicar le Evangelio”.
10. O “in le question del dar e del reciper”.
11. O “io recerca plus tosto que le fructo abunda in vos”