Biblia/Nove Testamento/Philippenses/Philippenses 2

←Philippenses 1

Biblia in Interlingua Epistola al Philippenses

Philippenses 3→

Epistola al Philippenses

2

Unitate christian e le humilitate de Christo

¹Assi, si il ha in Christo ulle incoragiamento, ulle consolation providite del amor, ulle communion generate del Spirito, ulle teneressa o misericordia, ²completa mi gaudio e va haber le mesme mente^[1], le mesme amor, le mesme sentimentos, le mesme propositos. ³In vice de esser motivate de ambitiones egoistic o vanitate, cata uno de vos deberea humilemente considerar le alteres plus importante^[2] que se ipse. ⁴Cata uno de vos deberea considerar non solmente su proprie interesses, ma alsi le interesses del alteres. ⁵Vos deberea haber le unes verso le alteres le mesme attitude que Christo.

⁶De facto, ben que ille esseva Deo^[3], ille non considerava su equalitate con Deo qualcosa pro exploitar a su proprie avantage^[4], ⁷ma ille vacuava se ipse e assumeva le condition de servitor^[5]; ille se faceva simile al altere homines e, in participar al natura human^[6], ⁸ille se humiliava e deveniva obediente usque al morte - e mesmo al morte sur un cruce! ⁹Pro iste ration Deo le exaltava e le dava un nomine superior a qualcunque altere nomine, ¹⁰de sorta que cata genu se flecte al nomine de Jesus - in celo, sur le terra, e sub le terra - ¹¹e omne lingua confessa que Jesus Christo es le Senior, al gloria de Deo, le Patre.

Lumines del mundo

¹²Ergo, mi carissime amicos, sicut vos semper me obediva non solmente quando io esseva presente apud vos, ma mesmo de plus in mi absentia, disveloppa^[7] vostre salvation con timor e tremor, ¹³proque il es Deo qui produce in vos tanto le desiderio^[8] quanto le effortio^[9], secundo su proprie consentimento^[10].

¹⁴Face toto sin murmurar e altercar, ¹⁵de sorta que vos sia irreprochabile e pur, filios de Deo sin macula, nonobstante que vos vive in un societate torte e perverse. In illo vos brilla como lumines del mundo^{[11] 16}in tener vos firme al parola del vita a fin que, quando le Christo retornara^[12], io habera ration de esser fer del facto que io non curreva in van ni laborava in van. ¹⁷Mesmo si io es effundite como un libation sur le sacrificio e servicio de vostre fide, io gaude e jubila con tote vos. ¹⁸In le mesme maniera vos alsi deberea gauder e jubilar con me.

Modellos de ministerio

¹⁹Ora, io spera in le Senior Jesus inviar tosto a vos Timotheo, de sorta que io alsi pote esser incoragiate in audir novas concernente vos, ²⁰proque il ha necuno melior que ille, qui prestemente demonstra un tal profunde interesse pro vos. ²¹Alteres es occupate solmente con le cosas proprie, non le cosas de Jesus Christo. ²²Vos tamen cognosce su qualificationes: como un filio qui labora con su patre, ille serviva con me in promover le Evangelo. ²³Assi io spera inviar le si tosto que io potera saper de plus concernente mi situation, ²⁴ben que io confide in le Senior a que io alsi venira tosto a vider vos.

²⁵Pro le momento, tamen, io considerava necessari inviar vos Epaphrodito. Ille es mi fratre, collaborator, camerada, vostre messagero^[13] e providitor ^[14]a mi necessitates. ²⁶Indubitabilemente ille regrettava grandemente non poter esser con vos, e ille esseva multo afflicte proque vos audiva que ille habeva essite malade. ²⁷De facto, ille esseva tanto malade que quasi ille moriva. Deo, tamen, habeva misericordia de ille - e non solmente de ille, ma de me alsi - alteremente io haberea habite un ulterior affliction^[15]. ²⁸Alora, con le plus grande sollicitude io es ardorose de inviar le, de sorta que quando vos le vide, vos pote gauder e io pote esser libere de anxietate. ²⁹Da a ille, assi, le benvenita in le Senior con grande gaudio, e honora personas como ille, ³⁰proque il esseva a causa del obra de Christo que ille quasi moriva. Ille riscava su vita mesme pro suppler a vostre inhabilitate a servir me.

Notas

1. O “ha le mesme sentimentos”, “pensa in le mesme maniera”.
2. O “melior”.
3. O "Ille existeva in le forma de Deo". Le termino grec traducite “forma” indica un correspondentia con le realitate. Le significato de iste phrase, ergo, es que le Christo esseva realmente Deo.
4. O “qualcosa a sasir”.
5. O “forma de sclavo”.
6. O “essente trovate in le forma de homine”, “forma” hic implica que il ha un correspondentia inter forma e realitate. Le Christo appareva simile a le altere humanos, ma non le mesmo, proque ille non esseva peccator.
7. O “realisa”, “elabora”, “completa”, “va verso le completion de vostre salvation”.
8. O “le voler”.
9. O “operar”
10. O “proposito”.
11. O “stellas in le universo”.
12. O “in le die de Christo”.
13. O “apostolo”.
14. O “ministro” (λειτουργός leitourgos).
15. O “affliction super affliction”.