Biblia/Nove Testamento/Petro/2Petro 1

Secunde epistola de Petro

Capitulo 1

Salutation

¹De Simeon^[1] Petro, serviente e apostolo de Jesus Christo, a illes qui, per le justitia del nostre Deo e Salvator Jesus Christo, esseva concedite^[2] un fide tanto preciose quanto le nostre. ²Que vos recipe gratia e pace in abundantia per le medio del plen cognoscentia de Deo e de Jesus, nostre Senior.

Le vocation e le election del christiano

³Le poter divin donava nos toto lo que es necessari pro le vita e le pietate, per le medio del plen cognoscentia de ille qui vocava nos con su proprie gloria e con tote su fortia. ⁴Per illos, ille impartiva a nos le promissas le plus grande e pretiose. Gratias a iste promissas vos potera fugir del corruption que il ha in iste mundo, provocate per le concupiscentia, e participar al natura divin^[3].

⁵Pro iste mesme ration, face omne effortio a que vostre fide sia completate con le excellentia moral^[4]: l’excellentia moral con le cognoscentia; ⁶le cognoscentia con le continentia^[5]; le continentia con le perseverantia^[6]; le perseverantia con le pietate; ⁷le pietate con le amor fraterne; e le amor fraterne con le caritate. ⁸De facto, si vos possede tote isto in abundantia, vos nunquam essera inefficace^[7] o sin fructo in le persecution de un cognoscentia plus profunde^[8] de nostre Senior Jesus Christo. ⁹Del altere latere, ille qui non possede tote isto es cec, id es, ille es myope, durante que ille oblidava que ille esseva purgate de su peccatos passate.

¹⁰Ergo, fratres e sorores, face omne effortio pro confirmar vostre vocation e election, proque, faciente assi, vos nunquam facera passos false, ¹¹e a vos essera concedite generosemente le entrata in le Regno eterne de nostre Senior e salvator Jesus Christo.

Le gloria de Christo e le Parola prophetic

¹²Ergo, iste cosas io intende recordar a vos constantemente, mesmo si vos jam los cognosce e vos es ben estabilite in le veritate que vos jam possede. ¹³Io pensa que es juste, durante que vos vive in iste corpore como in un tenda, que io continua stimular vos con advertimentos. ¹⁴De facto, le Senior Jesus Christo me revelava que multo tosto io debera quitar iste mi tenda^[9]. ¹⁵Pro iste ration io facera alsi omne effortio a que, de post mi obito^[10], vos ha un memoria^[11] de iste cosas.

¹⁶De facto, quando nos faceva cognoscer a vos le advento potente e le magnificentia de nostre Senior Jesus Christo, nos non sequeva fabulas captiose de nostre imagination, ma nos reportava factos contemplate de nostre mesme oculos. ¹⁷Proque ille recipeva de Deo le Patre honor e gloria quando le voce del Gloria Majestose esseva adressate a ille. Le voce diceva: “Iste es mi Filio, mi delecto, in le qual io me complace”. ¹⁸Iste voce que veniva del celo, nos lo ha audite quando nos esseva con ille al sancte monte. ¹⁹Preterea, nos ha le solide fundamento del parolas del prophetas. Vos face ben de audir los con attention, proque illos es como un lumine que resplende in un loco obscur, donec surgera le die, e le stella del matino se levara in vostre cordes. ²⁰Super toto, vos face ben si recognosce isto: omne prophetia del Scriptura non surgeva del imagination^[12] del prophetas ipse, ²¹proque tal prophetias jammais esseva le producto de voluntate human, sed homines, pulsate per le Spirito Sancte, parlava del parte de Deo.

Notas

1. Plure testes textual importante ha “Simeon” (secundo le orthographia hebraic) e non le plus commun “Simon”, cfr. Actos 15:14. Isto es un evidentia del authenticitate de iste epistola.
2. O “recipeva”
3. Quamquam le expression “participar al natura divin” evoca un concepto pagan, illo debe esser interpretate secundo le fide christian. Illo non significa apotheose (le homine que deveni un deo) ma que le credente acquire un connection organic con Deo. A causa de tal connection, Dei pote esser vermente appellate nostre Patre. Iste expression corresponde al formula “in Christo” empleate del apostolo Paulo. Iste affirmation, benque surprendente, non es differente del precaria de Paulo in Ephesios “Assi vos essera reimplite per tote le richessas de Deo” (Ephesios 3:19).
4. O “virtute”.
5. O “dominio de se ipse”, “auto-controlo”.
6. O “patientia”
7. O “vacue”.
8. O “ric”.
9. O “le remotion de mi tenta evenira multe tosto”.
10. O “partita”.
11. O “testimonio scripte”.
12. O “interpretation”.