Biblia/Nove Testamento/Petro/1Petro 5

←1 Petro 4

Le Biblia in Interlingua Epistolas de Petro

2 Petro 1→

Prime epistola de Petro

Capitulo 5

Conducer e viver in le grege de Deo

¹Io obsecra al ancianos que preside le communitate christian e que es inter vos - io, qui es ancian con illes e teste del patimentos de Christo e qui va participar con illes al gloria que es sur le puncto de revelar se: ²pasce le grege de Deo que esseva confidite vos; vigila super illo^[1] non pro coaction, ma de bon grado, pro amor de Deo e non pro profito - isto esserea vergoniose - ma de bon voluntate^[2]. ³Non domina despoticamente super illes que esseva vos confidite, ma sia exemplos pro le grege. ⁴Alora, quando parera le Capite del pastores, vos recipera le corona immarcescibile del gloria.

⁵Similemente, vos qui es plus juvene in le fide^[3], sia submittite al ancianos. E vos omnes, ancianos e juvenes, revesti vos de humilitate le un verso le alteres, quia Deo oppone resistentia al superbos, ma da gratia al humiles^[4]. ⁶Igitur, si vos humilia vos sub le potente mano de Deo, ille exaltara vos a su tempore. ⁷Discarga^[5] in ille omne vostre preoccupationes, ja que ille mesmo se cura de vos.

⁸Sia sobrie e vigila! Vostre adversario, le diabolo, es como un leon que rugi e se move per diverse locos^[6] cercante qui ille poterea devorar. ⁹Oppone resistentia a ille, firme in le fide, quia vos sape que vostre confratres dispergite per le mundo debe supportar le mesme sorta de suffrentias. ¹⁰Post que vos habera suffrite per poc tempore, le Deo de omne gratia, que in Jesus Christo vocava vos a su eterne gloria, restablira vos ille ipse, confirmara vos e dara vos un fundamento secur. ¹¹A ille pertine le poter pro sempre. Amen.

Conclusion

¹²Per le medio de Silvano, que io considera un fratre fidel, io scribeva vos brevemente pro exhortar vos e testificar que isto es le ver gratia de Deo, al qual vos debe attener vos fidelmente. ¹³Le ecclesia in Babylonia, seligite insimul a vos, saluta vos; e le mesmo face Marco, mi filio. ¹⁴Saluta vos, le unes le alteres, con le basio del amor fraterne. Pace a tote vos, a totes que es in Christo. Amen.

Notas

1. O “provide a illo”.
2. O “generosemente”.
3. O simplemente “qui es plus juvene”. Isto non se refere tanto necessarimente al etate juvene, como “ancianos” non se refere necessarimente al vetulessa.
4. Un citation de Proverbios 3:34 (cfr. Jacobo 4:6).
5. Litt. “projecta”.
6. O “circui”, “in circulo”.