Biblia/Nove Testamento/Luca/Luca 3

Luca

3

Johannes le baptisator prepara la via

¹Le dece-quinte anno del regno de Tiberio Cesar, quando Pontio Pilato esseva governator del Judea, Herode tetrarcha de Galilea, su fratre Philippo tetrarcha de Iturea e del territorio del Trachonitas, Lysanias tetrarcha de Abilene, ²in le tempore del sacerdotes principal Annas e Caiaphas le Parola de Deo esseva adressate a Johannes, filio de Zacharia, in le deserto. ³Alora Johannes vadeva de loco a loco sur ambe lateres del fluvio Jordan, predicante un baptismo de repententia pro le remission del peccatos. ⁴Isaiah habeva scribite super Johannes quando ille diceva^[1]: “Ille es un voce qui clama in le deserto: ‘Prepara le via pro le venita del Senior! Leva de su sentieros toto lo que poterea obstacular le^[2]! ⁵Omne valleas essera implite e le collinas essera nivellate. Lo que es tortuose, essera rectificate e vias aspere essera applanate. ⁶Tunc omnes videra le salvation mandate per Deo^[3]”.

⁷Ergo ille diceva al turbas que sortiva ut esser baptisate per ille: “Vos, nidata de viperas: qui vos monstrava fugir ab le ira veniente? ⁸Produce ergo fructos probante que vos vermente vos repentiva de vostre peccatos^[4] e non incipe dicer in vos ipse: ‘Nulle problema! Nos es descendentes de Abraham’. Illo significa nihil, quia Deo poterea suscitar filios de Abraham ex iste lapides ipse! ⁹Nunc le hacha es ponite al radices del arbores: omne arbores que non produce bon fructos essera excidite e jectate in le foco”.

¹⁰Alora le turba le demandava: “Quid ergo nos debe facer?”. ¹¹Johannes les respondeva: “Qui possede duo tunicas, da un de illos al pauperes! Si vos ha alimentos, face similemente: participa illos!”. ¹²Collectores de impostos veniva alsi pro esser baptisate, e le diceva: “Magistro, quid deberea nos facer?”. ¹³Ille replicava: “Collige solmente lo que le governamento require: nihil de plus! ¹⁴Etiam milites le demandava: “E nos, quid deberea nos facer?”. Johannes replicava: “Non concute^[5], ni calumnia alicuno! Contenta vos de vostre soldos!”.

¹⁵Omnes expectava que tosto le Messia^[6] haberea arrivate, e habeva anxietate de saper si Johannes ipse poteva esser le. ¹⁶Johannes assi respondeva a lor question, dicente: “Io vos baptisa per aqua, ma uno es sur le puncto de venir, qui es plus eminente que io, cuje corregias del calceaturas io non es mesmo digne de disligar. Ille vos baptisara per le Spirito Sancte, e per le foco. ¹⁷Ille es preste a separar le vannatura ab le tritico con su vanno. Deinde ille mundara le aira, colligente le tritico in su granario, ma comburente le vannatura con foco inextinguibile”. ¹⁸Il es assi que Johannes exhortava le populo, proclamante le Bon Nova^[7].

¹⁹Quando tamen Johannes reprobava Herodes le tetrarcha^[8] propter su maritage con Herodiade, le uxor de su fratre, e propter tote le mal actiones que ille habeva facite, ²⁰Herodes addeva a illos iste altere mal action: ille faceva recluder Johannes in un prision.

Le baptismo de Jesus

²¹Un die, durante que le turbas se faceva baptisar, Jesus ipse veniva e esseva baptisate. Dum ille orava, le celos se aperiva, ²²e le Spirito Sancte descendeva super ille in forma corporee sicut un columba. Alora se audiva un voce del celo que diceva: “Tu es mi amate Filio: io multo me complace in te”.

Le genealogia de Jesus

²³Jesus habeva circa trenta annos quando ille incipeva su ministerio. Jesus esseva cognoscite^[9] qua le filio de Joseph, qui esseva: le filio de Heli, ²⁴le filio de Matthat, le filio de Levi, le filio de Melchi, le filio de Jannai, le filio de Joseph, ²⁵le filio de Mattathias, le filio de Amos, le filio de Nahum, le filio de Esli, le filio de Naggai, ²⁶le filio de Maath, le filio de Mattathias, le filio de Semei, le filio de Josech, le filio de Joda, ²⁷le filio de Joanan, le filio de Rhesa, le filio de Zorobabel, le filio de Salathiel, le filio de Neri, ²⁸le filio de Melchi, le filio de Addi, le filio de Elmadam, le filio de Er, ²⁹le filio de Jesus, le filio de Eliezer, le filio de Jorim, le filio de Matthat, le filio de Levi, ³⁰le filio de Simeon, le filio de Juda, le filio de Joseph, le filio de Jonam, le filio de Eliakim, ³¹le filio de Melea, le filio de Menna, le filio de Mattatha, le filio de Nathan, le filio de David, ³²le filio de Isai, le filio de Jobed, le filio de Booz, le filio de Salmon, le filio de Naasson, ³³le filio de Aminadab, le filio de Admin, le filio de Arni, le filio de Esrom, le filio de Phares, le filio de Juda, ³⁴le filio de Jacobo, le filio de Isaac, le filio de Abraham, le filio de Thara, le filio de Nachor, ³⁵le filio de Seruch, le filio de Ragau, le filio de Phalek, le filio de Eber, le filio de Sala, ³⁶le filio de Kainam, le filio de Arphaxad, le filio de Sem, le filio de Noah, le filio de Lamech, ³⁷le filio de Mathusala, le filio de Enoch, le filio de Jared, le filio de Maleleel, le filio de Kainan, ³⁸le filio de Enos, le filio de Seth, le filio de Adam, le filio de Deo.

Notas

1. Litt. “in le libro del parolas de Isaia, le propheta”.
2. O “applana su sentieros”.
3. Un citation de Isaia 40:3-5. Benque tote le evangelios synoptic emplea iste citation ab Isaia, solmente Luca cita le versos 5-6. Su objectivo poterea esser attinger al declaration del v. 6, ubi “omnes” (tote le nationes, tote le humanitate, vide le salvation providite per Deo (vide alsi Luca 24:47).
4. O “fructos digne de repententia”.
5. Non fortia alicuno con menacias.
6. O “le Christo”.
7. O “Evangelio”.
8. O “le domino de Galilea”.
9. O “como on lo credeva”.