Biblia/Nove Testamento/Johannes/Johannes 3

←Johannes 2

Le Biblia in Interlingua Johannes

Johannes 4→

Johannes

3

Conversation con Nicodemo

¹Ora, un certe homine, un phariseo qui se appellava Nicodemo, qui esseva membro del consilio governamental del judeos^[1], ²veniva ad Jesus in le nocte, e le diceva: “Rabbi, nos sape que tu es un magistro qui veni de Deo, quia nemo poterea facer le signos miraculose que tu face, nisi Deo es con ille.

³Jesus replicava: “Io te dice le solemne veritate^[2]: A minus que un persona ha nascite de supra^[3], ille non potera vider le regno de Deo”. ⁴Nicodemo exclamava: “Como poterea un homine nascer de novo quando ille es vetere? Ille non poterea retornar in le ventre de su matre e nascer un secunde vice. Nonne?”.

⁵Jesus respondeva: “Io te dice le solemne veritate, nisi un persona nasce de aqua e de spirito, ille non pote entrar in le regno de Deo. ⁶Quid nasce ex carne es carne; e quid nasce ex le Spirito es spirito. ⁷Assi, non sia surprendite que io diceva a vos: Il es necesse que vos nasce de novo. ⁸Le vento^[4] spira ubi illo vole: vos audi le sono^[5] que illo face, ma vos non sape unde illo veni e a ubi illo vade. Assi il es pro quicunque qui ha nascite ex le Spirito”.

⁹Nicodemo replicava: “Quomodo iste cosas pote evenir?”. ¹⁰Jesus le respondeva: “Tu es un magistro in Israel e isto tu ignora? ¹¹Io dice a vos le solemne veritate: nos parla re lo que nos cognosce e testifica de lo que nos videva, ma vos non accepta nostre testimonio. ¹²Si io parlava a vos re cosas terren e vos non crede, como credera vos si io parla a vos re cosas celeste? ¹³E nemo ascendeva in celo, nisi qui descendeva del celo, le Filio del Homine. ¹⁴E sicut Moses levava le serpente in le deserto^[6], ita il es necesse que le Filio del Homine sia levate in alto, ¹⁵ut omnes qui crede in ille habe vita eterne”.

¹⁶Quia isto es le maniera^[7] per le qual Deo amava le mundo: ille dava su Filio unigenite, ut omnes qui crede in ille non peri, ma habe le vita eterne. ¹⁷Quia Deo non mandava su Filio in le mundo pro condemnar^[8] le mundo, sed ut le mundo sia salvate per su medio. ¹⁸Qui crede in ille non va esser condemnate. Qui, tamen, non crede, jam ha essite condemnate, quia ille non ha credite in le nomine del unigenite^[9] Filio de Deo. ¹⁹Ora, isto es le base del judicio: que le lumine ha venite a in le mundo e le gente amava le tenebras plus que le lumine, quia lor mal obras^[10] esseva maligne. ²⁰Omnes qui face mal obras odia le lumine e non veni sub le lumine, ut lor obras non sia exponite. ²¹Qui, tamen, practica le veritate veni sub le lumine, ut sia manifestate que lor obras es facite in Deo.

Johannes le Baptista exalta Jesus

²²Deinde, Jesus e su discipulos quitava Jerusalem e veniva a in le terra de Judea, e ibi ille passava con illes alicun tempore, baptisante le gente. ²³Johannes alsi baptisava a Enon juxta Salim, quia ibi il habeva multe aqua; e le gente continuava venir ad ille pro le baptismo. ²⁴in ille tempore Johannes non ancora habeva essite mittite in prision.

²⁵Ora un disputa surgeva inter alicunes del discipulos de Johannes e un certe Judeo in re le purification ritual. ²⁶Assi le discipulos de Johannes^[11] veniva a ille e le diceva: “Rabbi, le homine que tu incontrava del altere latere del Jordan, in re le qual tu testificava^[12], ecce hic ille baptisa e omnes vade ad ille!”.

²⁷Johannes replicava: “Nemo pote reciper alicun cosa, nisi illo le esseva date del celo. ²⁸Vos ipse pote testificar que io diceva: ‘Io non es le Christo’, ma plus tosto ‘io esseva mandate ante ille’. ²⁹Il es le sponso qui se marita con le sponsa. Le amico del sponso es simplemente felice de star con ille e audir le votos del sponso. Ergo, io es plen de gaudio pro su successo. ³⁰Il es necesse que ille cresce semper de plus e que io diminue”.

³¹Qui veni de supra es superior a omnes; qui es del terra pertine al terra e parla de cosas terren. Qui veni del celo es superior a omnes. ³²Ille testifica de lo que ille ha vidite e audite, ma nemo accepta su testimonio. ³³Quicunque accepta su testimonio confirma clarmente que Deo es verace. ³⁴Quia ille que Deo mandava, exprime le parolas de Deo, quia Deo le da le Spirito sin limites. ³⁵Le Patre ama le Filio e ha ponite toto in su manos. 3:36 Qui crede in le Filio de Deo, ha vita eterne. Quicunque rejecta le Filio de Deo nunquam videra le vita, ma le ira de Deo remane super ille.

Notas

1. O “un capites del Judeos”. Le consilio del hebreos esseva appellate Synedrio.
2. O “amen, amen”.
3. O “de novo”.
4. Le mesme parola grec, πνεύματος (pneumatos), pote esser traducite “vento” o “spirito”.
5. O “voce”.
6. Un referentia a Numeros 21:5-9.
7. O “quanto”
8. O “judicar”.
9. O “sol e unic”.
10. O “age malmente”.
11. O “illes”.
12. Que tu identificava qua le Messia.