Biblia/Nove Testamento/Jacobo/Jacobo 5

←Jacobo 4

Le Biblia in Interlingua Epistola de Jacobo

1 Petro 1→

Epistola de Jacobo

Capitulo 5

Admonition al opulentes

¹Vos, gente opulente, audi ben lo que io nunc va dicer vos: plora e geme pro le disgratias que es sur le puncto de cader super vos! ²Vostre richessas va putrescer e vostre belle vestes essera mangiate per le tineas! ³Vostre auro e vostre argento va oxydar se, e su oxydo essera un testimonio que essera empleate contra vos; illo consumera mesmo vostre carne sicut foco. Il es isto que vos accumulava pro le fin del tempores^[1]! ⁴Ecce, le salario que vos defraudava al laboratores qui falcava vostre campos crita contra vos, e le critos del falcatores perveniva al aures del Senior Omnipotente^[2]! ⁵Super le terra vos viveva un vita de placeres e de vitios. Vos ingrassiava ma como bestias destinate al macello^[3]! ⁶Vos condemnava le justo, vos le assassinava, e ille non opponeva vos resistentia.

Patientia durante le suffrentia

⁷Sia patiente, fratres, usque al advento^[4] del Senior. Reguarda como le agricultor expecta le preciose fructo del terra, e ille es patiente donec ille va reciper le pluvias del autumno e del primavera. ⁸Vos alsi sia patiente e reconforta vostre cordes, proque le advento^[4] del Senior es proxime. ⁹Non murmura, fratres, le unes contra le alteres, ut vos non sia judicate; ecce, le judice es jam al porta del citate. ¹⁰Como un exemplo de suffrentia e de patientia, fratres, prende le prophetas qui parlava in le nomine del Senior. ¹¹Pensa a como nos considera beate illes qui remaneva firme nonobstante le probas que illes suffreva. Vos audiva del patientia^[5] de Job, e vos videva alsi le proposito [del suffrentia del Senior], quia le Senior es plen de compassion e de misericordia^[6].

Conclusion

¹²E super toto, fratres, non va jurar, ni per le celo ni per le terra, ni con alicun altere sorta de juramento. Va dicer "si" quando il es "si", e "no" quando il es "no", ut vos non cade sub judicio.

¹³Si alicuno inter vos suffre, que ille preca! Si ille es allegre, que ille canta psalmos^[7]! ¹⁴Si alicuno inter vos es infirme, que ille manda vocar le ancianos^[8] del ecclesia, e que illes preca pro un tal persona, unguente le con oleo in le nomine del Senior! ¹⁵Iste precaria, facite con fide, salvara le infirmo, e le Senior le facera levar de su lecto; e si ille committeva alicun peccato, illo le essera remittite^[9]. ¹⁶Confessa, ergo, vostre peccatos le unes al alteres a fin que vos sia resanate! Le precaria fervente de un persona juste es multo efficace^[10]. ¹⁷Elia esseva un homine como nos, e ille se poneva a precar con insistentia ut nulle pluvia caderea, e nulle pluvia cadeva durante tres annos e sex menses. ¹⁸Deinde ille se poneva de novo a precar, e le celo dava le pluvia, e le terra vadeva producer su fructo.

¹⁹Fratres mie, si alicuno inter vos se disviava errante del veritate, e un altere le face retornar sur le recte via, ²⁰ille debe saper que qui face retornar un errante peccator disviate salvara su anima del morte e coperira un multitude de peccatos.

Notas

1. O: “il es isto que vos thesaurisava pro le ultime dies”.
2. O “Senior del universo”.
3. Litt. “vos ingrassiava vostre cordes pro le die del macello”. Jacobo dice que iste personas opulente, in vice de querer liberation del condemnation, defiava le lege de Deo e se rendeva objectos de su judicio.
4. O “venita”, “retorno”.
5. O “resistentia”.
6. Allusion a Exodo 34:6; Nehemia 9:17; Psalmo 86:15; 102:13; Joel 2:13; Jona 4:2.
7. O “laudes”.
8. Litt. “le presbyteros”, le responsabiles del conduction del communitate christian.
9. O “pardonate”.
10. O “potente”, “vale multo”.