Biblia/Nove Testamento/Jacobo/Introduction
Introduction al epistola de Jacobo[edit]
Autor. Le autor de iste apistola identifica se mesme como Jacobo (1:1). Probabilemente ille esseva un del frates ipse de Jesus e leader del communitates christian de Jerusalem (Actos 15). In le Nove Testamento il ha quatro homines que se appella assi. Le autor de iste epistola non poteva esser le apostolo Jacobo, proque ille moriva troppo tosto (AD 44) pro esser lo. Le altere duo homines que se appellava Jacobo non habeva ni le stato ni le influentia que habeva le autor de iste epistola. Jacobo esseva un del plure fratres de Jesus, forsan le plus ancian, quia ille pare primo in le lista de Mattheo 13:55. Incipientemente ille non credeva a lo que Jesus diceva de se, e mesmo ille le defiava e mal comprendeva su mission (Johannes 7:2-5). Plus tarde ille deveniva multo notabile in le communitate christian. Ille esseva un del persona seligite pro testificar al resurrection (cfr. 1 Corinthios 15:7). Le apostolo Paulo le appella “un columna” del ecclesia (Galatas 2:9). Paulo, in su visita a Jerusalem post su conversion, interloqueva con Jacobo (Galatas 1:19). Le mesmo eveniva durante le ultime visita de Paulo (Actos 21:18). Jacobo esseva un leader in le importance Concilio de Jerusalem (Actos 15:13). Juda poteva identificar se simplemente como “un fratre de Jacobo” (Juda 1:1), tanto ben cognite esseva Jacobo. Ille moriva martyre circa in le anno AD 62.
Data. Alcunes data iste epistola in le prime annos 60. il ha indicationes, tamen, que illo esseva scribite ante le AD 50. Su natura distinctemente hebraic suggere que illo esseva componite quando le ecclesia esseva prevalentemente componite de hebreos. Illo reflecte un ordinamento simple del ecclesia - su officieros es appellate “ancianos” (5:14) e “magistros” (3:1). Nulle referentia es facite al controversia super le circumcision de neophytas originante del paganismo. Ille usa ancora le termino “synagoga” pro referer se al placia ubi le communitate christian se reuniva (2:2). Si le datation suggerite es correcte, iste epistola es forsan le prime scripto del Nove Testamento - con le possibile exception de Galatas.
Recipientes. Le recipientes de iste epistola es expressemente mentionate solmente in 1:1 “Al dece-duo tribos que reside in le Diaspora”. Alcun eruditos opina que iste expression se refere solmente al christianos in general, ma le termino “dece-duo tribos” se applicarea melio al christianos hebree. Etiam, un audientia hebraic esserea obviemente plus apte propter le natura hebraic de iste epistola (p. ex. le uso del titulo hebraic pro Deo: kyrios sabaoth, le Senior Omnipotente). Que le recipientes esseva christianos es clar de 2:1; 5:7-8. On suggereva plausibilemente que istes esseva credentes del prime ecclesia de Jerusalem que, depost le morte de Stephano, se disperdeva usque a Phenicia, Cypro e Antiochia de Syria (cfr. Actos 8:1; 11:19). Isto explicarea le referentias de Jacobo a probas e oppression, su directe cognoscentia del lectores e le natura autoritari de iste epistola. Quam leader del ecclesia de Jerusalem, Jacobo scribeva como un pastor pro instruer e incoragiar su populo dispergite durante su difficultates.
Character distinctive. Le character distinctive de iste epistola es: (1) su clar natura hebraic; (2) su emphase super un Christianismo vital characterisate de bon obras e de un fide operante (le ver fide debe e essera accompaniate per un stylo de vita consequente); (3) un organisation simple; (4) su familiaritate con le inseniamento de Jesus preservate in le Sermon sur le Monte (compara 2:5 con Mattheo 5:3; 3:10-2; con Mattheo 7:15-20; 3:18; con Mattheo 5:9; 5:2-3; con Mattheo 6:19-20; 5:12; con Mattheo 5:33-37); (5) le similaritate con scriptos como le Proverbios; (6) su greco excellente.