Biblia/Nove Testamento/Corinthios/2Corinthios 9

2 Corinthios

9

Le preparation del dono

¹Il non esserea necessari^[1] que io scribe vos in re iste contribution^[2] pro le sanctos, ²proque io cognosce vostre bon disposition a adjutar. Io continua vantar me con le macedones de illo. Achaia esseva preste a contribuer desde le anno passate, e vostre zelo in participar incoragiava^[3] les multo. ³Io, tamen, inviava iste fratres pro assecurar me que nostre vanteria concernente vos in iste caso non sia infundate^[4], assi que vos sia preste como io continua dicer les. ⁴Pois que si alicuno del macedones veni con me e trova que vos non es preste a donar, nos esserea avergoniate (e vos alsi) a causa del fiducia que nos habeva in vos. ⁵Ergo, io reputava necessari exhortar iste fratres de vader a vos in avantia e arrangiar anticipatemente le generose contribution que vos promitteva^[5], a que illo sia preste como un dono generose^[6] e non como qualcosa que vos senti vos fortiate facer.

⁶Le question es: qui semina scarsemente alsi recoltara scarsemente, e qui semina generosemente^[7] alsi recoltara generosemente. ⁷Cata uno de vos deberea dar secundo lo que ille se proponeva in su corde, non, tamen, in maniera reluctante^[8] o proque ille se senti fortiate a facer lo^[9], proque Deo ama le personas qui dona con gaudio. ⁸Deo, de facto, pote facer abundar in vos omne gratia, de sorta que, habente semper assatis de toto in omne maniera^[10], vos superabunda in tote bon obras. ⁹Sicut il es scribite: “Ille dispersava amplemente, ille donava al povres; su justitia remane pro semper^[11]”. ¹⁰Ora Deo, qui provide le seminator de semine e de pan^[12], multiplicara e supplera vostre provision de semines e causara le crescentia de vostre recolta de justitia. ¹¹Vos essera inricchite in omne maniera de sorta que vos pote esser generose in omne occasion: isto producera per nostre medio actiones de gratias a Deo, ¹²proque le servicio de iste ministerio non solmente supple al necessitates del sanctos, ma illo alsi disborda con multe actiones de gratias a Deo. ¹³Per le proba date con iste ministration^[13], illes glorificara Deo a causa de vostre obedientia al confession del evangelio de Christo e del generositate^[14] de vostre contribution pro illes e pro omnes. ¹⁴In ultra, per lor preces in vostre favor, illes alsi demonstra lor affection pro vos a causa del gratia extraordinari^[15] que Deo dava vos. ¹⁵Gratias a Deo pro su ineffabile^[16] dono!

Notas

1. O “superflue”.
2. O “servicio”, “ministerio”.
3. O “stimulava”.
4. O “vacue”.
5. O “le benediction”.
6. O “un benediction”.
7. O “abundantemente”.
8. O “como si ille lo regrettava”.
9. O “de necessitate”.
10. O “omne sufficientia”.
11. Citation del Psalmo 112:9.
12. Le texto adde: “pro mangiar”, o “como alimento”.
13. O “ministerio”, “servicio”.
14. O “consociation”.
15. O “supereminente”.
16. O “pro le dono que nos nunquam poterea adequatemente describer”.