Biblia/Nove Testamento/Corinthios/2Corinthios 8

←2 Corinthios 7

Le Biblia in Interlingua Litteras al Corinthios

2 Corinthios 9→

2 Corinthios

8

Completar le recolta pro le sanctos

¹Ora, fratres e sorores, nos desidera informar vos in re le gratia de Deo date al ecclesias de Macedonia, ²cuje abundante gaudio e extreme povressa, durante un grande proba de affliction, disbordava in le ricchessa de lor generositate. ³Pois que io pote testificar que illes donava non solmente secundo lor possibilitate ma mesmo ultra lor possibilitates. Illes lo faceva spontaneemente, ⁴supplicante nos con grande insistentia pro haber le privilegio de participar al sustentamento del sanctos. ⁵E illes lo faceva non solmente como nos sperava, ma illes primo donava se mesme al Senior e pois a nos per le voluntate de Deo. ⁶Assi, nos exhortava Tito a que, sicut ille habeva previemente comenciate iste obra, assi ille vadeva completar iste gratia pro vos. ⁷Ma, sicut vos excelle^[1] in toto - in fide, in parola, in cognoscentia, in omne sollicitude e in le amor que nos inspirava in vos - vole ben exceller in iste gratia alsi. ⁸Io non dice isto como un commando, ma io vole probar le genuinitate^[2] de vostre amor in comparar lo con le sollicitude de alteres.

⁹Pois que vos cognosce le gratia^[3] de nostre Senior Jesus Christo qui, essente ric, se faceva povre pro amor de vos, a fin que, per su povressa, vos devenirea ric. ¹⁰Ecce assi mi opinion in re iste question: illo es pro vostre avantage, proque vos jam comenciava ben le anno passate, non solmente facer lo, ma alsi desiderar facer lo. ¹¹Va complir, ergo, lo que vos comenciava. Vos esseva alacre in voler lo facer, nunc va completar lo secundo vostre possibilitates^[4]. ¹²Pois si le alacritate^[5] es presente, le dono ipse es acceptabile secundo lo que on possede, non secundo lo que on non possede. ¹³Io non dice isto pro alleviar le difficultate de alteres per affliger vos con cargas onerose, ma como un question de equalitate. ¹⁴Al tempore presente vostre abundantia supple lor necessitates a fin que, in le futuro, lor abundantia va suppler vostre necessitate: assi il habera equalitate, ¹⁵como il es scribite: “Ille qui recoltava multo non habeva troppo, e ille qui habeva poco non careva de nihil^[6]”.

Le mission de Tito

¹⁶Ma gratias a Deo, le qual poneva in le corde de Tito le mesme devotion ^[7]que io ha pro vos, ¹⁷proque non solmente ille acceptava nostre requesta, ma essente multo alacre, ille veni a vos de su proprie voluntate. ¹⁸Nos invia con ille le fratre qui es laudate per omne ecclesias pro su labor in diffunder le evangelio. ¹⁹In ultra, iste fratre ha alsi essite designate per le ecclesias como nostre companion de viage durante que nos administra iste dono generose^[8] al gloria del Senior ipse e pro monstrar nostre bon voluntate^[9]. ²⁰Nos faceva isto como precaution a que nemo poterea blasmar^[10] nos concernente iste dono generose que nos administra, ²¹proque nos preoccupa nos de lo que es juste non solmente ante le Senior, ma alsi ante le homines^[11]. ²²E nos invia con illes un nostre fratre, cuje diligentia in multe cosas nos ha plure vices probate, ma nunc multo plus que unquam antea, a causa del grande fiducia que ille ha de vos. ²³Si il ha alicun dubita in re Tito, ille es mi partenario e collaborator inter vos; si il ha alicun dubita in re nostre fratres, illes es messageros^[12] del ecclesias, un gloria de Christo. ²⁴Alora, va monstrar apertemente a les le proba de vostre amor e del vanteria que nos ha de vos.

Notas

1. O “abunda”.
2. O “sinceritate”.
3. O “generositate”.
4. O “secunde vostre medios”.
5. O “le bon voluntate”.
6. Citation de Exodo 16:18.
7. O “alacritate”, “sollicitude”.
8. O “collecta”.
9. O “bon disposition”.
10. O “discreditar”.
11. Un allusion a Proverbios 3:4.
12. O “apostolos”, “inviatos”.