Biblia/Nove Testamento/Corinthios/2Corinthios 13

2 Corinthios

13

Le tertie visita de Paulo a Corintho

¹Isto es le tertie vice que io veni a visitar vos. Un facto potera esser legalmente establite solmente super le testimonio de duo o plus^[1] testes^[2]. ²Io diceva antea durante mi secunde visita e ora, ben que absente, io dice ancora a illes qui previemente peccava e a tote le resto, que si io veni de novo, io non sparniara^[3] alicuno, ³viste que vos require un proba que Christo parla per me. Ille non es debile verso vos ma es potente inter vos. ⁴Sin dubita ille esseva crucifigite in debilitate, ma nunc ille vive pro le potentia de Deo. Pois que mesmo nos es debile in ille, ma in tractar con vos nos essera vive con ille per le potentia de Deo^[4]. ⁵Submitte vos mesme a un test^[5] pro vider si vos es in le fide; examina vos mesme! Esque vos non recognosce concernente vos mesme que Jesus Christo es in vos - a minus que vos falle iste test^[6]. ⁶E io spera que vos recognosce que nos non falleva le test^[7]! ⁷Ora nos preca Deo a que vos non face nihil de mal, non al fin de apparer que nos passava le test^[8], ma al fin que vos face lo que es juste^[9], mesmo si il poterea apparer que nos falleva nostre test. ⁸Pois que nos non pote facer nihil contra le veritate, ma solmente in favor del veritate. ⁹Pois que nos gaude quandocunque nos es debile, ma vos reputa esser forte. E nos preca pro isto: que vos pote devenir plenmente qualificate^[10]. ¹⁰A causa de isto io scribe vos iste cosas durante mi absentia, de sorta que quando io essera presente, io non debera tractar vos severmente per usar mi autoritate - le Senior lo dava a me pro edificar, non pro destruer.

Exhortationes final e salutes

¹¹Finalmente, fratres e sorores, sia gaudiose, pone toto in ordine^[11], sia incoragiate, concorda le unes con le alteres, vive in pace e le Deo del amor e del pace essera con vos. ¹²Saluta le unes le alteres con un sancte basio. Tote le sanctos saluta vos. ¹³Le gratia del senior Jesus Christo, e le amor de Deo, e le communion del Spirito Sancte sia con vos omnes.

Notas

1. Litt. “tres”.
2. Citation de Deuteronomio 19:15.
3. O “io non essera indulgente”, o “io non pardonara”.
4. O “nos vivera insimul con ille pro le poter de Deo verso vos”.
5. O “pone vos al proba”.
6. O “si vos es disqualificate”, o “a minus que vos sia reprobate”.
7. O “non esseva reprobate”. Illo es, le test del autoritate apostolic, que nos es vermente apostolos.
8. O “que nos es approbate”.
9. O “lo que es bon”.
10. O “plenmente equipate”, o “nos desira vostre perfection”.
11. O “sia perfecte”.