Biblia/Nove Testamento/Corinthios/1Corinthios 9

←1 Corinthios 8

Le Biblia in Interlingua Litteras al Corinthios

1 Corinthios 10→

1 Corinthios

9

Le derectos del Apostolos

¹Esque io non es libere? Esque io non es un apostolo? Esque io non ha vidite le Senior Jesus? Esque vos non es mi obra in le Senior? ²Si pro alteres io non es un apostolo, pro vos certemente io lo es, proque vos es le confirmation^[1] ipse de mi apostolato in le Senior. ³Isto es mi defensa ante illes qui me examina. ⁴Esque nos non haberea le derecto a un supporto financiari^[2]? ⁵Esque nos non haberea le derecto al compania de un sposa credente, como le altere apostolos, e le fratres del Senior e Cepha? ⁶O solmente io e Barnaba ha le derecto de non laborar? ⁷Qui servi in le armea a su proprie expensas? Qui planta un vinia e non mangia de su fructos? Qui cura un grege e non se alimenta de su lacte? ⁸Esque io dice iste cosas solmente sur le base del senso commun^[3], o esque le Lege non dice isto alsi? ⁹Pois que in le lege de Moses es scribite: “Tu non musellara tu bove durante que ille calca le grano^[4]”. Esque Deo se interessa hic al boves? ¹⁰O Ille certemente hic parla pro nostre beneficio? Isto esseva scribite pro nos, proque le arator e le disgranator deberea laborar in le sperantia de gauder illes mesme del recolta. ¹¹Si nos seminava inter vos benedictiones spiritual, esque il esserea troppo recoltar ex vos cosas material? ¹²Si alteres recipe iste derecto ab vos, esque nos non lo meritarea de plus?

Nos, tamen, non faceva uso de iste derecto. Al contrario, nos supporta toto pro non devenir un obstaculo al Evangelio de Christo. ¹³Esque vos non sape que illes qui servi in le templo mangia le alimentos del templo^[5], e que illes qui servi regularmente al altar recipe un parte de lo que ibi es offerite? ¹⁴In le mesme maniera, le Senior commandava a illes qui proclama le Evangelio de viver del Evangelio. ¹⁵Io, tamen, non me serviva de iste derecto. E io non scribe iste cosas de sorta que qualcosa de simile sia facite pro me. De facto, il esserea melio pro me morir que - nemo me privara del ration de mi vanteria^[6]. ¹⁶Proque si io predica le Evangelio, io ha nulle ration de vantar^[7] me, proque io es compellite^[8] de facer lo. Guai, si io non predica le Evangelio! ¹⁷Pois que si io lo face voluntarimente, io recipera un recompensa. Si, tamen, io lo face con reluctantia, me esseva confidite un responsabilitate. ¹⁸Qual es, ergo, mi recompensa? Que, quando io predica le Evangelio, io pote offerer le Evangelio gratis, e assi non servir me plenmente de mi derectos in le Evangelio^[9].

¹⁹Durante que io es libere de toto, io pote facer me servitor de omnes, a fin de ganiar le major numero possibile de personas. ²⁰Pro le judeos io deveniva como un judeo pro ganiar le judeos. Pro illes qui es subjecte al leges del israelitas, io me subjectava a lor leges (ben que io non sia plus subjecte al leges del israelitas) pro ganiar les qui es subjecte a tal leges. ²¹Pro illes qui non es subjecte al leges del israelitas^[10], io deveniva como uno qui non es subjecte a tal leges (ben que io non sia sin le Lege de Deo, ma sub le Lege de Christo) pro ganiar les qui non es subjecte al leges del israelitas. ²²Pro le debiles, io deveniva debile pro ganiar le debiles. Io deveniva toto a totes, a fin que io salva alicuno per tote le medios possibile.

²³Io face tote isto pro le Evangelio, pro participar a tote su benedictiones^[11].

²⁴Esque vos non sape que tote le cursores in un stadio compete, ma solmente uno recipe le premio? Assi, curre pro vincer! ²⁵Cata competitor se subjecta a un stricte trainamento^[12]. Illes lo face a fin de reciper un corona corruptibile, ma nos recipe un corona incorruptibile.

²⁶Assi, io non curre al aventura o boxa como uno qui colpa le aere. ²⁷Al contrario, io submitte mi corpore a un stricte disciplina^[13] e lo trahe in subjection^[14], de pavor que, habente predicate a alteres, io mesme sia disqualificate^[15].

Notas

1. O “sigillo”.
2. O “a mangiar e a biber”.
3. O “secundo le homines”, “secundo le autoritate human”, “judicamento human”.
4. Citation de Deuteronomio 25:4.
5. O “labora in le cosas sancte”.
6. Secundo le stilo de Paulo le phrase se interrumpe al puncto ubi nos poneva un tracto de union.
7. O “gloriar”.
8. O “me es imponite un necessitate”.
9. O “sin usar le derecto que su predication me confere”.
10. O “sin lege”.
11. O “a illo”.
12. O “debe exercer autocontrolo in toto”.
13. O “autocontrolo”.
14. O “lo rende mi servitor”, o “lo rende mi sclavo”.
15. O “reprobate”.