Biblia/Nove Testamento/Corinthios/1Corinthios 15

1 Corinthios

15

Le resurrection de Christo

¹Ora, fratres e sorores, io declara^[1] vos le Evangelio que io predicava vos, que vos recipeva, in le qual vos persevera^{[2] 2}e per le qual vos es salvate si vos tene vos firmemente al parola que io predicava^[3] vos, a minus que vos credeva in van. ³Pois que io primarimente^[4] transmitteva^[5] vos le mesmo que io recipeva, illo es, que Christo moriva pro nostre peccatos secundo le Scripturas, ⁴e que ille esseva sepelite, e que ille esseva resuscitate^[6] le tertie die secundo le Scripturas, ⁵e que ille appareva a Cephas e pois a le Dece-duo. ⁶Pois ille appareva a plus que cinque centos fratres e sorores in un vice, le major parte del quales vive nunc e alicunes non es plus con nos^[7]. ⁷Pois ille appareva a Jacobo, e pois a tote le apostolos, ⁸e, ultime de totes, como uno nascite foras de tempore^[8], ille appareva a me alsi. ⁹Pois que io es le plus insignificante^[9] del apostolos: de facto io non es digne de esser appellate apostolo, proque io persecutava le ecclesia de Deo. ¹⁰Pro le gratia de Deo, tamen, io es lo que io es, e le gratia que me esseva concedite non esseva van. De facto, io laborava multo plus que tote illes - a dicer, non io, ma la gratia de Deo que opera in me. ¹¹Si il se tracta de illes o de me, non importa, isto es lo que nos predica e isto es lo que vos credeva.

Nulle resurrection?

¹²Ora, si on predica que Christo resuscitava^[10] ex le mortos, como pote alicunes de vos dicer que il ha nulle resurrection del mortos? ¹³Ma si il ha nulle resurrection del mortos, alora non mesmo Christo esseva resuscitate. ¹⁴E si Christo non esseva resuscitate, alora nostre predication es futile^[11] e mesmo vostre fide es vacue^[11]. ¹⁵In ultra, nos esserea trovate esser false testes de Deo, proque nos testificava contra Deo que ille resuscitava Christo del mortos, quando, in realitate, ille non le resuscitava, si vermente le mortos non resuscita. ¹⁶Proque si le mortos non es resuscitate, alora non mesmo Christo esseva resuscitate. ¹⁷E si Christo non esseva resuscitate, vostre fide es sin valor^[12]; vos es ancora in vostre peccatos. ¹⁸In ultra, illes qui moriva^[13] in Christo esseva alsi perdite^[14] pro semper. ¹⁹Si nos sperava in Christo solmente pro iste vita, nos es, de tote le homines, le plus digne de commiseration.

²⁰Ora, tamen, Christo esseva resuscitate ex le mortos. Ille esseva le primitia de illes qui dormi (in le somno del morte). ²¹De facto le morte veniva per un homine^[15], e le resurrection del mortos alsi veniva per un homine^[16]. ²²Pois que justo como in Adam totes mori, alsi in Christo totes essera vivificate. ²³Ma cata uno in su proprie ordine: Christo, le primitia; pois, quando Christo retornara^[17], illes qui le appertine^[18]. ²⁴Alora venira le fin, quando ille livrara le regno a Deo le Patre, quando ille habera annihilate omne imperio, omne potentia e potestate. ²⁵Pois que ille debe regnar usque ille ponera tote su inimicos sub su pedes. ²⁶Le ultime inimico que ille annihilara essera le morte. ²⁷Proque Deo poneva tote le cosas in subjection sub su pedes^[19]. Quando, tamen, ille dice que “tote le cosas” ha essite ponite in subjection, il es clar que isto excepta^[20] ille qui poneva tote le cosas in subjection a Deo. ²⁸Quando, alora, tote le cosas essera subjectate a ille, alora le Filio ipse se subjectara a ille qui subjectava tote le cosas a ille, de sorta que Deo essera toto in totes.

²⁹Alteremente, que facera illes qui es baptisate pro le mortos? Si in nulle maniera le mortos resuscita, alora proque illes se faceva baptisar pro le mortos? ³⁰Pro qual ration, alsi, nos affronta periculos cata momento? ³¹Io vos assecura, fratres e sorores, pro le satisfaction que io senti pro vos in Christo Jesus, nostre Senior, que cata die io es in periculo de morte. ³²Si solmente pro motivos human io luctava contra bestias salvage in Epheso, qual beneficio isto poterea dar me? Si le mortos non resuscita, vamos mangiar e biber, proque deman nos morira^[21]. ³³Non sia decipite: “Mal companiones corrumpe le bon character^[22]”. ³⁴Sia sobrie, como il conveni, e cessa peccar! Proque alicunes ha nulle cognoscentia de Deo - io dice isto a vostre vergonia!

³⁵Alicuno, tamen, dicera: “Como resuscita la mortos? E con qual sorta de corpore illes venira? ³⁶Stupide! Lo que tu semina non revive si primo illo non mori. ³⁷Lo que tu semina non es le corpore que nascera, ma un simple grano - como de frumento o de alicun altere specie. ³⁸Ma Deo da a illo un corpore secundo que ille planava, a cata uno del semines un corpore sue proprie. ³⁹Non tote le carnes es le mesme carne. Le esseres human ha un sorta de carne, le animales un altere, le aves e le pisces un altere. ⁴⁰Il ha, in ultra, corpores celeste e corpores terrestre. Le gloria del corpores celeste es de un sorta e illo del corpores terrestre de un altere. ⁴¹Il ha le gloria del sol, e un altere gloria del luna e un altere gloria del stellas, e mesmo le gloria de un stella differe del altere stellas.

⁴²Le mesmo eveni con le resurrection del mortos. Lo que es seminate^[23] es corruptibile, lo que resurge es incorruptibile. ⁴³Illo es seminate con dishonor, ma illo resurge gloriosemente; illo es seminate in debilitate ma illo resurge in potentia. ⁴⁴Illo es seminate corpore natural, ma illo resurge corpore spiritual. Si il ha un corpore natural, il ha alsi un corpore spiritual. ⁴⁵Assi il es anque scribite: Le prime homine, Adam, deveniva un esser vivente^[24]. Le ultime Adam deveniva un spirito que da vita. ⁴⁶Le corpore spiritual, tamen, non veniva primo. Primo veniva le corpore natural^[25] e pois le corpore spiritual. ⁴⁷Le prime homine es terrestre, facite de pulvere; le secunde homine es celeste^[26]. ⁴⁸Qual es le terrestre, tales es alsi le terrestres, e qual es le celeste, tales alsi es le celestes. ⁴⁹Sicut nos portava le imagine del terrestre, nos portara alsi le imagine del celeste.

⁵⁰Ora, isto es lo que io vole dicer, fratres e sorores: carne e sanguine non pote hereditar le regno de Deo, ni pote le corruptibile hereditar le incorruptibile. ⁵¹Ascolta, io vole dicer vos un mysterio: non omnes morira^[27], ma nos omnes essera transformate - ⁵²in un momento, in un batter del palpebras, quando le trompa sonara. Pois que le trompa sonara e le mortos essera resuscitate incorruptibile, e nos essera transformate. ⁵³De facto, iste corpore corruptibile debe revestir le incorruptibilitate, e iste corpore mortal debe revestir le immortalitate. ⁵⁴Ora, quando iste corruptibile essera revestite del incorruptibile, e iste mortal essera revestite de immortalitate, alora essera realisate lo que es scribite: Le morte essera devorate victoriosemente^{[28] 55}Ubi es, o morte, tu victoria? Ubi es, o morte, tu aculeo? ⁵⁶Le aculeo del morte es le peccato, e le poter del peccato es le Lege^[29]. ⁵⁷Ma gratias a Deo, ille da nos le victoria per le medio de nostre Senior Jesus Christo! ⁵⁸Alora, fratres e sorores mie, sia firme, constante! Semper excelle^[30] in le obra del Senior in saper que vostre travalio non es inutile^[31] in le Senior.

Notas

1. O “io desidera clarificar pro vos”.
2. O “es firme”.
3. O “annunciava”.
4. O “como question de importantia primari”.
5. O “inseniava”.
6. O “resuscitava”.
7. O “dormi”, phrase idiomatic pro “morir”.
8. O “como un infante abortate”.
9. O “le minor”.
10. O “ha essite resuscitate”.
11. O “van”.
12. O “false”.
13. Litt. “cadeva addormite” (euphemismo).
14. O “es perite”.
15. Un referentia a Adam.
16. Un referentia a Christo.
17. O “veni”.
18. O “illes qui es de Christo a su venita”.
19. Citation de Psalmo 8:6.
20. O “non include”.
21. Allusion a Isaia 22:13; 56:12.
22. Un citation del poeta grec Menandro, Thais 218, que Paulo usa in maniera proverbial.
23. Le corpore seminate.
24. O “un persona vivente”. Citation de Genesis 2:7.
25. O “del terra”.
26. O “del celo”.
27. O “dormira” (le somno del morte).
28. Citation de Isaia 25:8.
29. Citation de Hosea 13:14.
30. O “abundante”.
31. O “van”.