Biblia/Nove Testamento/Corinthios/1Corinthios 13

1 Corinthios

13

Le via del amor

¹Si io parla linguas human e angelic, ma io non ha amor, io es simile a un gong strepitose^[1] o a un ruito de cymbalos. ²E si io ha le dono del prophetia e cognosce tote le mysterios e tote le scientia, e si io ha tote le fide necessari mesmo pro remover montanias, ma io non ha amor, io es nihil. ³Si io da tote mi benes pro nutrir le povres e si io me sacrifica completemente pro laudabile causas^[2], ma io non ha amor, isto comporta nulle real beneficio^[3].

⁴Le amor es patiente, le amor es benigne, non invidia. Le amor non se vangloria, non es arrogante. ⁵Illo non se comporta indecorosemente, non servi se mesme, non se irrita facilemente o nutri resentimento. ⁶Le amor non gaude del injustitia ma se allegra del veritate. ⁷¹Illo excusa^[4] toto, crede toto, supporta toto.

⁸Le amor es sin termino^[5]. Si il ha prophetias, illos non servira plus^[6]; si il ha linguas, illos cessara; si il ha scientia^[7] illo non servira plus. ⁹Pois que nos cognosce in parte, e nos prophetisa in parte, ¹⁰ma quando toto essera complite^[8], lo que es solmente partial non servira plus. ¹¹Quando io esseva un infante, io parlava como un infante, io pensava como un infante, io rationava como un infante. Quando, tamen, io deveniva adulte, io deponeva^[9] le cosas del infantia. ¹²Pois que nunc nos vide le cosas in maniera non completemente^[10] clar como un imagine reflectite^[11], ma tunc nos videra facie a facie. Nunc io cognosce in parte, ma tunc io cognoscera plenmente, sicut io ha essite plenmente cognoscite. ¹³E ora tres cosas permane: le fide, le sperantia, e le amor. Le major de illos, tamen, es le amor.

Notas

1. O “bronzo resonante”.
2. Plure manuscriptos rende isto como “si io confide mi corpore a esser comburite” o “si io offere mi corpore al flammas”, ma isto es minus probabile.
3. O “io recipe nulle beneficio”.
4. O “coperi”.
5. O “nunquam cessara”.
6. O “essera ponite a parte”.
7. O “cognoscentia”.
8. O “quando lo que es perfecte veni”.
9. O “poneva a parte”, “abandonava”.
10. O “enigmatic”
11. O “como in un speculo”.