Biblia/Nove Testamento/Corinthios/1Corinthios 12

1 Corinthios

12

Le charismas

¹Concernente nunc le donos spiritual^[1], fratres e sorores, io non vole que vos remane in ignorantia^[2]. ²Vos sape que quando vos esseva pagan, vos esseva discamminate per idolos mute, comocunque vos esseva conducite. ³Assi, io vole que vos comprehende que nemo, parlante per le Spirito de Deo, poterea dicer: “Jesus es anathema^[3]”, e nemo poterea dicer: “Jesus es Senior” si non per le Spirito Sancte.

⁴Ora, il ha differente charismas^[4] ma le Spirito es le mesme. ⁵E il ha differente ministerios, ma un mesme Senior. ⁶E il ha resultatos differente, ma le mesme Deo qui produce tote illos in omnes. ⁷A cata persona es date le manifestation del Spirito pro le beneficio de omnes. ⁸A uno es date per le Spirito le parola de sapientia, e a un altere le parola de cognoscentia secundo le mesme Spirito, ⁹a un altere le fide per le mesme Spirito, e a un altere le charismas de resanamento per le unic Spirito, ¹⁰a un altere le poter de operar miraculos, a un altere le prophetia, e a un altere le discernimento^[5] del spiritos, a un altere diverse sortas de linguas, e a un altere le interpretation de linguas. ¹¹Il se tracta de uno e le mesme Spirito, le qual distribue individualmente a cata uno secundo le voluntate de Ille.

Differente membros in un corpore

¹²Pois que justo como le corpore es uno e tamen ha multe membros, e tote le membros del corpore - ben que multe - constitue un sol corpore, assi es Christo. ¹³Proque in un Spirito nos omnes esseva baptisate in un sol corpore. Judeos o grecos, sclave o libere, a nos omnes esseva date a biber del mesme Spirito. ¹⁴De facto le corpore non es un sol membro, ma multes. ¹⁵Si le pede dicerea: “Pois que io non es un mano, io non face parte del corpore”, non pro isto illo cessarea esser parte del corpore. ¹⁶E si le aure dicerea: “Pois que io non es un oculo, io non face parte del corpore”, non pro isto illo cessarea esser parte del corpore. ¹⁷Si le corpore integre esserea un oculo, qual parte de illo facerea le audito? Si le corpore integre esserea un aure, qual parte exercerea le olfaction? ¹⁸Il es un facto que Deo collocava cata un del membros del corpore, justo como ille decideva. ¹⁹Si illos esserea totes le mesme membros, ubi esserea le corpore? ²⁰Assi, il ha multe membros, ma un sol corpore. ²¹Le oculo non pote dicer a un mano: “Io non te necessita”, ni, a su vice, pote le capite dicer a un pede: “Io non te necessita”. ²²Al contrario, le membros que pare plus debile es essential^[6], ²³e al membros que nos considera minus honorabile nos confere^[7] major honor. Nostre membros plus impresentabile es, de facto, tractate^[8] con major cura ²⁴ma nostre membros presentabile non necessita isto. Il es assi que Deo ha componite le corpore quando ille dava plus grande honor al membros minor. ²⁵de sorta que il non ha divisiones in le corpore, ma le membros se interessa le uno al altere. ²⁶Si un membro suffre, tote le alteres suffre con illo. Si un membro es honorate, totes gaude con illo.

²⁷Ora vos es le corpore de Christo, e cata uno de vos individualmente es membros de illo. ²⁸E Deo ha designate in le ecclesia in prime loco apostolos, in secunde loco prophetas, in tertie loco maestros^[9], pois illes qui ha le dono de miraculos, illes qui ha charismas de resanamento, de adjutar, de administrar, e de parlar differente sortas de linguas. ²⁹Non omnes es apostolos, nonne? Non omnes opera miraculos, nonne? ³⁰Non omnes ha charismas de resanamento, nonne? Non omnes parla in linguas, nonne? Non omnes interpreta, nonne? ³¹Ma vos deberea desiderar ardentemente le charismas major.

E nunc io vole monstrar vos un via incomparabile^[10].

Notas

1. O “cosas spiritual”.
2. O “non informate”.
3. O “maledicte”.
4. O “donos spiritual”.
5. O “le capacitate de distinguer”.
6. O “es le plus necessari”.
7. O “revesti”.
8. O “revestite”.
9. O “inseniante”, “doctores”.
10. O “un via plus excellente”