Biblia/Nove Testamento/Corinthios/1Corinthios 1

←Romanos 16

Le Biblia in Interlingua Litteras al Corinthios

1 Corinthios 2→

1 Corinthios

1

Salutation

¹Paulo, appellate a esser apostolo de Christo Jesus per voluntate de Deo, e Sosthene, nostre fratre. ²Al ecclesia de Deo que es in Corintho, a illes qui ha essite sanctificate in Christo Jesus e appellate a esser sancte, con tote illes qui in omne placia invoca le nomine de nostre Senior Jesus Christo, lor Senior e nostre. ³Gratia e pace a vos de Deo, nostre Patre, e del Senior Jesus Christo!

Actiones de gratia

⁴Io semper regratia mi Deo pro vos a causa del gratia de Deo que esseva date vos in Christo Jesus. ⁵Pois que in ille vos esseva inricchite in omne maniera, con omne eloquentia^[1] e con omne sorta de cognoscentia, ⁶proque lo que nos testificava super Christo esseva confirmate inter vos, ⁷tanto que nunc vos non manca de ulle charisma^[2], in le vive expectation del manifestation^[3] de nostre Senior Jesus Christo. ⁸Ille alsi confirmara vos usque al fin, a fin que vos sia trovate irreprochabile^[4] in le die de nostre Senior Jesus Christo. ⁹Deo es fidel: per ille vos esseva appellate al communion con su Filio, Jesus Christo, nostre Senior.

Disunion in le ecclesia

¹⁰Io exhorta vos, fratres e sorores, per le nomine de nostre Senior Jesus Christo, que vos sia de accordo le unes con le alteres^[5], que non sia inter vos dissensiones^[6], e que vos sia unite in le mesme mente e in le mesme intentiones^[7]. ¹¹Pois que io ha essite informate super vos. fratres e sorores mie, per membros del familia de Chloe, que il ha querelas^[8] inter vos. ¹²Ora io dice isto proque cata uno de vos dice: “Io es con^[9] Paulo”, o “Io es con Apollo”, o “Io es con Cephas”, o “Io es con Christo”. ¹³Esque Christo es dividite? Paulo non esseva crucifigite pro vos, nonne? O esque vos esseva de facto baptisate in le nomine de Paulo? ¹⁴Io regratia Deo que io non baptisava alicuno de vos, excepte Crispo e Gaio, ¹⁵de sorta que nemo pote dicer que ille esseva baptisate in mi nomine! ¹⁶(Io alsi baptisava le familia de Stephano. Alteremente, io non rememora si io baptisava alicun altere). ¹⁷Pois que Christo non me inviava a baptisar, ma a predicar le evangelio - e non con eloquentia^[10] de parolas, de sorta que le cruce de Christo non sia vacuate de significato.

Le message del cruce

¹⁸De facto, le message concernente le cruce pare^[11] insensate a illes qui vade in perdition^[12], ma a nos qui es salvate^[13], illo es le potentia de Deo. ¹⁹ Pois que il es scribite: “Io destruera le sapientia del sapiente e io reprobara le intendimento del intelligente^[14]”. ²⁰Ubi es le sapiente? Ubi es le experto in le lege mosaic^[15]? Ubi es le polemista^[16] de iste etate^[17]? An Deo non rendeva insensate le sapientia de iste mundo? ²¹Le mundo, con tote su sapientia, esseva incapace a recognoscer Deo in le terminos de Su proprie sapientia, assi Deo se complaceva de salvar le credentes per le insensatessa^[18] del predication. ²²Pois que le judeos require signos miraculose e le grecos quere sapientia, ²³ma nos predica re Christo crucifigite: isto pro le judeos es scandalose^[19] e pro le grecos es insensate. ²⁴Ma pro illes qui es vocate, sia judeos, sia grecos, Christo es le potentia de Deo e le sapientia de Deo. ²⁵Proque le insensatessa de Deo es plus sapiente que le sapientia human^[20], e le debilitate de Deo es plus forte que le fortia human.

²⁶Pensa al circumstantias de vostre vocation, fratres e sorores! Non multe de vos esseva sapiente^[21] secundo criterios human^[22], non multe de vos esseva potente^[23]. ²⁷Ma Deo seligeva lo que le mundo reputa insensate pro avergoniar le intelligente, e Deo seligeva lo que le mundo reputa debile pro avergoniar le forte. ²⁸Deo seligeva lo que in le mundo es considerate basse e dispreciate, lo que es considerate nihil^[24], pro reducer a nihil^[25] lo que es considerate importante, ²⁹a que nemo pote vangloriar se coram ille. ³⁰Il es a causa de Ille^[26] que vos es nunc in Christo Jesus, le qual deveniva pro nos sapientia de Deo, e justification, e sanctification, e redemption,³¹a que, como il es scribite, “Si tu vole vantar te, vanta te solmente del Senior^[27]”!

Notas

1. O “parola”.
2. O “dono charismatic”.
3. O “revelation”, “venita”, “retorno”.
4. O “irreprehensibile”.
5. O “que vos omnes dice le mesme cosa”.
6. O “divisiones”.
7. O “proposito”, “judicamento”.
8. O “rivalitates”, “disputas”.
9. O “Io es de Paulo”, “Io es de accordo con Paulo”.
10. O “sapientia”.
11. O “es”.
12. O “se perde”.
13. O “se salva”, “le salvate”, illo es “que Deo salva”.
14. Un citation de Isaia 29:14.
15. O “le scriba”.
16. O “disputator”, “le experto de debattos cultural”.
17. O “seculo”.
18. O “stupiditate”.
19. O “scandalo”, litt. “petra que face trappar”.
20. O “del homines”
21. O “reputate intellectuales”.
22. O “secundo le carne”.
23. O “influente in le societate”.
24. O “lo que non es”.
25. O “nullificar”, “annihilar”.
26. O “de Ille”.
27. O “que ille qui se vanta, se vanta in le Senior”, citation de Jeremia 9:24.