Biblia/Nove Testamento/Colossenses/Colossenses 3

Epistola al Colossenses

Capitulo 3

Exhortation a persequer cosas celeste

¹Si, dunque, vos esseva resuscitate con Christo, continua persequer le cosas que es in alto^[1], ubi Christo es sedite al dextera de Deo. ²Continua pensar al cosas que es in alto, non al cosas que es sur le terra; ³proque vos moriva e vostre vita es celate con Christo in Deo. ⁴Quando Christo (qui es nostre vita) apparera, alora vos alsi apparera^[2] con ille in gloria^[3]. ⁵Mortifica ergo vostre membros que es sur le terra^[4]: immoralitate sexual^[5], impuritate, passiones vergoniose^[6], concupiscentia, e aviditate, que es idolatria. ⁶A causa de iste cosas le ira de Deo se manifesta^[7] contra le filios del disobedientia^[8]. ⁷Un vice vos comportava^[9] vos in iste maniera quando vos viveva inter illes. ⁸Nunc, tamen, renuncia^[10] a tote iste cosas: ira, furor, malevolentia, calumnias, injurias. Que nunquam exi isto de vostre bucca. ⁹Non va mentir le unes le alteres, nam vos disvestiva vos del homine vetule con su practicas^{[11] 10}e vos revestiva vos del homine nove, que se renova in cognoscentia secundo le imagine de ille qui le ha create. ¹¹Hic il non ha ni greco ni judeo, ni circumcise ni incircumcise, ni barbaro, ni Scytha, ni sclavo, ni libere, ma Christo es toto e in totes^[12].

Exhortation al unitate e al amor

¹²Vos, ergo, sicut electos de Deo, sancte e amate, revesti vos de compassion^[13], benignitate, humilitate, modestia, e patientia. ¹³Sia tolerante^[14] le unes verso le alteres e pardona vos reciprocamente, si uno ha un querela contra un altere. Sicut le Senior pardonava vos, assi etiam vos pardona alteres. ¹⁴In ultra a tote iste cosas, adde le amor, le qual es le ligamine perfecte^[15]. ¹⁵Que le pace de Christo regna in vostre cordes^[16] (proque a iste pace vos esseva appellate como un sol corpore), e sia grate.

¹⁶ Que le Parola de Christo habita in vos abundantemente per inseniar e admonestar le unes le alteres con omne sapientia. Va cantar de corde a Deo, sub le impulso del gratia, psalmos, hymnos, e cantico spiritual^[17]. ¹⁷E qualcunque cosa vos face, in parolas o obras, va facer lo in le nomine del Senior Jesus, regratiante Deo le Patre per le medio de ille.

Exhortationes al familias

¹⁸Uxores, submitte vos a vostre maritos como il es convenibile in le Senior. ¹⁹Maritos, ama vostre uxores e non sia aspere^[18] con illas. ²⁰Filios, sia obediente a vostre genitores in toto, proque isto place al Senior. ²¹Patres, non vexa^[19] vostre filios, a fin que illes non se discoragia.

²²Servos, obedi a vostre dominos terren in omne respecto, non solmente quando illes survelia^[20] vos - como illes qui ama complacer exteriormente le alteres^[21] - ma con corde sincer^[22] in le timor del Senior.

²³Qualcunque cosa vos face, face lo de bon corde^[23] como pro le Senior e non pro le homines, ²⁴proque vos sape que vos recipera vostre hereditage del Senior como recompensa. Servi le Senior Christo. ²⁵Qui face lo que es mal essera repagate pro su mal, e in isto il ha nulle exception^[24].

Notas

1. O “le cosas excelse”, o superior.
2. O “essera manifestate”.
3. O “alora etiam vos essera con ille manifestate in gloria”.
4. O “Qualcunque cosa in vos pertine a iste mundo”, illo es mundan.
5. O “fornication”.
6. O “luxuria”, “libidine”.
7. O “veni”.
8. Expression idiomatic semitic que significa “tote illes qui es disobediente” (a Deo).
9. Litt. “camminava”.
10. O “depone”, “disvesti vos”.
11. O “actos”.
12. O “Christo es omne cosa e in omnes”.
13. Litt. “intestinos”, o “corde” de misericordia,
14. O “Supporta”.
15. Le ligamine perfecte de omne relation interpersonal.
16. O “sia in controlo de vostre corde”.
17. “psalmos, hymnos, e cantico spiritual” es le nomine que tunc esseva date a lo que nos appella hodie “le libro del psalmos”.
18. O “amarisate”.
19. O “non irrita”, “non provoca”, “non causa resentimento contra vos in vostre filios”.
20. O “reguarda”, “quando vos es sub lor oculos”.
21. O “pro agradar le homines”, “como personas complacente”, o “obligante”.
22. O “con simplicitate de corde”.
23. O “con enthusiasmo”.
24. Deo tractara cata uno equalmente, sin alcun partialitate.